"كونستيتۋتسيادان نازارباەۆتىڭ تاريحي ءرولى جونىندەگى باپ الىنىپ تاستالدى. ەندىگارى تۇڭعىش پرەزيدەنتتىڭ دە، ەكىنشى پرەزيدەنتتىڭ دە، ودان كەيىنگى پرەزيدەنتتەردىڭ دە ەسىمى كونستيتۋتسيادا جازىلمايدى. "پرەزيدەنت مارتەبەسى تۋرالى" زاڭ قابىلدانبايدى. وسىلايشا، جەكە باسقا تابىنۋشىلىقتى، ماقتانۋشىلىقتى بولدىرماۋ قولعا الىنىپ، جاڭا ءداستۇر قالىپتاسادى". بۇل پىكىردى قر پارلامەنتى ءماجىلىسىنىڭ دەپۋتاتى بەرىك ابدىعاليۇلى Adyrna.kz ۇلتتىق پورتالىنىڭ تىلشىسىنە بەرگەن سۇحباتىندا ايتتى.
بەرىك ابدىعاليۇلىنىڭ ايتۋىنشا، مەملەكەت باسشىسىنا بۇل شەشىمدى قابىلداۋ وڭايعا سوقپادى.
"ويتكەنى، وتكەندەگى جۇمىس توبى مەملەكەت باسشىسىنا “تۇڭعىش پرەزيدەنتتىڭ تاريحي ءرولىن كورسەتىپ، كونستيتۋتسيادا “تاۋەلسىز قازاقستاننىڭ نەگىزىن قالاۋشى” دەپ بەكىتەيىك دەگەن ۇسىنىس بىلدىرگەننەن كەيىن اتالمىش شەشىم قابىلدانعان بولاتىن. الايدا بۇل قوعامدا قىزۋ تالقىعا ءتۇسىپ، كوپ سىني پىكىر ايتىلدى. ءتۇرلى كەلىسپەۋشىلىكتەر ورىن الدى. "نازارباەۆتىڭ ەڭبەگىن جازاتىن بولساق كونستيتۋتسياعا ەمەس، كىتاپتارعا جازايىق، وقۋلىقتارعا جازايىق، كينو تۇسىرەيىك. بىراق، ونىڭ ەسىمى كونستيتۋتسيادا بولماۋى كەرەك” دەگەن پىكىر كوپ بولعاسىن مەملەكەت باسشىسى ءوزى ءۇشىن وسىنداي قيىن شەشىمگە كەلىپ وتىر", - دەيدى ساياساتكەر.
ساياساتكەردىڭ ساراپتاۋىنشا، توقاەۆ كوپشىلىكتىڭ ايتقانىمەن كەلىسىپ، شىن مانىندە "كونستيتۋتسيا الدىندا ءبارى تەڭ بولسىن" دەپ كەلەشەك ۇرپاق ءۇشىن ماڭىزدى قادام جاسادى.
"ەندىگارى تۇڭعىش پرەزيدەنتتىڭ دە، ەكىنشى پرەزيدەنتتىڭ دە، ودان كەيىنگى پرەزيدەنتتەردىڭ دە ەسىمى كونستيتۋتسيادا جازىلمايدى. "پرەزيدەنت مارتەبەسى تۋرالى" زاڭ قابىلدانبايدى. بولاشاقتا دا، قازىرگى كۇننىڭ وزىندە دە ءبارى كونستيتۋتسيا الدىندا تەڭ بولۋى كەرەك. وسىنداي ماڭىزدى شەشىمگە كەلسە كەرەك. توقاەۆ بۇعان دەيىن دە "پرەزيدەنت تۋىسقاندارىن لاۋازىمدى قىزمەتكە تارتۋدى دوعارۋ كەرەك، ەندى ونداي قاتەلىكتەر ەشقاشان قايتالانباسىن، كەيىنگى پرەزيدەنتتەرگە ساباق بولسىن" دەگەن ساياسي جانە مورالدىك شەشىم قابىلداعان بولاتىن", - دەپ اتاپ ءوتتى ءماجىلىس دەپۋتاتى.
بەرىك ابدىعاليۇلىنىڭ ايتۋىنشا، توقاەۆ وسىلايشا سەنىم مەن ادالدىققا نەگىزدەلگەن ءداستۇر، ساياسي مادەنيەت قالىپتاستىرماقشى.
"ەل ىشىندە ەڭ باستىسى تازالىق بولۋى كەرەك، ءبارى تەڭ بولۋى كەرەك، تازا بولۋى كەرەك" دەگەن ساياسي مادەنيەت قالىپتاستىرۋعا باعىتتالعان قادام عوي. دەموكراتيا جانە ساياسي مورالدىق كوزقاراس تۇرعىسىنان الىپ قاراساق، بۇل كونستيتۋتسيادا نازارباەۆتىڭ ەلگە جاساعان ەڭبەگىن سىزىپ تاستاۋ دەگەندى بىلدىرمەيدى. ارينە، تاۋەلسىزدىك العان جىلدارى، اسىرەسە العاشقى ونجىلدىقتا شەكارالار انىقتاۋدا ول كىسىنىڭ ەڭبەگى ءسىڭدى. بىراق ول تەك كىتاپتاردا، وقۋلىقتاردا جازىلۋى كەرەك", - دەيدى بەرىك ابدىعاليۇلى.
ءماجىلىس دەپۋتاتىنىڭ مالىمدەۋىنشە، بۇل ەشكىمدى كەمسىتۋ دە، جوققا شىعارۋ ەمەس.
"ارينە مەملەكەت باسشىسىنا رەنجيتىندەر تابىلادى. بىراق مىنا نارسەنى دۇرىس ءتۇسىنۋىمىز كەرەك. ول كىسى ەشكىمدى كەمسىتىپ جاتقان جوق. ءبىرىنشى پرەزيدەنتتى جامانداپ جاتقان جوق. بارلىق جاۋاپكەرشىلىكتى ءوز موينىنا الىپ، باتىل دا پاراساتتى شەشىم قابىلدادى دەپ ەسەپتەيمىن. ەرتەڭ بۇنى حالىق قولداسا، ەگەر كونستيتۋتسيا بەكىتىلسە، وندا بۇل جاقسى ساياسي ءۇردىس بولادى. بولاشاقتا پرەزيدەنتتىڭ ەسىمى كونستيتۋتسياعا جازىلمايدى، ونىڭ ەرەكشە مارتەبەسى زاڭدا كورسەتىلمەيدى. جەكە باسقا تابىنۋشىلىقتى، ماقتانۋشىلىقتى بولدىرماۋ قولعا الىنىپ، جاڭا ءداستۇر قالىپتاسادى. وسىنداي ءبىر ماڭىزدى ساياسي قادام جاساپ جاتىرمىز", - دەپ تولىقتىردى ءسوزىن بەرىك ابدىعاليۇلى.
زارينا اشىربەك،
"ادىرنا" ۇلتتىق پورتالى
