قازاقستاننىڭ بارلىق وبلىستارىنداعى ۇلى وتان سوعىسىنىڭ ارداگەرلەرىنە كەمىندە ءبىر ميلليون تەڭگە كولەمىندە جاردەماقى تولەنەدى. بۇل تۋرالى پرەزيدەنتتىڭ ءباسپاسوز حاتشىسى رۋسلان جەلدىباي مالىمدەدى، - دەپ حابارلايدى "ادىرنا" ۇلتتىق پورتالى.
«مەملەكەت باسشىسىنىڭ تاپسىرماسى بويىنشا بيىلعى جىلى بارلىق وڭىرلەردە سوعىس ارداگەرلەرىنە 1 ميلليون تەڭگەدەن كەم ەمەس بىرجولعى جاردەماقى تولەنىپ جاتىر، تىل ەڭبەككەرلەرى مەن ولارعا تەڭەستىرىلگەن ازاماتتارعا دا ماتەريالدىق قولداۋ كورسەتىلەدى.
8-9 مامىردا وبلىس اكىمدەرى دەڭگەيىندە سوعىس ارداگەرلەرىمەن جانە ولاردىڭ وتباسى مۇشەلەرىمەن جەكە كەزدەسۋلەر ۇيىمداستىرىلادى. ەلىمىز بويىنشا «ارداگەرلەرگە تاعزىم» قايىرىمدىلىق اكتسيالارى وتەدى.
ارداگەرلەرىمىزگە مەملەكەت تاراپىنان بارلىق قاجەتتى كومەك الداعى ۋاقىتتا دا جۇيەلى تۇردە كورسەتىلەدى»، - دەدى رۋسلان جەلدىباي.
قازاقستان پرەزيدەنتىنىڭ ءباسپاسوز حاتشىسى قاسىم-جومارت توقاەۆتىڭ وتان قورعاۋشىلار كۇنى مەن جەڭىس كۇنى قارساڭىندا قانداي شارالارعا قاتىساتىنىن دا حابارلادى.
ءباسپاسوز حاتشىسىنىڭ ايتۋىنشا، بيىل 9 مامىردا توقاەۆ ەلورداداعى «وتان قورعاۋشىلار» مونۋمەنتىندەگى ماڭگىلىك الاۋعا ءداستۇرلى گۇل قويۋ راسىمىنە قاتىسۋدى جوسپارلاپ وتىر.
سونىمەن قاتار، مەملەكەت باسشىسى 6 مامىردا وتان قورعاۋشىلار كۇنى مەن جەڭىس كۇنىنە ارنالعان سالتاناتتى شاراعا قاتىسادى.
"ادىرنا" ۇلتتىق پورتالى
