قازاقستان مەن رەسەي ءىىم ەسىرتكى قىلمىسىنا قارسى كۇرەس بولىمشەلەرى ەكى ەل اۋماعىندا سينتەتيكالىق ەسىرتكىنى پوشتا ارقىلى جەتكىزۋدىڭ ترانسۇلتتىق ارناسىنا توسقاۋىل قويۋ بويىنشا ارنايى وپەراتسيا جۇرگىزدى، - دەپ حابارلايدى "ادىرنا" ۇلتتىق پورتالى polisia.kz سايتىنا سىلتەمە جاساپ.
ءىىم ەسىرتكى قىلمىسىنا قارسى كۇرەس دەپارتامەنتى باستىعىنىڭ مىندەتىن اتقارۋشى اسقار مۇحامەتقاليەۆ تۇسىندىرگەندەي، ىشكى ىستەر مينيسترلىگى ورتالىق اپپاراتى مەن پوليتسيا جانە باسقارمالاردىڭ تاجىريبەلى قىزمەتكەرلەرىنەن ارنايى توپ قۇرىلدى.
ومبى جانە تاراز قالالارىندا ءبىر مەزگىلدە جۇرگىزىلگەن ءىس-شارالاردىڭ ناتيجەسىندە پوليتسەيلەر سينتەتيكالىق ەسىرتكىنى رەسەي فەدەراتسياسىنا نەگىزگى جونەلتۋشى مەن قازاقستانداعى ولاردى الۋشىنى ۇستادى. سوتتالۋشىلاردىڭ تۇرعىلىقتى جەرىندە ءتىنتۋ كەزىندە ءىرى ەسىرتكى زەرتحانالارى انىقتالدى.
ۇستالعان ومبى تۇرعىنى پوشتا ارقىلى «سينتەتيكالىق ونىمدەر» جاساپ، ورتالىق ازيا ەلدەرىنە، ونىڭ ىشىندە قازاقستانعا جونەلتكەن. سونىمەن بىرگە ول جالعان قۇجاتتاردى قولدانىپ، ءتۇرلى تاۋارلار – ماشينا مايلارى، تۇرمىستىق حيميا جانە ت.ب. جالعان ات جازىپ سالەمدەمە جىبەرىپ وتىرعان.
پوليتسيا جالپى سوماسى 9,5 ميلليون دوللاردان اساتىن 260 كەلىدەن استام دايىن ەسىرتكىنى تاركىلەدى.
2021 جىلدىڭ قازان ايىنان اعىمداعى جىلدىڭ ءساۋىر ايىنا دەيىن جۇرگىزىلگەن ارنايى وپەراتسيا ناتيجەسىندە الماتى، التاي، اقتوبە، اتىراۋ، تاراز جانە قىزىلوردا قالالارىندا پوليتسيا قىزمەتكەرلەرى سينتەتيكالىق ەسىرتكى وندىرۋمەن جانە تاراتۋمەن اينالىسقان قازاقستاننىڭ 13 ازاماتىن ۇستادى.
"ادىرنا" ۇلتتىق پورتالى
