سىبايلاس جەمقورلىققا قارسى قىزمەت اتىراۋ وبلىسى اكىمىنىڭ ورىنباسارى باقىتگۇل حامەنوۆانى تەرگەۋگە قاتىستى پىكىر ءبىلدىردى، دەپ جازادى "ادىرنا" ۇلتتىق پورتالى.
Stan.kz حابارلاۋىنشا، وتكەن جىلدىڭ 11 جەلتوقسانىندا اتىراۋ وبلىسى اكىمىنىڭ ورىنباسارى حامەنوۆانىڭ ۇستالعانى حابارلانعان بولاتىن. ول 22 جەلتوقساندا ۋاقىتشا ۇستاۋ يزولياتورىنا قامالدى. الايدا سودان بەرى تەرگەۋ تۋرالى ەشتەڭە بەلگىسىز.
سىبايلاس جەمقورلىققا قارسى قىزمەت بۇل ءىس ءالى تەكسەرىلىپ جاتقانىن حابارلادى.
"اگەنتتىك اتىراۋ وبلىسى اكىمىنىڭ ورىنباسارى ب.ك. حامەنوۆاعا قاتىستى قىلمىستىق كودەكستىڭ 366-بابى 3-بولىگىنىڭ 2-تارماعى بويىنشا الدىن الا ءسوز بايلاسۋ بويىنشا ادامدار توبىندا قوماقتى مولشەردە پارا الۋ دەرەگى بويىنشا قىلمىستىق ءىستى تەرگەپ جاتىر. قازىرگى ۋاقىتتا حامەنوۆا قاماۋدا وتىر", – دەدى ۆەدومستۆودا.
ۆەدومستۆو قىلمىستىق ءىس جۇرگىزۋ كودەكسىنىڭ 201-بابىنىڭ 1-بولىگىنە سايكەس سوتقا دەيىنگى تەرگەپ-تەكسەرۋ دەرەكتەرى جاريا ەتىلۋگە جاتپايتىنىن اتاپ ءوتتى.
"ەگەر بۇل تەرگەۋ مۇددەلەرىنە قايشى كەلمەسە جانە باسقا ادامداردىڭ قۇقىقتارى مەن زاڭدى مۇددەلەرىن بۇزۋمەن بايلانىستى بولماسا، ولار پروكۋروردىڭ رۇقساتىمەن، ول مۇمكىن دەپ سانايتىن شامادا عانا جاريا ەتىلۋى مۇمكىن. جوعارىدا ايتىلعانداردىڭ نەگىزىندە، سونداي-اق ءسىزدىڭ قىلمىستىق پروتسەسكە قاتىسۋشى ەمەس ەكەنىڭىزدى ەسكەرە وتىرىپ، ب.ك. حامەنوۆاعا قاتىستى سوتقا دەيىنگى تەرگەپ-تەكسەرۋ تۋرالى باسقا مالىمەتتەر جاريالانبايدى", – دەدى قىلمىستىق ءىس جۇرگىزۋ باسقارماسىنىڭ باستىعى قانات سۇلەيمەنوۆ.
باقىتگۇل حامەنوۆا 2020 جىلدىڭ 13 ناۋرىزىندا وبلىس اكىمىنىڭ ورىنباسارى بولىپ تاعايىندالدى. بۇعان دەيىن VI شاقىرىلىمداعى پارلامەنت ءماجىلىسىنىڭ دەپۋتاتى بولعان.
"ادىرنا" ۇلتتىق پورتالى
