“گازپرومداعى” جۇمباق ولىمدەردىڭ سىرى نەدە؟
«گازپروم» ءوز ىشىنەن ءىرىپ جاتىر. جىل باسىنان بەرى رەسەيدەگى ەڭ ءىرى گاز كومپانيالارى سانالاتىن «گازپروم» جانە «نوۆاتەككە» قاتىسى بار ءتورت توپ-مەنەدجەر قايتىس بولدى.
تەرگەۋشىلەر بولسا، جاعدايعا «سۋيتسيد» دەگەن باعا بەرىپ، ءىستى جىلى جاۋىپ قويا سالدى. مۇنىڭ ءبارى كوڭىلگە كۇدىك ۇيالاتپاي ما؟ تىزبەكتەپ كورەلىك.
قاڭتارداعى ءولىم. قاڭتار ايىنىڭ سوڭىندا «گازپروم ينۆەست» كولىك قىزمەتىنىڭ باسشىسى 60 جاستاعى لەونيد شۋلمان قايتىس بولدى. مەنەدجەردىڭ دەنەسى لەنينسكي اۋىلىندا (لەنينگراد وبلىسى) ورنالاسقان ءوز ءۇيىنىڭ جۋىناتىن بولمەسىنەن تابىلدى. الدىن الا بولجام بويىنشا، ول ءوزىن-ءوزى ولتىرگەن.
اقپانداعى ءولىم. شۋلمان وقيعاسىنان شامامەن ءبىر ايدان كەيىن سول لەنينسكيدەگى ەليتالىق اۋىلداردىڭ بىرىندە «گازپروم» بىرىڭعاي ەسەپ ايىرىسۋ ورتالىعىنىڭ كورپوراتيۆتىك قاۋىپسىزدىك جونىندەگى باس ديرەكتورىنىڭ ورىنباسارى الەكساندر تيۋلياكوۆتىڭ ءمايىتى تابىلدى. تەرگەۋگە سايكەس، الەكساندر دا ءوز-وزىنە قول جۇمساعان.
سونداي-اق ءمايىتتىڭ جانىنان ۋماجدالعان حات تابىلعان. بىراق ول حاتتىڭ مازمۇنى ەشكىمگە جاريا ەتىلمەپتى.
ساۋىردەگى ءولىم. 18 ساۋىردە ماسكەۋدەگى پاتەرلەردىڭ بىرىندە «گازپرومبانكتىڭ» بۇرىنعى ۆيتسە-پرەزيدەنتى ۆلاديسلاۆ اۆاەۆ، سونداي-اق ونىڭ ايەلى مەن قىزى قايتىس بولدى. ۇشەۋىنىڭ دە تاپانشامەن اتىپ ولتىرىلگەنى بەلگىلى بولدى. الدىن الا بولجام بويىنشا، اۆاەۆ جۇبايىنىڭ وپاسىزدىعىن ءبىلىپ قويعان-مىس، سودان كەيىن الدىمەن ايەلى مەن قىزىن ءولتىرىپ، سوسىن ءوزىن-ءوزى اتىپ تاستاعان كورىنەدى.
رەسەيلىك باق وكىلدەرىنىڭ حابارلاۋىنشا، بۇل ىسكە كىنالى رەتىندە شۇعىل جايدايدا ۋكرايناعا كەتىپ قالعان گازپرومبانكتىڭ بۇرىنعى ۆيتسە-پرەزيدەنتى يگور ۆولوبۋەۆ ايىپتالۋدا.
ايتۋىنشا، ول ۆلاديسلاۆ اۆاەۆ (گازپرومبانكتىڭ ءبىرىنشى ۆيتسە-پرەزيدەنتى) پەن سەرگەي پروتاسەنيۋدىڭ (نوۆاتەك گاز كومپانياسى) ولىمىنە قاتىسى بولۋى مۇمكىن.
ال بىرنەشە كۇن بۇرىن يسپانيانىڭ للورەت-دە-مار قالاسىندا ورنالاسقان ۇيدە نوۆاتەك گاز كومپانياسىنىڭ بۇرىنعى توپ-مەنەدجەرى سەرگەي پروتوسەنيدىڭ دەنەسى تابىلدى. الدىن الا مالىمەتكە سايكەس، ول دا ءوز ايەلى مەن قىزىن پىشاقتاپ ولتىرگەن.
ونىڭ ۇلى فەدور بولسا، تەرگەۋ مالىمەتتەرىنە سەنبەيتىنىن جەتكىزدى.
پىكىرىنشە، بەلگىسىز ادامدار ونىڭ وتباسىن ولتىرگەن. سەبەبى اكەسى اناسىن قاتتى جاقسى كورگەنگە ۇقسايدى. پروتوسەنيدىڭ دوسى، كاسىپكەر اناتولي تيموشەنكو دا ءدال وسىنداي پىكىردە.
ال ەندى نەگە بارلىق ءولىم بىردەي ستسەناريدە دەگەن زاڭدى سۇراق تۋىندايدى. دەمەك، بۇل جەردە ءبىز بىلمەيتىن بىلىقتىڭ بارى انىق. بالكىم، «گازپرومنىڭ» ىشىندە ءوزارا “تاقتالاستىق”، باقتالاستىق باستالعان بولار.
قالاي بولعاندا ۇلكەن ساياسي ويىنداردىڭ ءجۇرىپ جاتقانى انىق. بۇل، بىرىنەن سوڭ ءبىرى بولعان تىزبەكتى سۋتسيتسيدتەردى كەزدەيسوقتىق دەي المايمىز.
ورالباي مەرگەنبايۇلى،
“ادىرنا” ۇلتتىق پورتالى
