شىمكەنتتە ءوز كاسىبىن باستاۋعا بەرىلەتىن كولەمى 400 اەك قۇرايتىن مەملەكەتتىك قايتارىمسىز گرانتقا قۇجات قابىلداۋدىڭ ءبىرىنشى لەگى (پوتوك) اياقتالىپ، 300-دەن استام ۇمىتكەر وزدەرىنىڭ بيزنەس جوبالارىن ارنايى قۇرىلعان كوميسسيانىڭ الدىندا قورعاۋدى باستادى.
ءتيىستى جۇمىستار ەكى كۇن بويى جۇرگىزىلەدى. ايتا كەتۋ كەرەك، ءبىرىنشى لەككە قۇجات قابىلداۋ 1 ءساۋىر كۇنى باستالىپ، 2019,2020,2021 جىلدارى “اتامەكەن” پالاتاسىنىڭ “باستاۋ بيزنەس” جوباسى بويىنشا وقىپ، سەرتيفيكات العان ازاماتتار ون بەس كۇننىڭ ىشىندە busines.enbek.kz پورتالى ارقىلى ءتيىستى قۇجاتتارىن ونلاين تاپسىرعان.
جالپى، 2022 جىلى اتالعان گرانتپەن بىرنەشە لەك (پوتوك) بويىنشا 1150 ادامدى قامتۋ جوسپارلانىپ وتىر. وتكەن جىلى 700-دەن استام شىمكەنتتىك كولەمى 200 اەك (583 000 تگ.) گرانتقا يە بولعان.
