تالعات بايەدىلوۆ الماتى وبلىسىنداعى ۇيعىر اۋدانىنىڭ اكىمى بولىپ تاعايىندالدى. بۇعان دەيىن ول ەڭبەكشىقازاق اۋدانىن باسقارعان، دەپ حابارلايدى «ادىرنا» ءتىلشىسى.
تالعات ەسكەندىرۇلى 1972 جىلى 16 ماۋسىمدا الماتى وبلىسى كەگەن اۋدانىندا دۇنيەگە كەلگەن. 1998 جىلى قازاق مەملەكەتتىك باسقارۋ اكادەمياسىن «بۋحگالتەرلىك ەسەپ جانە اۋديت» ماماندىعى بويىنشا تامامداعان.
ەڭبەك جولىن 1992 جىلى كولحوز جۇمىسشىسى رەتىندە باستاعان. كەيىن قارجى-ەكونوميكا سالاسىندا، «قازپوشتا» اق جۇيەسىندە جانە جەرگىلىكتى اتقارۋشى ورگانداردا ءتۇرلى قىزمەتتەر اتقارعان.
2008–2010 جىلدارى قارابۇلاق اۋىلدىق وكرۋگىنىڭ اكىمى، 2010–2011 جىلدارى رايىمبەك اۋدانى اكىمى اپپاراتىنىڭ باسشىسى، 2011–2018 جىلدارى رايىمبەك اۋدانى اكىمىنىڭ ورىنباسارى بولعان.
2018–2023 جىلدارى كەگەن اۋدانىنىڭ اكىمى، 2023 جىلى الماتى وبلىستىق ءماسليحاتىنىڭ حاتشىسى، كەيىن ءماسليحات توراعاسى قىزمەتتەرىن اتقارعان.
2024 جىلدىڭ ناۋرىزىنان وسى ۋاقىتقا دەيىن ەڭبەكشىقازاق اۋدانىنىڭ اكىمى بولدى. مەملەكەتتىك قىزمەتتەگى ەڭبەگى ءۇشىن 2019 جىلى «ەرەن ەڭبەگى ءۇشىن» مەدالىمەن ماراپاتتالعان.
