ءتورت قاباتتى № 28 جالپى ورتا ءبىلىم بەرۋ مەكتەبىندە ءورت شىعىپ، مۇعالىم زارداپ شەكتى، دەپ حابارلايدى “ادىرنا” ۇلتتىق پورتالى.
وبلىستىق تجد باستىعىنىڭ ورىنباسارى قايرات شايماردانوۆتىڭ ايتۋىنشا، قازىرگى ۋاقىتتا شاتىر جانىپ جاتىر. ءتىلسىز جاۋدىڭ نەدەن شىققانى جانە كەلتىرىلگەن شىعىن كولەمى انىقتالۋدا.
- تەكسەرۋدەن كەيىن ناتيجەسىن جاريالايمىز. الدىن الا بولجام بويىنشا، 1200 شارشى مەتر اۋماق وتقا ورانعان. جالىن قاتتى تارالىپ، قالىڭ ءتۇتىن باسقان. ءورتتى كەش انىقتاعان. وسىعان بايلانىستى ءورت ءسوندىرۋ بويىنشا جاعداي كۇردەلەنە ءتۇستى. بارلىق كۇشتەر مەن قۇرالدار، دابىل بويىنشا جەكە قۇرام جۇمىلدىرىلدى. شاعىن ءورتتى وزدىگىنەن سوندىرۋگە تىرىسقان بولۋ كەرەك، - دەدى قايرات شايماردانوۆ.
وقيعا ورنىنا بارعان ايماق باسشىسى ابىلقايىر سقاقوۆ بۇگىن توتەنشە جاعداي جونىندەگى جەدەل شتابتىڭ وتىرىسىن وتكىزەتىنىن ايتتى.
“ادىرنا” ۇلتتىق پورتالى
