ونلاين حابارلاما، جارناما بەرۋگە ارنالعان OLX پلاتفورماسىنىڭ قازاقستانداعى سەگمەنتىندە شەتەلدىكتەرگە، ونىڭ ىشىندە رف ازاماتتارىنا، زاڭدى تۇلعالارىنا «قازاقستان جسن-ءىن (جەكە سايكەستەندىرۋ ءنومىرى) جانە بسن (بيزنەس سايكەستەندىرۋ ءنومىرى) الۋعا كومەكتەسەمىن» دەيتىن جارناما پايدا بولدى، دەپ حابارلايدى “ادىرنا” ۇلتتىق پورتالى 7kun.kz سايتىنا سىلتەمە جاساپ.
مۇنداي جارنامالاردىڭ دەنى ناۋرىز جانە ءساۋىر ايلارىندا شىققان. جارناما ماتىنىندە 1000 رۋبلگە نەمەسە 5500-6000 تەڭگەگە ەكى كۇن ىشىندە قازاقستاندىق جسن جاساپ بەرەمىز دەلىنگەن.
ودان بولەك رەسەيلىكتەر ءۇشىن قۇجات راسىمدەۋ، جشس (جاۋاپكەرشىلىگى شەكتەۋلى سەرىكتەستىك), جك (جەكە كاسىپكەرلىك) اشۋ، بانكتەن ەسەپشوت اشۋ، كارتا جاساۋ سەكىلدى قىزمەتتەر ۇسىنعان جارناما كوپ. وسىنداي سارىنداعى جارنامانىڭ دەنى الماتى، نۇر-سۇلتان، قاراعاندى، پەتروپاۆل، قوستاناي، وسكەمەن، قاراعاندى سەكىلدى قالالاردان.
بۇل ءىس-ارەكەتتىڭ قانشالىقتى زاڭدى؟ جالپى جسن-ءدى ينتەرنەتتە اشىق ساۋدالاۋدىڭ سالدارى قانداي؟ بەلگىلى زاڭگەر كاميشا ەسمۇحامبەتقىزى بۇل ارەكەت مۇلدە زاڭسىز دەپ ەسەپتەيدى.
«مۇنداي قىزمەت تۇرلەرىن زاڭدى تىركەلگەن ورگان اتقارۋ كەرەك نەمەسە سەنىمحات ارقىلى جۇزەگە اسۋى كەرەك. وزگە تۇلعاعا قاتىستى جەكە مالىمەتتەرگە قول سۇعۋعا تىيىم سالىنعان. بۇل – الاياقتىق ارەكەتتەردىڭ كورىنىسى»، — دەيدى زاڭگەر.
شەتەلدىك ازاماتتار جسن-ءدى قانداي جاعدايدا الۋى ءتيىس؟
قازاقستان زاڭدارى مىنا جاعدايدا شەتەلدىكتەردىڭ جسن الۋعا مىندەتتى ەكەنىن كورسەتەدى:
- قازاقستان بانكتەرىندە اعىمداعى ەسەپشوت اشقاندا;
- شەتەلدىك قازاقستان اۋماعىندا تابىس تاپقاندا;
- قازاقستان اۋماعىندا ساتىپ العان جىلجىمالى مۇلىككە سالىق تولەۋگە مىندەتتى بولعاندا;
- قازاقستاندا تىركەلگەن زاڭدى تۇلعا — كومپانيانىڭ باسشىسى بولىپ تاعايىندالعاندا;
- شەتەلدىك ازامات باسقا ەلدە تىركەلگەن زاڭدى تۇلعانىڭ قازاقستانداعى فيليالىنىڭ، وكىلدىگىنىڭ باسشىسى بولىپ تاعايىندالعاندا.
“ادىرنا” ۇلتتىق پورتالى
