Onlaın habarlama, jarnama berýge arnalǵan OLX platformasynyń Qazaqstandaǵy segmentinde sheteldikterge, onyń ishinde RF azamattaryna, zańdy tulǵalaryna «Qazaqstan JSN-in (jeke sáıkestendirý nómiri) jáne BSN (bıznes sáıkestendirý nómiri) alýǵa kómektesemin» deıtin jarnama paıda boldy, dep habarlaıdy “Adyrna” ulttyq portaly 7kun.kz saıtyna silteme jasap.
Mundaı jarnamalardyń deni naýryz jáne sáýir aılarynda shyqqan. Jarnama mátininde 1000 rýblge nemese 5500-6000 teńgege eki kún ishinde qazaqstandyq JSN jasap beremiz delingen.
Odan bólek reseılikter úshin qujat rásimdeý, JShS (jaýapkershiligi shekteýli seriktestik), JK (jeke kásipkerlik) ashý, bankten esepshot ashý, karta jasaý sekildi qyzmetter usynǵan jarnama kóp. Osyndaı saryndaǵy jarnamanyń deni Almaty, Nur-Sultan, Qaraǵandy, Petropavl, Qostanaı, Óskemen, Qaraǵandy sekildi qalalardan.
Bul is-árekettiń qanshalyqty zańdy? Jalpy JSN-di ınternette ashyq saýdalaýdyń saldary qandaı? Belgili zańger Kamısha Esmuhambetqyzy bul áreket múlde zańsyz dep esepteıdi.
«Mundaı qyzmet túrlerin zańdy tirkelgen organ atqarý kerek nemese senimhat arqyly júzege asýy kerek. Ózge tulǵaǵa qatysty jeke málimetterge qol suǵýǵa tyıym salynǵan. Bul – alaıaqtyq áreketterdiń kórinisi», — deıdi zańger.
Sheteldik azamattar JSN-di qandaı jaǵdaıda alýy tıis?
Qazaqstan zańdary myna jaǵdaıda sheteldikterdiń JSN alýǵa mindetti ekenin kórsetedi:
- Qazaqstan bankterinde aǵymdaǵy esepshot ashqanda;
- Sheteldik Qazaqstan aýmaǵynda tabys tapqanda;
- Qazaqstan aýmaǵynda satyp alǵan jyljymaly múlikke salyq tóleýge mindetti bolǵanda;
- Qazaqstanda tirkelgen zańdy tulǵa — kompanııanyń basshysy bolyp taǵaıyndalǵanda;
- Sheteldik azamat basqa elde tirkelgen zańdy tulǵanyń Qazaqstandaǵy fılıalynyń, ókildiginiń basshysy bolyp taǵaıyndalǵanda.
“Adyrna” ulttyq portaly
