«ۇمىتىلعان باتىرلار» جوباسى اياسىندا جاڭا دەرەكتەر تابىلدى. وعان سايكەس، II دۇنيەجۇزىلىك سوعىس كەزىندە جۇزدەگەن قازاقتى كەڭەس باتىرى اتاعىنا ۇسىنعان. اتالعان ماراپاتقا ەكى رەت ۇسىنىلعان جاۋىنگەرلەر دە بار، دەپ حابارلايدى قازاقپارات ءتىلشىسى.
«قاسيەتتى قازاقستان» عىلىمي-زەرتتەۋ ورتالىعىنىڭ باسشىسى بەرىك ابدىعاليۇلىنىڭ ايتۋىنشا، II دۇنيەجۇزىلىك سوعىستىڭ تاريحىندا ءالى ءبىراز اقتانداقتار بار. سونىڭ ءبىرى - قازاق ازاماتتارىنىڭ مايدانداعى ەرلىگى ءۇشىن لايىقتى ماراپاتىن الا الماعانى.
«ولاردى كەڭەس باتىرى اتاعىنا ۇسىنعان. بىراق ءارتۇرلى سەبەپتەرمەن ول اتاقتى بەرمەگەن. ونداي ازاماتتار كوپ. مىسالى، سنايپەر تولەۋعالي ابدىبەكوۆتى ءبارى بىلەدى. ول 400-گە جۋىق دۇشپاندى ولتىرگەن. سوسىن تانكيست جۇماش احمەتوۆ بار. بىلتىر عانا ونداي ازاماتتاردىڭ سانى 14-15 ادام دەپ ويلاعانبىز. قازىر ءبىراز جاڭا دەرەكتەر شىعىپ جاتىر. سوعان سايكەس، 100-دەن استام جەرلەسىمىز ەرەكشە ەرلىك كورسەتىپ، كەڭەس باتىرى اتاعىنا ۇسىنىلسا دا، الا الماعان. ولاردىڭ ىشىندە ەكى رەت ۇسىنىلعاندار دا بار. سوندا دا بەرىلمەدى»، - دەدى ب.ابدىعاليۇلى جۋرناليستەرگە بەرگەن سۇحباتىندا.
ونىڭ ايتۋىنشا، قازاقتىڭ جۇزدەگەن باتىرى كەزىندە لايىقتى اتاعىن الماسا دا، ەندىگى كەزەكتە ولاردىڭ ەرلىگىن ۇمىتپاي، جەرلەستەرىنە، تۋعان-تۋىستارىنا جەتكىزۋ كەرەك.
«ارينە، ءبىز ولاردىڭ بارلىعىنا حالىق قاھارمانى اتاعىن بەرە المايمىز. بىراق جاساعان ەرلىكتەرىن جەرلەستەرى، ۇرپاقتارى ءبىلسىن دەپ، اتالعان باستامانى قولعا الدىق. سەبەبى باتىرلارىمىزدىڭ كوبىسى سول سۇراپىل سوعىستا قازا بولعان. وتانىنا قايتىپ كەلگەن دە شىعار. ءبىز ونى انىق بىلمەيمىز. بىراق وسى جەردەگى تۋعان-تۋىستارى ءوز اتاسىنىڭ كەڭەس باتىرى اتاعىنا ۇسىنىلعانىن بىلە مە؟ كوبىسى بىلمەي جاتادى. مىسالى، تانكيست جۇماش احمەتوۆتىڭ تۋىستارى ءالى تابىلماي جاتىر. ەندى، ول كىسى اسكەرگە ينتەرناتتان شاقىرىلعان عوي. ءوزى ۇلىتاۋدىڭ قارساقپايىنان سوعىسقا اتتاندى. بىراق ءبىز ونىڭ تۋىستارىن تابا المادىق. الداعى ۋاقىتتا بارلىق باتىرلارىمىزدىڭ ءتىزىمىن عالامتوردا جاريالايمىز. باسقا جولدار ارقىلى ىزدەيمىز. سەبەبى ولاردىڭ تۋعان-تۋىسقاندارى ءوز اتاسىنىڭ ەرلىگىن ءبىلۋى كەرەك»، - دەپ اتاپ كورسەتتى ب.ابدىعاليۇلى.
«ۇمىتىلعان باتىرلاردىڭ» تۋعان-تۋىستارىن ىزدەستىرۋ جۇمىستارىنا «نۇر وتان» پارتياسى دا اتسالىسادى. «پارتيا ءتىزىم بويىنشا بارلىق تۋىستارىن انىقتاۋعا كومەكتەسەدى. ەرتەڭ، 8-9 كۇندەرى ول اكتسيا تۋرالى جاريالانادى. «نۇر وتان» پارتياسى ءوز فيليالدارى ارقىلى ىزدەستىرۋ جۇمىستارىن جۇرگىزەدى. بىزدە ءتىزىم دە، ءاربىر ادامنىڭ ناگرادالىق پاراعى دا بار. سونىڭ ءبارىن تۋعان-تۋىستارىنا تاپسىرىپ، جەرگىلىكتى اكىمشىلىكتەرىمەن بىرگە ولاردىڭ ەسىمدەرىن ساقتاۋعا اتسالىسامىز دەپ جوسپارلاپ وتىرمىز. اتىن كوشەگە بەرە مە، مەكتەپكە بەرە مە، باتىرلارىمىز ەسىمدەرى ۇمىتىلماۋى ءتيىس»، - دەيدى ب.ابدىعاليۇلى.
____________________________________________________________________________________________________________
inform.kz
