«Ūmytylǧan batyrlar» jobasy aiasynda jaŋa derekter tabyldy. Oǧan säikes, II Düniejüzılık soǧys kezınde jüzdegen qazaqty Keŋes batyry ataǧyna ūsynǧan. Atalǧan marapatqa ekı ret ūsynylǧan jauyngerler de bar, dep habarlaidy QazAqparat tılşısı.
«Qasiettı Qazaqstan» ǧylymi-zertteu ortalyǧynyŋ basşysy Berık Äbdıǧaliūlynyŋ aituynşa, II Düniejüzılık soǧystyŋ tarihynda älı bıraz aqtandaqtar bar. Sonyŋ bırı - qazaq azamattarynyŋ maidandaǧy erlıgı üşın laiyqty marapatyn ala almaǧany.
«Olardy Keŋes batyry ataǧyna ūsynǧan. Bıraq ärtürlı sebeptermen ol ataqty bermegen. Ondai azamattar köp. Mysaly, snaiper Töleuǧali Äbdıbekovtı bärı bıledı. Ol 400-ge juyq dūşpandy öltırgen. Sosyn tankist Jūmaş Ahmetov bar. Byltyr ǧana ondai azamattardyŋ sany 14-15 adam dep oilaǧanbyz. Qazır bıraz jaŋa derekter şyǧyp jatyr. Soǧan säikes, 100-den astam jerlesımız erekşe erlık körsetıp, Keŋes batyry ataǧyna ūsynylsa da, ala almaǧan. Olardyŋ ışınde ekı ret ūsynylǧandar da bar. Sonda da berılmedı», - dedı B.Äbdıǧaliūly jurnalisterge bergen sūhbatynda.
Onyŋ aituynşa, qazaqtyŋ jüzdegen batyry kezınde laiyqty ataǧyn almasa da, endıgı kezekte olardyŋ erlıgın ūmytpai, jerlesterıne, tuǧan-tuystaryna jetkızu kerek.
«Ärine, bız olardyŋ barlyǧyna Halyq Qaharmany ataǧyn bere almaimyz. Bıraq jasaǧan erlıkterın jerlesterı, ūrpaqtary bılsın dep, atalǧan bastamany qolǧa aldyq. Sebebı batyrlarymyzdyŋ köbısı sol sūrapyl soǧysta qaza bolǧan. Otanyna qaityp kelgen de şyǧar. Bız ony anyq bılmeimız. Bıraq osy jerdegı tuǧan-tuystary öz atasynyŋ Keŋes batyry ataǧyna ūsynylǧanyn bıle me? Köbısı bılmei jatady. Mysaly, tankist Jūmaş Ahmetovtyŋ tuystary älı tabylmai jatyr. Endı, ol kısı äskerge internattan şaqyrylǧan ǧoi. Özı Ūlytaudyŋ Qarsaqpaiynan soǧysqa attandy. Bıraq bız onyŋ tuystaryn taba almadyq. Aldaǧy uaqytta barlyq batyrlarymyzdyŋ tızımın ǧalamtorda jariialaimyz. Basqa joldar arqyly ızdeimız. Sebebı olardyŋ tuǧan-tuysqandary öz atasynyŋ erlıgın bıluı kerek», - dep atap körsettı B.Äbdıǧaliūly.
«Ūmytylǧan batyrlardyŋ» tuǧan-tuystaryn ızdestıru jūmystaryna «Nūr Otan» partiiasy da atsalysady. «Partiia tızım boiynşa barlyq tuystaryn anyqtauǧa kömektesedı. Erteŋ, 8-9 künderı ol aksiia turaly jariialanady. «Nūr Otan» partiiasy öz filialdary arqyly ızdestıru jūmystaryn jürgızedı. Bızde tızım de, ärbır adamnyŋ nagradalyq paraǧy da bar. Sonyŋ bärın tuǧan-tuystaryna tapsyryp, jergılıktı äkımşılıkterımen bırge olardyŋ esımderın saqtauǧa atsalysamyz dep josparlap otyrmyz. Atyn köşege bere me, mektepke bere me, batyrlarymyz esımderı ūmytylmauy tiıs», - deidı B.Äbdıǧaliūly.
____________________________________________________________________________________________________________
inform.kz
Ūqsas jaŋalyqtar
