«Umytylǵan batyrlar» jobasy aıasynda jańa derekter tabyldy. Oǵan sáıkes, II Dúnıejúzilik soǵys kezinde júzdegen qazaqty Keńes batyry ataǵyna usynǵan. Atalǵan marapatqa eki ret usynylǵan jaýyngerler de bar, dep habarlaıdy QazAqparat tilshisi.
«Qasıetti Qazaqstan» ǵylymı-zertteý ortalyǵynyń basshysy Berik Ábdiǵalıulynyń aıtýynsha, II Dúnıejúzilik soǵystyń tarıhynda áli biraz aqtandaqtar bar. Sonyń biri - qazaq azamattarynyń maıdandaǵy erligi úshin laıyqty marapatyn ala almaǵany.
«Olardy Keńes batyry ataǵyna usynǵan. Biraq ártúrli sebeptermen ol ataqty bermegen. Ondaı azamattar kóp. Mysaly, snaıper Tóleýǵalı Ábdibekovti bári biledi. Ol 400-ge jýyq dushpandy óltirgen. Sosyn tankıst Jumash Ahmetov bar. Byltyr ǵana ondaı azamattardyń sany 14-15 adam dep oılaǵanbyz. Qazir biraz jańa derekter shyǵyp jatyr. Soǵan sáıkes, 100-den astam jerlesimiz erekshe erlik kórsetip, Keńes batyry ataǵyna usynylsa da, ala almaǵan. Olardyń ishinde eki ret usynylǵandar da bar. Sonda da berilmedi», - dedi B.Ábdiǵalıuly jýrnalısterge bergen suhbatynda.
Onyń aıtýynsha, qazaqtyń júzdegen batyry kezinde laıyqty ataǵyn almasa da, endigi kezekte olardyń erligin umytpaı, jerlesterine, týǵan-týystaryna jetkizý kerek.
«Árıne, biz olardyń barlyǵyna Halyq Qaharmany ataǵyn bere almaımyz. Biraq jasaǵan erlikterin jerlesteri, urpaqtary bilsin dep, atalǵan bastamany qolǵa aldyq. Sebebi batyrlarymyzdyń kóbisi sol surapyl soǵysta qaza bolǵan. Otanyna qaıtyp kelgen de shyǵar. Biz ony anyq bilmeımiz. Biraq osy jerdegi týǵan-týystary óz atasynyń Keńes batyry ataǵyna usynylǵanyn bile me? Kóbisi bilmeı jatady. Mysaly, tankıst Jumash Ahmetovtyń týystary áli tabylmaı jatyr. Endi, ol kisi áskerge ınternattan shaqyrylǵan ǵoı. Ózi Ulytaýdyń Qarsaqpaıynan soǵysqa attandy. Biraq biz onyń týystaryn taba almadyq. Aldaǵy ýaqytta barlyq batyrlarymyzdyń tizimin ǵalamtorda jarııalaımyz. Basqa joldar arqyly izdeımiz. Sebebi olardyń týǵan-týysqandary óz atasynyń erligin bilýi kerek», - dep atap kórsetti B.Ábdiǵalıuly.
«Umytylǵan batyrlardyń» týǵan-týystaryn izdestirý jumystaryna «Nur Otan» partııasy da atsalysady. «Partııa tizim boıynsha barlyq týystaryn anyqtaýǵa kómektesedi. Erteń, 8-9 kúnderi ol akııa týraly jarııalanady. «Nur Otan» partııasy óz fılıaldary arqyly izdestirý jumystaryn júrgizedi. Bizde tizim de, árbir adamnyń nagradalyq paraǵy da bar. Sonyń bárin týǵan-týystaryna tapsyryp, jergilikti ákimshilikterimen birge olardyń esimderin saqtaýǵa atsalysamyz dep josparlap otyrmyz. Atyn kóshege bere me, mektepke bere me, batyrlarymyz esimderi umytylmaýy tıis», - deıdi B.Ábdiǵalıuly.
____________________________________________________________________________________________________________
inform.kz
