پاۆلوداردا مەكتەپتەگى ءورت سالدارىنان 500-گە جۋىق ادام ەۆاكۋاتسيالانىپ، بەس ادام اۋرۋحاناعا جاتقىزىلدى. بۇل تۋرالى پاۆلودار وبلىسىنىڭ توتەنشە جاعدايلار دەپارتامەنتىنىڭ مالىمدەدى، دەپ حابارلايدى “ادىرنا” ۇلتتىق پورتالى.
پاۆلودار وبلىسىنىڭ توتەنشە جاعدايلار دەپارتامەنتىنىڭ مالىمدەۋىنشە، 15 ءساۋىر كۇنى ساعات 11.00-دە مالايسارى باتىر كوشەسىنىڭ بويىندا ورنالاسقان №1 ورتا مەكتەپتىڭ ءۇشىنشى قاباتىنداعى كىتاپ قويماسى ورتەندى.
«ءۇشىنشى قاباتتاعى كىتاپ ساقتاۋ كابينەتىندە 15 شارشى مەتر الاڭدا جيھاز، كىتاپ جانعان. ءورت ءسوندىرۋ بولىمشەسى كەلگەنگە دەيىن 479 ادام، ونىڭ ىشىندە 414 بالا سىرتقا شىعارىلدى. ساعات 11:41-دە ءورت ءسوندىرىلدى»، – دەدى پاۆلودار وبلىسى توتەنشە جاعدايلار دەپارتامەنتىنىڭ باستىعى گەنەرال-مايور ج. جۇماشەۆ.
ءورت ءسوندىرۋ ورنىندا تجد-ءنىڭ 35 قىزمەتكەرى جانە 9 تەحنيكا، اپاتتىق مەديتسينا ورتالىعىنان 4 قىزمەتكەر جانە 1 تەحنيكا جۇمىلدىرىلدى. ءورتتىڭ نەدەن شىققانى انىقتالىپ جاتىر.
وبلىستىق دەنساۋلىق ساقتاۋ باسقارماسىنىڭ مالىمەتىنشە، بەس وقۋشى جەدەل جاردەممەن اۋرۋحاناعا جەتكىزىلدى. 2008 جىلى تۋعان قىز بالا «جەڭىل دارەجەدە جانۋ زاتتارىمەن ۋلانۋ» جانە 2007 جىلعى قىز «سترەسسكە ءجىتى رەاكتسيا» دياگنوزىمەن قارالىپ، اتا-انالارىنا تاپسىرىلدى.
«سونداي-اق، 2005 جانە 2006 جىلى تۋعان ءۇش قىزدا «كومىرقىشقىل گازىنىڭ ۋىتتى اسەرى» تىركەلدى»، – دەدى باسقارمادا.
وقۋشىلار 15 ءساۋىر كۇنى ساعات 12.15-تە وبلىستىق بالالار اۋرۋحاناسىنىڭ قابىلداۋ بولىمىنە جەتكىزىلدى. كەزەكشى پەدياتر قاراپ شىققاننان كەيىن شۇعىل تۇردە سوماتيكالىق بولىمشەگە جاتقىزىلعان. اۋرۋحاناعا تۇسكەن كەزدە گازبەن ۋلانۋ سالدارىنان بالالاردىڭ جاعدايى ورتاشا اۋىر بولعان.
”ادىرنا” ۇلتتىق پورتالى
