“استاناەنەرگوسبىت” جشس-نا 6 ملن تەڭگە ايىپپۇل سالىناتىن بولدى. تابيعي مونوپوليالاردى رەتتەۋ كوميتەتى «استاناەنەرگوسبىت» جشس-نىڭ جۇمىسىنا تەكسەرىس جۇرگىزىپ، بىرقاتار زاڭ بۇزۋشىلىقتاردى انىقتادى، دەپ حابارلايدى “ادىرنا” ۇلتتىق پورتالى.
ەلوردا تۇرعىندارى سوڭعى ايلاردا كوممۋنالدىق تولەم كۆيتانتسيالارىندا كورسەتىلگەن ەلەكتر ەنەرگياسىن پايدالانعانى ءۇشىن تولەمدەردىڭ ءوسۋىن بايقاعان. وسى ماسەلەمەن تابيعي مونوپوليالاردى رەتتەۋ كوميتەتىنە قىزمەت كورسەتۋشىنىڭ جۇمىسىن تەكسەرۋگە ءوتىنىش بەرگەن.
«استانالىق تۇتىنۋشىلار ءوتىنىشى نەگىزىندە قر ۇەم تابيعي مونوپوليالاردى رەتتەۋ كوميتەتى نۇر-سۇلتان قالاسى بويىنشا اۋماقتىق دەپارتامەنتپەن بىرىگىپ، «استاناەنەرگوسبىت» جشس-نا قاتىستى ەلەكترمەن جابدىقتاۋ قىزمەتتەرى ءۇشىن تولەمگە كوتەرىڭكى شوتتار قويۋدىڭ نەگىزدىلىگى تۇرعىسىنان جوسپاردان تىس تەكسەرۋ وتكىزدى»، – دەلىنگەن حابارلامادا.
كوميتەت ءباسپاسوز قىزمەتىنىڭ مالىمەتىنشە، مەكەمە استانالىقتارعا ەلەكتر ەنەرگياسىن پايدالانعانى ءۇشىن تولەمدەردى نەگىزسىز وسىرگەنى بەلگىلى بولدى.
«استاناەنەرگوسبىت» جشس ارەكەتتەرىن تەكسەرۋ قورىتىندىلارى بويىنشا ەلەكتر ەنەرگياسىن تۇتىنۋ كولەمىنە بايلانىستى تاريفتەردى سارالاۋ كەزىندە تولەم سومالارىن ەسەپتەۋ ءتارتىبىن بۇزۋ انىقتالدى. بۇل تۇتىنۋشىلارعا تولەمگە قويىلعان نەگىزسىز جوعارى سومالارعا الىپ كەلدى. تەكسەرۋ بارىسىندا جۇگىنگەن 56 تۇتىنۋشىنىڭ 32-سىنە 129 مىڭ تەڭگە مولشەرىندە نەگىزسىز سوما قويىلعانى انىقتالدى. مىسالى، تۇتىنۋشىلاردىڭ ءبىرى بويىنشا ءتورت ايدا ارتىق تولەمنىڭ جالپى سوماسى 17 مىڭ تەڭگە بولعان (نۇر-سۇلتان قالاسىنىڭ تۇتىنۋشىلاردىڭ كۆت/ساع ءۇشىن 4,5 مىڭ تەڭگە مولشەرىندە اي سايىنعى ورتاشا تولەم كەزىندە)»، – دەلىنگەن حابارلامادا.
مەكەمەگە قاتىستى قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 167-بابى بويىنشا اكىمشىلىك ءىس قوزعالعان. وعان سايكەس، 2000 اەك نەمەسە 6 ميلليون تەڭگەدەن جوعارى مولشەردە ايىپپۇل كوزدەلگەن.
سونداي-اق، «استاناەنەرگوسبىت» جشس-نىڭ اتىنا ەلەكتر ەنەرگياسىن تولەۋ سوماسى زاڭسىز ەسەپتەلگەن ەلوردانىڭ بارلىق تۇتىنۋشىلارىنا تولەم سوماسىن قايتا ەسەپتەۋدى جۇرگىزۋ ارقىلى جول بەرىلگەن زاڭبۇزۋشىلىقتاردى مىندەتتى تۇردە جويۋ تۋرالى نۇسقاما ەنگىزىلگەن.
«تۇتىنۋشىلار ۇسىنىلعان شوتتاردىڭ نەگىزسىز ارتىق كوتەرىلگەنىن انىقتاعان جاعدايدا، قايتا ەسەپتەۋ جۇرگىزۋ ءۇشىن «استاناەنەرگوسبىت» جشس-نىڭ اتىنا جۇگىنۋگە قۇقىلى. «استاناەنەرگوسبىت» جشس-نىڭ تاراپىنان قايتا ەسەپتەۋدەن نەگىزسىز باس تارتقان جاعدايدا، تۇتىنۋشىلار قازاقستان رەسپۋبليكاسى ۇلتتىق ەكونوميكا مينيسترلىگى تابيعي مونوپوليالاردى رەتتەۋ كوميتەتىنىڭ نۇر-سۇلتان قالاسى بويىنشا دەپارتامەنتىنە جۇگىنۋىنە بولادى»، – دەلىنگەن حابارلامادا.
”ادىرنا” ۇلتتىق پورتالى
