15 ءساۋىر - عاشىقتار كۇنى!

2676
Adyrna.kz Telegram

بۇگىن 15 ءساۋىر ەلىمىزدە عاشىقتار كۇنى تويلانادى. بۇل رەسمي مەرەكە بولماعانىمەن، جاستار اراسىندا كەيىنگى جىلدارى كەڭ تانىلعان. مەرەكە قازاق ليرو-ەپوستىق جىرىنىڭ كەيىپكەرى قوزى كورپەش پەن بايان سۇلۋدىڭ قۇرمەتىنە ارنالعان.

"قوزى كورپەش – بايان سۇلۋ" داستانى قازاق حالقىنىڭ ەڭ كونە، ەل اراسىندا كوپ تاراعان جىردىڭ ءبىرى سانالادى. "قوزى كورپەش – بايان سۇلۋ" جىرى تەك قازاق اراسىندا عانا ەمەس، سوۆەت وداعىنىڭ كوپتەگەن حالقىندا دا مول تاراعان. جىردىڭ ءبىر نۇسقاسىندا قاراباي مەن سارىباي اڭعا شىعادى. ەكەۋى قۇدا بولامىز دەپ كەلىسەدى.

كەيىننەن قوزى جەتىم قالىپ، جالقى ءوسىپ، كەيىن عانا بايان اتتى قالىڭدىعىنىڭ بار ەكەنىن بىلەدى. ونى ىزدەپ شىققان ساپارىندا كوپ قيىندىقتى جەڭىپ، اقىرى قايىن جۇرتىنا بارادى. قوزى سارىبايدىڭ ەلىنە كەلگەن سوڭ ءبىراز ۋاقىت تازشا بولىپ جۇرەدى. بايانمەن كەزدەسىپ، وعان وڭاشادا ءوزىنىڭ كىم ەكەنىن بىلدىرەدى. ەكەۋى كوڭىل قوسىپ تابىسادى. بىراق ولاردىڭ سىرىن قودار ءبىلىپ قويىپ، قايتسە دە قوزىدان قۇتىلۋدىڭ جولىن ىزدەيدى.

ارىقى قاپىلىستا ونى وققا ۇشىرادى. قوزى كورپەشتىڭ كەگىن قۋعان بايان سۇلۋ قوداردى ايلامەن ولتىرەدى، عاشىق جارىنىڭ مولاسىنا كەلىپ ءوزىن-ءوزى قانجارمەن جارىپ ولەدى. كەيىننەن قوس عاشىقتىق ماحابباتىنا دالەل رەتىندە كۇمبەز قويىلعان.

مازار شىعىس قازاقستان وبلىسى اياگوز اۋدانى تاڭسىق تەمىرجول بەكەتىنەن 10 شاقىرىمداي جەردە، اياگوز وزەنىنىڭ بويىندا ورنالاسقان. بيىكتىگى – 12 مەترگە جۋىق. قابىرعاسى گرانيت قالاق تاس پەن سابان ارالاس بالشىقتان قالانعان. ەسىگى كۇنشىعىسقا قاراپ تۇر. ەسكەرتكىشتىڭ تۇرعىزىلعان ۋاقىتى تۋرالى ءارتۇرلى پىكىر بار.

ءبىر زەرتتەۋشىلەر V-X عاسىردا كوتەرىلگەن دەسە، ەندى ءبىرى X-XI عاسىردا ورناتىلعاندىعى تۋرالى ايتادى. رادلوۆتىڭ دەرەگى بويىنشا، قوزى كورپەش – بايان سۇلۋ اڭىزى بويىنشا ونى تۇرعىزۋعا سارىبايدىڭ ءىنىسى تايلاق بي توبىل وزەنى بويىنان اياگوگە ءتورت سان قول كىسى جىبەرىپ، اس بەرگىزىپ، ات شاپتىرىپ، توي جاسايدى.

قوزى كورپەش – بايان سۇلۋدىڭ كۇمبەزىن بەرىك ەتىپ تۇرعىزىپ، ەكەۋىنىڭ كەسكىن-كەلبەتىن تاسقا تۇسىرەدى. اسىرەسە بايان سۇلۋدىڭ ءوڭ-اجارىن ادەمىلەپ كەلتىرەدى. ال 1856 جىلى شوقان ىستىقكولگە ساياحاتقا بارا جاتىپ قوزى كورپەش كەشەنىن ادەمىلەپ سۋرەتكە سالماقشى بولادى.

"مەن اياگوزدى سونداي سۇيەمىن، سونداي قادىرلەيمىن، وعان سۇلۋ باياننىڭ التىن شاشتى قوزى كورپەشكە عاشىق بولعان اڭىزى اسەر ەتەتىن بولۋ كەرەك، ولاردىڭ ماحاببات جولىنداعى ارەكەتى وسى وزەننىڭ بويىندا وتكەن", دەپ وزىنىڭ كۇندەلىك داپتەرىندە دە جازعان.

بارشا عاشىقتاردى مەرەكەمەن “ادىرنا” ۇلتتىق پورتالى شىن جۇرەكتەن قۇتتىقتايدى! 

“ادىرنا” ۇلتتىق پورتالى

پىكىرلەر