رەسەيلىك كومپانيا قازاقستاننان بانك كارتالارىن اشىپ، ولارعا اقشا اۋداراتىن قازاقستاندىقتاردى ىزدەپ جاتىر، دەپ حابارلايدى "ادىرنا" ۇلتتىق پورتالى arbat.media-عا سىلتەمە جاساپ.
ءتيىستى بوس ورىن HeadHunter سايتىندا پايدا بولدى. وندا كومپانيانىڭ قارجىنى باتىستىق كليەنتتەردەن العانى ايتىلعان. رەسەيگە قارسى سانكتسيالارعا بايلانىستى بانكتىك SWIFT * اۋدارىمدارى رەسەي فەدەراتسياسىنىڭ اۋماعىندا جۇمىسىن توقتاتتى، سوندىقتان ولار «وسى جۇيە جۇمىس ىستەيتىن قازاقستانداعى سەرىكتەستەرىمىز ارقىلى جاساۋدى» شەشتى.
قىزمەتكەردىڭ مىندەتتەرىنىڭ تىزىمىنە قازاقستاندىق بانك كارتاسىن جاساۋ جانە ونى تەلەفون نومىرىنە بايلاۋ كىرەدى. بۇل تاپسىرما ءۇشىن كومپانيا 5 000 رۋبل (27 000 تەڭگە) تولەۋگە دايىن. سونداي-اق، قىزمەتكەر بولاشاقتا بانكپەن تۋىنداعان ماسەلەلەردى شەشكەنى ءۇشىن اي سايىن 1000 رۋبل (5 000 تەڭگە) الادى.
ەسكە سالايىق، 27 اقپانعا قاراعان ءتۇنى ەۋروكوميسسيا توراعاسى ۋرسۋلا فون دەر لەيەن ەۋرووداق باسشىلارى رەسەيلىك بانكتەردى SWIFT جۇيەسىنەن اجىراتۋ تۋرالى شەشىم قابىلداعانىن ايتقان بولاتىن.
1 ناۋرىزدا قازاقستان رەسپۋبليكاسى ۇلتتىق بانكىنىڭ توراعاسى عالىمجان ءپىرماتوۆ قازاقستان رەسەيمەن ءوزارا ەسەپ ايىرىسۋدىڭ SWIFT جۇيەسىنىڭ ورنىنا باسقا تەتىكتەردى دايىنداعانىن حابارلادى.
ءساۋىردىڭ 1-ءى كۇنى قازاقستان پرەزيدەنتى اكىمشىلىگى باسشىسىنىڭ ءبىرىنشى ورىنباسارى تيمۋر سۇلەيمەنوۆ ەۋروپالىق جۋرناليستەرگە قازاقستان رەسەي فەدەراتسياسىنا قارسى سانكتسيالاردى اينالىپ وتەتىن قۇرالعا اينالمايتىنىن ايتتى.
*SWIFT (Society for Worldwide Interbank Financial Telecommunications) — الەمدەگى ەڭ ءىرى بانكارالىق بايلانىس جۇيەسى. ونىڭ كومەگىمەن دۇنيە ءجۇزىنىڭ بانكتەرى ءبىر-بىرىنە اۋدارىمدار مەن تولەمدەر تۋرالى دەرەكتەردى جەدەل تۇردە تاسىمالدايدى.
"ادىرنا" ۇلتتىق پورتالى
