بۇگىن جەتىنشى شاقىرىلىمداعى شىمكەنت قالاسى ءماسليحاتىنىڭ كەزەكتى ون ءتورتىنشى سەسسياسى ءوتىپ، وعان شىمكەنت قالاسىنىڭ اكىمى مۇرات ايتەنوۆ قاتىستى.
سەسسيادا دەپۋتاتتار قالا بيۋدجەتىن ناقتىلاۋ تۋرالى شەشىم قابىلدادى. ناقتىراق ايتار بولساق، شىمكەنت قالاسىنىڭ 2022 جىلعا ارنالعان بيۋدجەتىنىڭ شىعىس بولىگى 14 ميلليارد 400 ميلليون تەڭگەگە ۇلعايىپ، 488.4 ميلليارد تەڭگە بولىپ بەكىتىلدى.
بيۋدجەتكە ەنگىزىلگەن قوسىمشا قارجى نەگىزىنەن قالا تۇرعىندارىنىڭ قاۋىپسىزدىگىن قامتاماسىز ەتۋگە، ينفراقۇرىلىم مەن ينجەنەرلىك-كوممۋنيكاتسيالىق جۇيەلەردى دامىتۋعا، شاھارداعى يرريگاتسيالىق جۇيەلەردى قالپىنا كەلتىرۋگە باعىتتالادى.
ايتا كەتەيىك، سەسسيا جۇمىسىنا قالالىق ءماسليحاتتىڭ حاتشىسى باحادىر نارىمبەتوۆ توراعالىق ەتتى. وندا دەپۋتاتتار قالانىڭ الەۋمەتتىك-ەكونوميكالىق دامۋىنا وڭ ىقپال ەتەتىن وزگە دە ماسەلەلەردى قاراپ، شەشىم قابىلدادى. اتاپ ايتقاندا، جەر ۋچاسكەلەرىنىڭ بازالىق ستاۆكالارىن بەلگىلەۋ، باعالاۋ تولەماقىسىنىڭ كوەففيتسيەنتتەرىن بەكىتۋ جانە جەر سالىعىنىڭ بازالىق مولشەرلەمەلەرىن تۇزەتۋ تۋرالى شەشىمدەر قابىلدادىندى.
مۇنان بولەك دەپۋتاتتار قالا اكىمدىگىنىڭ سالالىق باسقارمالارىنىڭ جانە قۇقىق قورعاۋ ورگاندارىنىڭ تۇرعىنداردى باسپانامەن قامتاماسىز ەتۋ، قولايلى ينۆەستيتسيالىق احۋال قالىپتاستىرۋ جانە قاۋىپسىزدىك ماسەلەلەرى بويىنشا اتقارعان جۇمىستارىنىڭ ەسەبىن تىڭدادى.
جيىن سوڭىندا قالا اكىمى م.ايتەنوۆ قورتىندى ءسوز سويلەپ، حالىق قالاۋلىلارىنا قالانى دامىتۋ باعىتىنداعى بىرلەسكەن ناتيجەلى جۇمىسى جانە ءتيىمدى ءارى ماڭىزدى شەشىمدەر قابىلداعانى ءۇشىن العىسىن ءبىلدىردى.
