شىمكەنتتىك دارىگەرلەر باۋىر ىسىگىنە جاڭا ادىسپەن وتا جاسادى

2176
Adyrna.kz Telegram

ءۇشىنشى مەگاپوليستىڭ دارىگەرلەرى باۋىر ىسىگى دياگنوزى قويىلعان ناۋقاستارعا جاڭا ادىسپەن وتا جاساۋدى مەڭگەرۋدە. ءينۆازيۆتى ەندوۆاسكۋليارلىق ءادىس ەلىمىزدە ەكىنشى بولىپ شىمكەنت قالاسىندا جاسالدى.

№2 اۋرۋحانادا باۋىر تسيرروزى دياگنوزى قويىلعان ناۋقاستىڭ اسقازان جانە وڭەش ۆەنالارىنىڭ ۆاريكوزدى كەڭەيۋى «CARTO» ادىسىمەن بايلاندى.

– باۋىر تسيرروزىندا ءپورتالدى گيپەرتەنزيا، اسقازان جانە وڭەش ۆەنالارىنىڭ كەڭەيۋى قاۋىپتى اسقىنۋلاردىڭ ءبىرى سانالادى. سونىڭ سالدارىنان قان كەتىپ، سوڭى قايعىلى جاعدايعا سوقتىرۋى مۇمكىن. ءبىز وتا جاساپ جاتقان ناۋقاستا دا بۇعان دەيىن ەكى رەت قان كەتكەن. ال ونىڭ الدىن الۋدا از ءينۆازيۆتى ەندوۆاسكۋليارلىق ەمدەۋ ەڭ ءتيىمدى ءادىس سانالادى. بۇگىن اۋرۋحانامىزعا ەلوردالىق جوعارى دارەجەلى دارىگەر ەۆگەني مۋن كەلىپ، شەبەرلىك ساباعىن وتكىزۋدە. سودان كەيىن مۇنداي وتانى جەرگىلىكتى ماماندار جۇزەگە اسىراتىن بولادى، – دەدى شىمكەنت قالالىق №2 اۋرۋحانانىڭ رەنتگەن-حيرۋرگ دارىگەرى نۇرجان قاراباەۆ.

ايتا كەتەيىك، بۇل وتا ناركوزسىز، تىلىكسىز جاسالادى. ناۋقاس ەسىن ءبىلىپ، دارىگەرلەر ونىڭ جاي-كۇيىن باقىلاپ، وزىنەن سۇراپ وتىرادى. تەك وعان جەرگىلىكتى اۋىرسىنۋ باساتىن ءدارى سالىنعان. مۇنداي وتا ەلىمىزدە العاش رەت نۇر-سۇلتان قالاسىنىڭ №1 كوپسالالى قالالىق اۋرۋحاناسىندا جاسالعان بولاتىن.

پىكىرلەر