ۇرپاق تاربيەسى – ۇلت بولاشاعى. «ءبىر جىلدىعىن ويلاعان حالىق بيداي ەگەدى، ءجۇز جىلدىعىن ويلاعان حالىق اعاش ەگەدى، مىڭ جىلدىعىن ويلاعان حالىق سانالى ۇرپاق تاربيەلەيدى» دەيدى حالىق دانالىعى. جاس ۇرپاقتىڭ تانىمىن ايقىنداۋ، بويلارىنا ۇلتتىق قۇندىلىقتاردى ءسىڭىرۋ ماقساتىندا «الاتاۋ» ءداستۇرلى ونەر تەاترى ءبىرشاما مەكتەپتەرمەن ءوزارا ىنتىماقتاستىق، مادەني بايلانىستار ورناتتى. تەاتر ديرەكتورى – رينات ريفحاتۇلى زايتوۆ.
بيىل – بالالار جىلى. «الاتاۋ» ءداستۇرلى ونەر تەاترىندا نۇرجان تۋتوۆتىڭ رەجيسسەرلىگىندەگى بالالاردىڭ جاقسىلىق پەن جاماندىق، ادىلدىك تۋرالى كوزقاراستارىن قالىپتاستىرۋ، ياعني قاجەتتى ادامدىق ساپالاردى كورسەتۋدى نەگىزگە العان «اگۋگاي مەن يگيگاي» اتتى حالىق ەرتەگىلەرى مەن ءداستۇرلى اندەردەن قۇرالعان بالالارعا ارنالعان مۋزىكالىق قويىلىم ءجۇرىپ جاتىر.
مەكتەپتەردە اشىق تاربيەلىك ساعاتتاردىڭ وتەتىنى بەلگىلى. «ەگىنشى مەن قاسقىر»، «الداردىڭ ايلاسى»، «كۇي قۇدىرەتى» اتتى تاقىرىپتاردا ءوربيتىن تاپتاۋرىندىقتان ادا وزگەشە وزىندىك فورماعا يە «اگۋگاي مەن يگيگاي» قويىلىمى مەكتەپتەن تىس وقۋشىلارمەن جۇمىس ءۇشىن ۇتىمدى ءارى تاپتىرماس تاربيە قۇرالى.
قويىلىم بايانداۋدان عانا تۇرمايدى. ءان، بي، مۋزىكا قىزىقتىرا تۇسەدى. سونداي-اق پلاستيكا، ميزانستسەنا، دەكوراتسيا، جارىق جانە ت.ب. ءوز دەڭگەيىندە. وقۋشىلاردى ەرتەگى الەمىنە ەندىرەتىن اۋديتوريامەن بايلانىس تا ويلاستىرىلعان.
ەرتەگى ارقىلى بالانى جان-جاقتى تاربيەلەۋدىڭ ماڭىزى زور ەكەنىن استە ۇمىتپايىق!
قۋانىش جۇمابەكۇلى
«الاتاۋ» ءداستۇرلى ونەر تەاترى
ادەبيەت ءبولىمىنىڭ مەڭگەرۋشىسى
