وزبەكستان مينيسترلىگى: وزبەكستان رەسەيگە ۋادە بەرگەن ەمەس

6505
Adyrna.kz Telegram

وزبەكستاننىڭ ينۆەستيتسيالار جانە سىرتقى ساۋدا مينيسترلىگى ماسكەۋگە رەسەيلىك تاۋارلاردى ەۋروپاعا ەكسپورتتاۋ ءۇشىن باج سالىعىنسىز ءدالىز رەتىندە قىزمەت ەتۋدى ۇسىنبادى جانە بۇل تۋرالى رەسەيلىك باق-تا حابارلاۋ نەگىزسىز. بۇل تۋرالى مينيسترلىكتىڭ 25 ناۋرىزداعى رەسمي مالىمدەمەسىندە ايتىلدى، دەپ جازادى "ادىرنا" ۇلتتىق پورتالى. 

بۇعان دەيىن ريا نوۆوستي رەسەيلىك باسىلىمى وزبەكستان رەسپۋبليكاسى ينۆەستيتسيالار جانە سىرتقى ساۋدا مينيسترلىگى جانىنداعى شەتەلدىك ينۆەستيتسيالاردى تارتۋ اگەنتتىگىنىڭ ديرەكتورى ۋلۋگبەك كاسيمحودجاەۆتىڭ تۇسىنىكتەمەسىنە قاتىستى اقپارات تاراتقان بولاتىن، ول باسىلىم مالىمەتىنشە، تاشكەنت ماسكەۋگە رەسەيلىك تاۋارلاردى ەۋروپاعا ەكسپورتتاۋ ءۇشىن باجسىز ءدالىز ۇسىنعان.

اگەنتتىكتىڭ حابارلاۋىنشا، كاسيمحودجاەۆ وزبەكستاندا ەۋروپامەن ساۋدادا ەو-نىڭ «GSP+» كەڭەيتىلگەن پرەفەرەنتسيالار جۇيەسى بار، ماسكەۋ بۇل ارتىقشىلىقتى پايدالانىپ، وزبەكستان ارقىلى ەۋروپاعا ءوز ونىمدەرىن كەدەندىك باج سالىعىن تولەمەي ەكسپورتتاي الادى.

«جاقىندا عانا ينۆەستيتسيالار جانە سىرتقى ساۋدا مينيسترلىگى جۇيەسىندە جۇمىس ىستەي باستاعان ۋلۋگبەك كاسيمحودجاەۆ ريا نوۆوستي باسىلىمى ءجۋرناليستىنىڭ سۇراعىنا تۇسىنىكتەمە بەرە وتىرىپ، "GSP+"جۇيەسىنىڭ جەڭىلدىكتەرى مەن پرەفەرەنتسيالارىن قولدانۋدىڭ پراكتيكالىق اسپەكتىلەرى مەن تەتىكتەرى تۋرالى تولىق حاباردار بولماعانىن حابارلادى. ونىڭ بۇل سالادا قۇزىرەتى جەتكىلىكسىز، بۇل ونىڭ قۇزىرەتىنە كىرمەيدى جانە وسى تاقىرىپ بويىنشا مالىمدەمە جاساۋعا قۇقىعى جوق»، - دەپ اتاپ ءوتتى مينيسترلىكتەردە.

وسىعان بايلانىستى، مينيسترلىك ۋلۋگبەك كاسيمحودجاەۆتىڭ تۇسىنىكتەمەسى ينۆەستيتسيالار جانە سىرتقى ساۋدا مينيسترلىگىنىڭ بۇل ماسەلەگە قاتىستى رەسمي ۇستانىمى ەمەس ەكەنىن مالىمدەدى.

ەستەرىڭىزگە سالا كەتەيىك، 2021 جىلدىڭ ساۋىرىندە وزبەكستان ەۋروپالىق وداقتىڭ GSP+ جۇيەسىنە مۇشە بولدى. بۇل جۇيە بويىنشا وزبەكستان ەۋروپاعا 3000-عا جۋىق تاۋاردى كەدەندىك باج سالىعىنسىز، 3200-گە جۋىق تاۋاردى كەدەندىك باج سالىعى تومەندەتىلگەن نەگىزدە ەكسپورتتاۋ قۇقىعىنا يە. 24 اقپاندا رەسەي ۋكرايناعا سوعىس جاريالاعالى حالىقارالىق قاۋىمداستىق، سونىڭ ىشىندە باتىس ەلدەرىنىڭ كوپشىلىگى ماسكەۋمەن ەكونوميكالىق جانە ساياسي بايلانىستارىن ءۇزدى. باتىس رەسەيگە قارسى كوپتەگەن سانكتسيالار سالدى. وسىنىڭ سالدارىنان رەسەيدىڭ ەۋروپا ەلدەرىنە ونىمدەرىن ەكسپورتتاۋ نەمەسە باتىستان يمپورتتاۋ مۇمكىندىگى ايتارلىقتاي شەكتەلدى.

"ادىرنا" ۇلتتىق پورتالى 

پىكىرلەر