قازاقستان مەن سبەر اراسىنداعى كەلىسىمگە قول قويىلمايدى - تسيفرلىك دامۋ مينيسترلىگى

9005
Adyrna.kz Telegram

قازاقستاننىڭ تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى vlast.kz-ءتىڭ ساۋالىنا جاۋاپ بەرە وتىرىپ، رەسەيلىك سبەر-مەن قازاقستاننىڭ تسيفرلىق ترانسفورماتسياسى تۋرالى كەلىسىمگە قول قويۋ ماسەلەسى بۇدان بىلاي تسيفرلىق دامۋ مينيسترلىگىنىڭ كۇن تارتىبىندە جوق ەكەنىن حابارلادى، دەپ جازادى "ادىرنا" ۇلتتىق پورتالى.

"بۇگىنگى كۇنى كەلىسىمگە قول قويۋ ماسەلەسى كۇن تارتىبىندە تۇرعان جوق. الەمدەگى قازىرگى جاعدايعا بايلانىستى مينيسترلىك بىرنەشە ستسەناريلەردى ازىرلەۋدى قاراستىرىپ جاتىر جانە ولاردىڭ ارقايسىسىنا دايىندالۋدا» - دەلىنگەن مينيسترلىكتىڭ جاۋابىندا.

بۇل رەتتە ول قانداي ستسەناريلەردى قاراستىراتىنىن جانە تسيفرلىق ترانسفورماتسيادا قازاقستاننىڭ سەرىكتەسى كىم بولا الاتىنىن ناقتىلامادى.

ەستەرىڭىزگە سالا كەتەيىك، وتكەن جىلدىڭ 3 قىركۇيەگىندە قازاقستان ۇكىمەتى ەكى ەل پرەزيدەنتتەرىنىڭ قاتىسۋىمەن رەسەيلىك سبەر توبىمەن تسيفرلىق ۇكىمەت پلاتفورماسىن قۇرۋ بويىنشا جۇمىس تۋرالى مەموراندۋمعا قول قويعان بولاتىن. كوپتەگەن قازاقستاندىق ماماندار مەن قولدانۋشىلار دايىندىعى حابارلانباعان مەموراندۋمعا قول قويعاننان كەيىن ونى سىنعا الىپ، قازاقستاندىقتار دەرەكتەرىنىڭ قاۋىپسىزدىگىنە كۇمان كەلتىرىپ، تسيفرلىق پلاتفورما قۇرۋ بويىنشا سەرىكتەستى تاڭداعانىنا تاڭعالدى.

كوپ ۇزاماي تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين سەرىكتەس رەتىندە سبەر-ءدى تاڭداۋىن كومپانيانىڭ باستاپقى كودتاردى بەرۋگە كەلىسكەندىگىمەن ءتۇسىندىردى. سونداي-اق، دەرەكتەر بازالارى قازاقستان اۋماعىندا ورنالاساتىنىن جانە رەسەيلىك مامانداردىڭ ولارعا قول جەتكىزە المايتىنىن مالىمدەدى. پلاتفورمانى قۇرۋ بويىنشا جۇمىس بىرنەشە جىلعا سوزىلادى. جۇمىستى باستاۋ تۋرالى كەلىسىمگە 2022 جىلدىڭ باسىندا قول قويىلادى دەپ بولجانعان. اقپان ايىندا رەسەيدىڭ ۋكرايناعا باسىپ كىرۋىنەن كەيىن سبەربانككە سانكتسيالار ەنگىزىلىپ، بانك ەۋروپاداعى جۇمىسىن توقتاتقان. بىراق بىرنەشە ەلدە، سونىڭ ىشىندە قازاقستاندا جۇمىسىن جالعاستىرۋدا. 

"ادىرنا" ۇلتتىق پورتالى 

پىكىرلەر