ۇلتتىق قاۋىپسىزدىك كوميتەتىنىڭ بۇرىنعى توراعاسى كارىم ءماسىموۆتى قاماۋعا الۋ مەرزىمى ۇزارتىلدى. سونداي-اق ءماسىموۆتىڭ ءىسى قىلمىستىق كودەكستىڭ بەس بابى بويىنشا تەرگەلىپ جاتىر، دەپ جازادى "ادىرنا" ۇلتتىق پورتالى. بۇل تۋرالى ۇقك Informburo.kz سايتىنىڭ ساۋالىنا جاۋاپ بەرە وتىرىپ حابارلادى.
«25 اقپاندا نۇر-سۇلتان قالاسىنىڭ تەرگەۋ سوتى كارىم ماسىموۆكە قاتىستى قاماۋدا ۇستاۋ تۇرىندەگى بۇلتارتپاۋ شاراسىن 3 ايعا دەيىن ۇزارتتى»، – دەلىنگەن ۆەدومستۆونىڭ اگەنتتىككە بەرگەن جاۋابىندا.
تەرگەۋ كەزىندە انىقتالعان ءماسىموۆتىڭ مۇلكى تاركىلەندى. مۇلىكتى مەملەكەت كىرىسىنە بەرۋ تۋرالى شەشىمدى سوت شىعارادى.
ۇقك جەدەل تەرگەۋ توبى ءماسىموۆتى جانە باسقا دا تۇلعالاردى قر قىلمىستىق كودەكسىنىڭ كەلەسى باپتارى بويىنشا تەرگەپ جاتقانىن حابارلادى:
– 366-باپتىڭ 4-بولىگى – «پارا الۋ»;
– 362-باپتىڭ 4-بولىگىنىڭ 3-تارماعى – «بيلىكتى نەمەسە لاۋازىمدىق وكىلەتتىكتەردى اسىرا پايدالانۋ»;
– 175-باپتىڭ 1-بولىگى – «مەملەكەتكە وپاسىزدىق جاساۋ»;
– 179-باپتىڭ 3-بولىگى – «قازاقستان رەسپۋبليكاسىنىڭ كونستيتۋتسياسىن بۇزىپ، بيلiكتi كۇشپەن باسىپ الۋعا نەمەسە بيلiكتi كۇشپەن ۇستاپ تۇرۋعا نە قازاقستان رەسپۋبليكاسىنىڭ كونستيتۋتسيالىق قۇرىلىسىن كۇشتەپ وزگەرتۋگە باعىتتالعان ارەكەتتەر»;
– 218-باپتىڭ 3-بولىگى 3-تارماعى – «قىلمىستىق قۇقىق بۇزۋشىلىقتاردان تۇسكەن تابىستار بولىپ تابىلاتىن مۇلىكتى كونۆەرسيالاۋ نەمەسە اۋدارۋ تۇرىندە مامىلەلەر جاساسۋ ارقىلى قىلمىستىق جولمەن الىنعان اقشانى جانە (نەمەسە) وزگە مۇلىكتى زاڭدى اينالىمعا تارتۋ نە مۇنداي مۇلىكتى يەلەنۋ جانە پايدالانۋ».
"ادىرنا" ۇلتتىق پورتالى
