سوعىسقا قاتىستى ۇستانىمىم تۋرالى تاعى ءبىر اۋىز ءسوز.
دوستار، مەن رەسەيدىڭ ۋكراينامەن سوعىسىنداعى جاعداي كۇن سايىن ناشارلاپ بارا جاتقانىن بايقايمىن. مىڭداعان جازىقسىز ازامات مەرت بولىپ، ميلليونداعان جازىقسىز ادام سوعىس زاردابىن تارتىپ جاتىر. سوعىستىڭ العاشقى كۇندەرىنەن باستاپ مەن ۋكراينانى قولدادىم، ويتكەنى، اقيقات ۋكراينا جاعىندا، رەسەي وعان وپاسىزدىقپەن شابۋىل جاسادى دەپ ەسەپتەيمىن. ءبىز، ءبىر توپ بەلسەندىلەر جانە قوعام قايراتكەرلەرىمەن بىرلەسىپ، سوعىستىڭ العاشقى كۇندەرىندە ۇندەۋ جاريالاپ، قاراجات جيناۋدى جانە ۋكرايناعا گۋمانيتارلىق كومەك جىبەرۋدى ۇيىمداستىردىق. جالپى العاندا، ءبىز ۋكرايناعا گۋمانيتارلىق كومەك تيەلگەن 6 ۇشاق جىبەردىك. مەن قاي جەردە ءسوز سويلەسەم دە، ۋكراينا حالقىنا قولداۋىمدى ءبىلدىردىم دە، بىلدىرەمىن دە. ونىڭ ۇستىنە، قازاقستان ۋكرايناداي باۋىرلاس حالقىنا قارسى شىعىپ وتىرعان رەسەي اگرەسسياسىن ەشبىر جاعدايدا قولداماۋى ءتيىس دەگەن ۇستانىمدامىن. بۇگىن ۋكراينا ءوزى ءۇشىن عانا ەمەس، ءبارىمىز ءۇشىن كۇرەسىپ جاتىر، ءسىز بەن ءبىزدىڭ بوستاندىعىمىز ءۇشىن، بۇكىل الەمدەگى قاۋىپسىزدىك ءۇشىن كۇرەسىپ جاتىر.
بۇل رەتتە، مەن بۇكىل ورىس حالقىنا قارسى ەمەس ەكەنىمدى ءتۇسىندىرىپ وتكىم كەلەدى. رەسەيدە مەنىڭ دوستارىم، وقىرماندارىم كوپ. مەن رەسەي بيلىگىنىڭ ارەكەتتەرى مەن شەشىمدەرىنە قارسىمىن. مەن پۋتين مەن ەل بيلىگىندەگىلەردىڭ ارەكەتتەرىن قولداپ وتىرعان رەسەي حالقىنىڭ جاۋاپكەرشىلىگىن دە ەش كەمىتە المايمىن. بىراق رەسەيدە ميى رەسمي ناسيحاتپەن ءالى ۋلانباعان سانالى ادامدار دا بارشىلىق. ولار جاعدايدى ءتۇسىنۋ، اقىل-ويعا سالۋ جانە سىني ويلاۋ قابىلەتتەرىن ءالى جوعالتقان جوق.
مۇمكىندىگى بار ازاماتتار ەلدەن كەتىپ قالدى، ءالى دە كەتىپ جاتىر. جەكە باسىم رەسەيدەگى بارلىق دوستارىما ەلدەن كەتۋدى ۇسىنامىن. بىراق مۇنىڭ ءبارى كوڭىلىمە قاتتى تيەدى. مەن نارازىلىق بىلدىرگەن ناعىز ورىس پاتريوتتارىن قولدايمىن، ولار تۇرمەگە دە ءتۇسىپ جاتىر، بيلىك ولاردىڭ ءۇنىن شىعارماۋ ءۇشىن بارىن سالۋدا، ولار بيلىكتىڭ ناعىز تۇتقىنىنا اينالىپ وتىر. رەسەي بۇل تەك پۋتين عانا ەمەس. بۇل تەك ەل بيلىگىن جاقتاۋشى پاتريوت-سىماقتار ەمەس. رەسەي دەگەن - بۇل رەجيسسەر سوكۋروۆ، اكۋنين، چيچۆاركين، گرەبەنششيكوۆ، شەۆچۋك، مەلادزە، دۋد، ناۆالنىي، وۆسياننيكوۆا جانە باسقا دا قانشاما قادىرلى، ادال جانە ۇلى ادامدار، ولاردىڭ اراسىندا مەنىڭ دوستارىم مەن وقىرماندارىم كوپ. بەس ساۋساق بىردەي ەمەس، سوندىقتان، بيلىكتەگى ءبىر توپ ادام ءۇشىن بارلىق ورىستاردى جاۋداي كورۋگە بولمايدى.
بۇل سوعىس مۇمكىندىگىنشە تەز اياقتالادى دەپ جانە ول اقىرى نەمەن بىتەرى بەلگىلى مىنا باسسىزدىق تۇڭعيىعىنا ەلىمىزدى تارتىپ اكەتپەيدى دەپ ۇمىتتەنەمىن.
مارعۇلان سەيسەمباي
Facebook پاراقشاسىنان
