رەسپۋبليكا كۇنى قارساڭىندا قاراعاندىدا قوعامدىق كولىكتەردى جاڭارتۋ جۇمىستارى جالعاسۋدا. جاقىندا «تاكسوكومبينات» جشس 20 جاڭا اۆتوبۋس الدى. الداعى ۋاقىتتا قالاعا تاعى دا جاڭا اۆتوبۋستار جەتكىزىلىپ، بىرنەشە باعىتتاعى ەسكى كولىكتەر اۋىستىرىلادى.
قاراعاندى قالاسىنىڭ اكىمى مەيرام قوجۋحوۆ الەۋمەتتىك جەلىدەگى پاراقشاسىندا جىل سوڭىنا دەيىن قالالىق اۆتوپاركتەر 122 جاڭا اۆتوبۋس ساتىپ الۋدى جوسپارلاپ وتىرعانىن حابارلادى. جاڭا اۆتوبۋستار ەسكىلەرىن اۋىستىرۋ ءۇشىن عانا ەمەس، كەيبىر باعىتتارداعى كولىك سانىن كوبەيتۋ ءۇشىن دە الىنادى.
«قاراعاندىدا اۆتوبۋستار كوپ بولۋى كەرەك. جاڭا اۆتوبۋستار كوبەيىپ، ەسكىلەرى ازايۋى ءتيىس. قازىر وسى باعىتتا جۇمىس ىستەپ جاتىرمىز»، – دەپ جازدى قالا اكىمى.
«تاكسوكومبيناتقا» كەلگەن 20 جاڭا اۆتوبۋس №28 جانە №31 باعىتتارعا شىعارىلادى. وسىلايشا، بۇل باعىتتاردا اۆتوبۋستار سانى كوبەيەدى. ال №01 باعىتتاعى ەسكى اۆتوبۋستار جاڭالارىنا اۋىستىرىلادى.
جاقىن كۇندەرى قالاعا تاعى سەگىز جاڭا اۆتوبۋس كەلەدى دەپ كۇتىلۋدە. ولاردى «اۆتوپرەدپرياتيە» جشس №012 باعىتقا شىعارۋدى جوسپارلاپ وتىر.
جىل سوڭىنا دەيىن ەڭ كوپ اۆتوبۋس №3 اۆتوپارككە جەتكىزىلەدى. كاسىپورىن 60 جاڭا اۆتوبۋس ساتىپ الۋدى جوسپارلاعان. ولار 2013 جىلدان بەرى قالا كوشەلەرىندە قاتىناپ جۇرگەن ەسكى اۆتوبۋستاردى الماستىرادى.
جاڭا اۆتوبۋستار ءۇش كەزەڭمەن كەلەدى. ءبىرىنشى بولىگى قازان ايىنىڭ سوڭىنا دەيىن، ەكىنشىسى قاراشادا، ال قالعانى جەلتوقساندا جەتكىزىلەدى.
قالادا اۆتوبۋستاردى جاڭارتۋ جۇمىستارى جىل باسىنان بەرى جۇرگىزىلىپ كەلەدى. قازىردىڭ وزىندە بىرقاتار باعىتتاردا جاڭا اۆتوبۋستار جولاۋشىلاردى تاسىمالداپ ءجۇر.
مىسالى، ناۋرىز ايىندا «ەكسپرەسس» اۆتوپاركى 22 جاڭا اۆتوبۋستى جولعا شىعاردى. سونىڭ ناتيجەسىندە №29 باعىتتاعى ەسكى اۆتوبۋستار اۋىستىرىلىپ، كولىك سانى كوبەيدى.
ال شىلدە ايىندا «رەيس» اۆتوپاركى 12 جاڭا اۆتوبۋس ساتىپ الىپ، ولاردى №07 جانە №011 باعىتتارعا شىعاردى.
وسىلايشا، بيىل ساتىپ الۋ جوسپارلانعان 122 اۆتوبۋستىڭ 34-ءى قازىردىڭ وزىندە قالا كوشەلەرىندە ءجۇر. تاعى 20 اۆتوبۋس جاقىندا «تاكسوكومبيناتقا» جەتكىزىلدى. قالعان 68 اۆتوبۋس جىل سوڭىنا دەيىن كەلەدى دەپ كۇتىلۋدە.
جالپى، سوڭعى بەس جىلدا قاراعاندىداعى قالالىق اۆتوبۋستاردىڭ 80 پايىزى جاڭارتىلدى.
ايتا كەتەيىك، بيىل 25 قازاندا رەسپۋبليكا كۇنىمەن قاتار اۆتوموبيل كولىگى قىزمەتكەرلەرىنىڭ كۇنى دە اتاپ وتىلەدى. سوندىقتان جاڭا اۆتوبۋستاردىڭ جەتكىزىلۋى كولىك سالاسى قىزمەتكەرلەرىنىڭ كاسىبي مەرەكەسىمەن دە تۇسپا-تۇس كەلىپ وتىر.
قالا اكىمى مەيرام قوجۋحوۆتىڭ ايتۋىنشا، باستى ماقسات تەك جاڭا اۆتوبۋستار ساتىپ الۋ ەمەس. ەڭ ماڭىزدىسى - اۆتوبۋستاردىڭ ۋاقىتىندا كەلۋى، باعىتتاردا كولىك سانىنىڭ جەتكىلىكتى بولۋى جانە تۇرعىنداردىڭ ايالدامادا ۇزاق كۇتپەۋى.
«جولاۋشىلار ءۇشىن ەڭ باستىسى - اۆتوبۋستىڭ ۋاقىتىندا كەلۋى، باعىتتا كولىكتىڭ جەتكىلىكتى بولۋى جانە جۇمىسقا، وقۋعا نەمەسە ۇيگە ۇزاق كۇتپەي جەتۋ»، - دەپ اتاپ ءوتتى قالا اكىمى.
