بۇگىن ۇكىمەت جانىنداعى داعدارىسقا قارسى شتابتىڭ وتىرىسىندا تالقىلانعان ماسەلە بويىنشا ءسال تۇسىنبەستىك بولىپ جاتقان سياقتى.
قازىرگى گەوساياسي جاعدايدا وزدەرىڭىزگە بەلگىلى ەلىمىزگە تاۋار جەتكىزۋ بويىنشا ءبىراز قيىندىق تۋىندادى. سونداي-اق، ەلىمىزگە سىرتتان كەلەتىن كەيبىر تاۋارلاردى ءوندىرۋشى ەلدەر ءوز تەرريتورياسىنان شىعارۋعا تىيىم سالدى.
مۇنداي جاعدايدا ەلدە تاۋار دەفيتسيتى مەن باعانىڭ قىمباتتاماۋى ءۇشىن بيزنەس وكىلدەرى تاۋارلارعا زاڭ تالابى بويىنشا مەملەكەتتىك جانە ورىس تىلىندە جابىستىرىلۋى ءتيىس ەتيكەتكالاردى ۋاقىتشا الىپ تاستاۋدى سۇرادى.
ونىڭ ورنىنا دۇكەن سورەلەرىندە QR كود ورناتىلىپ، ءار ازامات تاۋار تۋرالى اقپارات الۋ مۇمكىندىگى پايدا بولادى.
قاراپايىم مىسالمەن ايتساق، ماسەلەن، بيزنەس ءۇندى قانتىن ەلگە الىپ كەلسە، ونى كىرگىزۋ ءۇشىن قازاق جانە ورىس تىلدەرىندە ەتيكەتكا جابىستىرۋى ءتيىس.
ەندى ءبىز بۇل تالاپتى الىپ تاستاساق، ءسىز دۇكەنگە بارعاندا ءۇندى قانتىن الساڭىز، ول جەردە تەك ءۇندى تىلىندە جازىلىپ تۇرادى دا، ال قاسىندا مىندەتتى تۇردە بولاتىن QR كودتى سكانداۋ ارقىلى قازاق ءارى ورىس تىلىندە اقپاراتتى الا الاسىز. وسىلايشا ءسىزدىڭ اقپارات الۋ قۇقىعىڭىز تولىق ساقتالادى. سونىمەن قاتار، ەلدە قانت تاپشىلىعىنا جول بەرىلمەيدى.
تاعى دا قايتالاپ جازعىم كەلەدى، بۇل تەك قازاق تىلىنە ەمەس، ورىس تىلىنە دە قاتىستى. سونداي-اق، بيزنەس وكىلدەرى لوگيستيكانى دۇرىستاعانشا ۋاقىتشا شارا عانا!
ۇكىمەت ەشقاشان مەملەكەتتىك ءتىلدى كەمسىتۋگە جول بەرمەيدى ءارى بۇل مۇمكىن دە ەمەس!
رۋسلان جەلدىباي
