قوستاناي اۋدانىنىڭ ەڭبەك اۋىلىندا جاڭا ءبىلىم ورداسى اشىلدى. ال «استانا» شاعىن اۋدانىندا 43 وتباسىعا جاڭا تۇرعىن ۇيلەردىڭ كىلتتەرى تاپسىرىلدى.
ەڭبەك اۋىلىنداعى وقۋ ورداسى قازىرگى زامان تالابىنا ساي سالىنىپ، وقۋشىلاردىڭ ءبىلىمى مەن قابىلەتىن دامىتۋعا بارلىق جاعداي جاسالعان. 1962 جىلى بوي كوتەرگەن بۇرىنعى مەكتەپ عيماراتى ابدەن توزىعى جەتىپ، ايماق باسشىلىعى ونىڭ ورنىنا جاڭا ءبىلىم وشاعىن سالۋ تۋرالى شەشىمگە كەلدى. ونىڭ ۇستىنە، ەڭبەك ەلدى مەكەنى وبلىس ورتالىعىنا ىرگەلەس، حالقى ورنىعىپ قالعان كەلەشەگى بار اۋىل.
«ەل پرەزيدەنتىنىڭ اۋىلدىق ايماقتارداعى مەكتەپ ينفراقۇرىلىمىن جاڭعىرتۋ جونىندەگى تاپسىرماسىنا سايكەس ەڭبەك اۋىلىندا جاڭا ءبىلىم ورداسى اشىلدى. سوڭعى ءۇش جىلدا جاس بۋىنعا ارناپ ايماقتا 19 الەۋمەتتىك نىسان، ونىڭ ىشىندە 9 مەكتەپ، 6 بالاباقشا جانە 3 شىعارماشىلىق ورتالىعى پايدالانۋعا بەرىلدى. مەكتەپتەردىڭ ەكەۋى قوستاناي اۋدانىندا سالىنىپ وتىر»، – دەدى قوستاناي وبلىسىنىڭ اكىمى قۇمار اقساقالوۆ.
جاڭا 43 باسپانا يەلەرىنىڭ 70 پايىزى – الەۋمەتتىك از قامتىلعان وتباسىلار
قوستاناي قالاسى اگلومەراتسياسىنداعى «استانا» شاعىن اۋدانىندا جاڭا پاتەر يەلەرىنىڭ قاتارىندا اتا-اناسىنىڭ قامقورلىعىنسىز قالعان بالالار، مۇگەدەكتىگى بار ازاماتتار، كوپبالالى جانە تولىق ەمەس وتباسىلار بار.
پاتەرلەردىڭ بارلىعى تازا ارلەنگەن كۇيدە تاپسىرىلىپ وتىر، كوپقاباتتى ءۇي قاجەتتى ينجەنەرلىك كوممۋنيكاتسيالارمەن تولىق قامتاماسىز ەتىلگەن.
«مەملەكەت باسشىسى تۇرعىن ءۇي قۇرىلىسى سالاسىنا ەرەكشە نازار اۋدارىپ كەلەدى. سوڭعى ءۇش جىلدا وڭىردە 1,5 ملن شارشى مەتردەن استام باسپانا سالىندى. تەك وتكەن جىلى وبلىس بويىنشا 517,4 مىڭ شارشى مەتر تۇرعىن ءۇي پايدالانۋعا بەرىلدى. ونىڭ 63,7 مىڭ شارشى مەترى اۋىلدىق جەرلەرگە تيەسىلى. سونىڭ ارقاسىندا 5,5 مىڭ وتباسى باسپانالى بولدى»، – دەدى ايماق باسشىسى قۇمار اقساقالوۆ.
«استانا» شاعىن اۋدانىندا ءبىر جارىم جىلدا 10 كوپقاباتتى تۇرعىن ءۇيدىڭ قۇرىلىسى اياقتالىپ، 450 زاماناۋي پاتەر پايدالانۋعا بەرىلدى. قازىرگى تاڭدا 13 بەسقاباتتى تۇرعىن ءۇيدىڭ قۇرىلىسى ءجۇرىپ جاتىر. بيىل تاعى 16 كوپقاباتتى تۇرعىن ءۇي قۇرىلىسىن باستاۋ جوسپارلانىپ وتىر.
جالپى شاعىن اۋداندا 154 كوپقاباتتى تۇرعىن ءۇي سالىنىپ، 60 مىڭ ادامدى قامتۋ كوزدەلگەن.
بۇدان بولەك، جاستاردى باسپانامەن قامتۋ ماقساتىندا ايماقتىڭ بارلىق وڭىرىندە «قوستاناي جاستارى» باعدارلاماسى ىسكە اسىرىلۋدا.
سوڭعى ءۇش جىلدا بۇل باعدارلاماعا شامامەن 5 ملرد تەڭگە باعىتتالدى. ناتيجەسىندە 340-تان استام جاس وتباسى ءوز باسپاناسىنا قول جەتكىزدى. بيىل تاعى 1,8 ملرد تەڭگەگە زايم بەرۋ جوسپارلانىپ وتىر.
