Baspanaǵa suranys áli azaıa qoıǵan joq. Keıbiri tipti sońǵy jıǵan-tergenin jumsap, qaryzdanyp, qaýǵalanyp úı alyp jatqan shyǵar. Osy tusta keıbir óńirde baspana baǵasy iri megapolısterdegi baǵamen birdeı bolyp qalǵanyn aıtý kerek. Máselen, Petropavlda úı sumdyq qymbattady degen qaýeset taraýda. Jańadan salynǵan baspana bolsyn, eskisi bolsyn, qaı-qaısynyń baǵasy qaltany qaǵady. Qazir shaharda páterdiń bir sharshy metri orta eseppen 320 myń teńgeden bastalady, dep habarlaıdy "Adyrna" ulttyq portaly 24.kz saıtyna siltep.
- Osy kúni Petropavlda bir bólmeli páter alý úshin qansha qarajatyńyz bolýy kerek? Qazir óńirde qansha adam úı kezeginde tur?
- Qazirgi tańda qalada bir bólmeli páter satyp alý úshin qaltańyzda kem degende 14-15 mıllıon teńge qarajatyńyz bolýy qajet. Al 3-4 bólmelileri 40-50 mıllıonǵa deıin ketip qalady. Aılyǵy shaılyǵyna jetpeı júrgen qarapaıym halyq úshin az aqsha emes árıne. Biraq qymbatshylyq qyspaqqa alyp, naryqtyq baǵa baǵynbaı tursa da aımaqta baspana alýǵa suranys esh kemigen emes. Mamandardyń aıtýy boıynsha ótken jylmen salystyrǵanda páter quny orta eseppen 20 proentke ósken. Buǵan qurylys materıaldarynyń qymbattaýy da áser etpeı qoımady. Al úkimet zeınetaqy qorynyń bir bóligin úı alýǵa jumsaýǵa ruqsat berdi. Munymen qosa teńgeniń turaqsyzdyǵyna baılanysty halyqtyń kóbiniń qazir baspana alyp qalǵylary keletini ras. Al satylymǵa shyǵarylǵan úıler sońǵy kezderi kerisinshe azaıa bastaǵan.
Osy suraq boıynsha rıeltorlyq kompanııa ókilderiniń bergen jaýaby:
"Jasyratyny joq, kórshi eldegi jaǵdaı bizdegi jyljymaıtyn múlik naryǵyna da áser etpeı qoımady. Máselen, sońǵy on kúnde birneshe bank paıyzdyq mólsherlemesin 5 proentke deıin joǵarlatyp jiberdi. Munymen qosa Reseıge kóshýdi josparlap otyrǵandar oılarynan jappaı aınyp jatyr. Bul da baǵanyń qymbattaýyna septigin tıgizedi. Nege deseńiz, satylymǵa shyǵarylǵan baspanalar sany azaıyp jatyr. Iaǵnı básekelestik bolmaǵan jerde baǵa sharyqtaıtyny aıtpasa da túsinikti" dep jaýap berdi jyljymaıtyn múlik agenttiginiń jetekshisi Gúlmıra Ǵalymjanova.
Byltyr Petropavlda 222 myń sharshy metrdi quraıtyn baspana halyq ıgiligine tapsyrylǵan eken. Biraq bul azdyq etip otyr. Óıtkeni qazirgi tańda qalalyq ákimdikte 15 myńǵa jýyq adam páter kezeginde tur. Mamandardyń aıtýy boıynsha jazǵa qaraı baǵa taǵy sharyqtamasa arzandamaıdy. Jalpy Petropavl baspana baǵasy qymbat qalalardyń tiziminde. Qazirdiń shahar besinshi orynda tur.
"Adyrna" ulttyq portaly
