رەسەي پرەزيدەنتى ۆلاديمير پۋتين تۇركيا پرەزيدەنتى رەجەپ تايىپ ەردوعانمەن تەلەفون ارقىلى سويلەسكەن كەزدە ۋكرايناداعى رەسەي باستاعان ارنايى اسكەري وپەراتسيا كيەۆ "سوعىس قيمىلدارىن توقتاتىپ، رەسەيدىڭ تالاپتارىن ورىنداسا" عانا اياقتالاتىنىن باسا ايتتى، دەپ حابارلايدى "ادىرنا" ۇلتتىق پورتالى.
"ۋكراينا قاۋىپسىزدىك كۇشتەرى ءوز قۇرالدارىن قايتا توپتاستىرۋ ءۇشىن كەلىسسوزدەر پروتسەسىن سوزۋعا جاساپ جاتقان كەز-كەلگەن ارەكەتىنىڭ ناتيجەسىزدىگىنە باسا نازار اۋدارىلدى. وسىعان بايلانىستى ارنايى وپەراتسيانى توقتاتۋ تەك كيەۆ سوعىس قيمىلدارىن توقتاتىپ، رەسەيدىڭ بەلگىلى تالاپتارىن ورىنداعان جاعدايدا عانا مۇمكىن بولاتىندىعى اتاپ ءوتىلدى", — دەدى كرەملدىڭ ءباسپاسوز قىزمەتى.
پۋتين رەسەيدىڭ قاقتىعىستى شەشۋ ءۇشىن ۋكراينامەن ديالوگتى جالعاستىرۋعا دايىن ەكەنىن راستادى.
"رەسەي تاراپىنىڭ قاقتىعىستى رەتتەۋ ماقساتىندا ۋكراينا بيلىگىمەن جانە شەتەلدىك سەرىكتەستەرمەن ديالوگقا دايىندىعى راستالدى", — دەلىنگەن كرەمل حابارلاماسىندا.
پۋتين رەسەي فەدەراتسياسىنىڭ ۋكرايناداعى ارنايى اسكەري وپەراتسياسى "جوسپار بويىنشا جانە كەستەگە سايكەس" ءجۇرىپ جاتقانىن، سونىمەن قاتار رەسەي قارۋلى كۇشتەرى ۋكرايناداعى وپەراتسيا كەزىندە «بەيبىت تۇرعىنداردىڭ قاۋىپسىزدىگى ءۇشىن قولدان كەلگەننىڭ ءبارىن جاساپ جاتقانىن» ءمالىم ەتتى.
«رەسەي قارۋلى كۇشتەرى بەيبىت تۇرعىنداردىڭ ءومىرىن ساقتاپ قالۋ جانە قاۋىپسىزدىگىن قامتاماسىز ەتۋ ءۇشىن قولدان كەلگەننىڭ ءبارىن جاساۋدا، ناقتى سوققىلار تەك اسكەري ينفراقۇرىلىم نىساندارىنا جۇرگىزىلۋدە»، - دەلىنگەن حابارلامادا.
پۋتين كيەۆتىڭ "بەلارۋستەگى كەلىسسوزدەردىڭ ءۇشىنشى راۋندىنا قاتىستى سىندارلى كوزقاراس تانىتاتىنىنا" ءۇمىت ءبىلدىردى.
"كەلىسسوزدەردىڭ جوسپارلانعان كەزەكتى راۋندى بارىسىندا ۋكراينا وكىلدەرى قالىپتاسقان شىندىقتى تولىق ەسكەرە وتىرىپ، سىندارلى كوزقاراس تانىتادى دەگەن ءۇمىت بار", — دەلىنگەن ءباسپاسوز قىزمەتىنىڭ حابارلاماسىندا.
پۋتين مەن ەردوعان ەلدەردىڭ ديپلوماتيالىق جانە اسكەري ۆەدومستۆولارى ارقىلى بايلانىستاردى جالعاستىرۋعا كەلىستى.
"رەسەي مەن تۇركيا پرەزيدەنتتەرى ەكى ەلدىڭ ديپلوماتيالىق جانە اسكەري ۆەدومستۆولارى جەلىسى بويىنشا بايلانىستاردى ساقتاۋدىڭ ماڭىزدىلىعىن اتاپ ءوتتى. رەدجەپ تايىپ ەردوعاننىڭ بىرقاتار باتىس مەملەكەتتەرىندە ورىس مادەنيەتى مەن ونىڭ قايراتكەرلەرىن كەمسىتۋ جونىندەگى اشىق ناۋقانعا سىني باعا بەرگەنى ءتان", — دەلىنگەن حابارلامادا.
كرەمل ءپۋتيننىڭ «رەسەي تاراپىنىڭ تۇرىك ازاماتتارىن سوعىس قيمىلدارى ءجۇرىپ جاتقان ايماقتاردان قاۋىپسىز ەۆاكۋاتسيالاۋ ءۇشىن بارلىق قاجەتتى كومەكتى كورسەتۋگە دايىن ەكەنىن راستادى»، - دەپ قوستى.
"ادىرنا" ۇلتتىق پورتالى
