ۇستازدارعا تولەنەتىن ۇستەماقى قارجىسى رەسپۋبليكالىق بيۋدجەتتە قاراستىرىلعان، بىراق زاڭ كۇشىنە ەنگەنگە دەيىن، اقشا جەرگىلىكتى بيۋدجەتتەن الىنادى
ءبىلىم جانە عىلىم ءمينيسترى ەرلان ساعاديەۆ 2018 جىلدىڭ 1 قاڭتارىنان ۇستەماقى الۋى ءتيىس ۇستازدارعا اقشا قالاي تولەنىپ جاتقانىن ءتۇسىندىردى.
"مىنا ءجايتتى تۇسىندىرگىم كەلەدى. مۇعالىمدەر جالاقىسىن تولىق الۋى ءۇشىن ءبىز بۇگىن ماجىلىستە تالقىلاپ، ماقۇلداعان زاڭدى (2018-2020 جىلدارعا ارنالعان رەسپۋبليكالىق بيۋدجەتكە تۇزەتۋلەر – اۆتور ەسكەرتپ.) قابىلداۋىمىز كەرەك. ەندى ول سەناتقا جولدانادى. زاڭ كۇشىنە ەنگەننەن كەيىن، بىزدە بيۋدجەتتىك وزگەرىستەر بولادى. رەسپۋبليكالىق بيۋدجەت مۇعالىمدەردىڭ جالاقىسىنا قاراستىرىلعان قارجىنى جەرگىلىكتى بيۋدجەتتەرگە اۋدارا المايدى. قازىر بىزدە قارجىنى رەسپۋبليكالىق بيۋدجەتتەن جەرگىلىكتى بيۋدجەتكە اۋدارۋعا نەگىز جوق. دەگەنمەن ءبىز پرەزيدەنتتىڭ تاپسىرماسىن ورىنداي وتىرىپ، جەرگىلىكتى اتقارۋشى ورگانداردان، ياعني اكىمدىكتەردەن اقشانى ءوز رەزەرۆىنەن تولەي تۇرۋدى وتىندىك", — دەدى مينيستر.
ساعاديەۆ ول قاراجات كەيىن اكىمدىكتەرگە قايتارىلاتىنىن اتاپ ءوتتى.
"اكىمدىكتەردىڭ كوبىسىندە قاراجات بار جانە ولار قاڭتاردان باستاپ مىندەتتەمەلەردى ورىنداۋعا كىرىستى. سەبەبى ولار رەسپۋبليكالىق بيۋدجەت كەيىن جۇمسالعان قاراجاتتى وتەيتىنىن ءتۇسىنىپ وتىر. بىراق بىرنەشە اكىمدىكتە قيىندىقتار تۋىندادى. 1 قاڭتاردان باستاپ ۇستەماقى الۋى ءتيىس بارلىق مۇعالىمگە اقشا تولەنەدى", — دەپ سەندىردى ە.ساعاديەۆ.
_______________________________________________________________________________________________________________
sputniknews.kz
