Ustazdarǵa tólenetin ústemaqy qarjysy respýblıkalyq bıýdjette qarastyrylǵan, biraq zań kúshine engenge deıin, aqsha jergilikti bıýdjetten alynady
Bilim jáne ǵylym mınıstri Erlan Saǵadıev 2018 jyldyń 1 qańtarynan ústemaqy alýy tıis ustazdarǵa aqsha qalaı tólenip jatqanyn túsindirdi.
"Myna jáıtti túsindirgim keledi. Muǵalimder jalaqysyn tolyq alýy úshin biz búgin májiliste talqylap, maquldaǵan zańdy (2018-2020 jyldarǵa arnalǵan respýblıkalyq bıýdjetke túzetýler – avtor eskertp.) qabyldaýymyz kerek. Endi ol senatqa joldanady. Zań kúshine engennen keıin, bizde bıýdjettik ózgerister bolady. Respýblıkalyq bıýdjet muǵalimderdiń jalaqysyna qarastyrylǵan qarjyny jergilikti bıýdjetterge aýdara almaıdy. Qazir bizde qarjyny respýblıkalyq bıýdjetten jergilikti bıýdjetke aýdarýǵa negiz joq. Degenmen biz prezıdenttiń tapsyrmasyn oryndaı otyryp, jergilikti atqarýshy organdardan, ıaǵnı ákimdikterden aqshany óz rezervinen tóleı turýdy ótindik", — dedi mınıstr.
Saǵadıev ol qarajat keıin ákimdikterge qaıtarylatynyn atap ótti.
"Ákimdikterdiń kóbisinde qarajat bar jáne olar qańtardan bastap mindettemelerdi oryndaýǵa kiristi. Sebebi olar respýblıkalyq bıýdjet keıin jumsalǵan qarajatty óteıtinin túsinip otyr. Biraq birneshe ákimdikte qıyndyqtar týyndady. 1 qańtardan bastap ústemaqy alýy tıis barlyq muǵalimge aqsha tólenedi", — dep sendirdi E.Saǵadıev.
_______________________________________________________________________________________________________________
sputniknews.kz
