Atyraýdyń jańa ákimi bolyp Meıirim Qalaýı taǵaıyndaldy. Buǵan deıin ol Nur Otan partııasynyń oblystyq fılıaly tóraǵasynyń birinshi orynbasary qyzmetin atqarǵan.
Qalanyń burynǵy ákimi Qaırat Orazbaev qańtarda óz ótinishimen qyzmetinen bosatylǵan edi. Atyraý oblysy ákiminiń baspasóz qyzmetiniń málimetinshe, qalanyń jańa basshysy bul qyzmetke Prezıdent Ákimshiligi jáne Atyraý qalalyq máslıhatynyń kelisimi boıynsha taǵaıyndaldy.
«Atyraý oblysy ákiminiń ókimimen Atyraý qalasynyń ákimi taǵaıyndaldy. Ol laýyzymǵa Atyraý oblysynyń týmasy Meıirim Qalaýı taǵaıyndalady»,- delingen resmı habarlamada.
Aımaq basshysy Mahambet Dosmuhambetov Meıirim Qalaýıdy aktıvke tanystyra otyryp, onyń aldynda aýqymdy mindetter kútip turǵan turǵanyn tilge tıek etip, jumysyna sáttilik tiledi.
Meıirim Qalaýı 1985 jyly Atyraý oblysy Qyzylqoǵa aýdanynda dúnıege kelgen. 2006 jyly «Memlekettik jáne jergilikti basqarý» mamandyǵy boıynsha H.Dosmuhamedov atyndaǵy Atyraý memlekettik ýnıversıtetin, 2010 jyly RF Prezıdenti janyndaǵy memlekettik qyzmettiń Reseı akademııasyn támamdaǵan.
Eńbek jolyn 2006-2007 jyldary «Atyraý-Aqparat» kommýnaldyq memlekettik kásipornynda bastaǵan. 2010-2011 jyldary «Turan» JShS-niń dırektory, "Qazaqstan" RTRK Atyraý oblystyq fılıaly dırektorynyń orynbasary - bas redaktor bolyp eńbek etken.
2011-2012 jyldary «Atyraý-Aqparat» KMK tóraǵasy, 2012-2016 jyldary Atyraý oblystyq jastar saıasaty basqarmasynyń basshysy bolyp qyzmet atqardy. 2016-2019 jyldary oblys ákimi apparat basshysynyń orynbasary, Atyraý qalasy ákiminiń orynbasary laýazymynda boldy.
Sondaı-aq, ol "Nur Otan" partııasy "Jas Otan" jastar qanatynyń Atyraý oblystyq fılıalynyń atqarýshy hatshysy qyzmetin qoǵamdyq negizde atqarǵan. 2019 jyldan jańa laýazymǵa taǵaıyndalǵanǵa deıin Inder aýdanynyń ákimi bolyp jumys istegen. Odan keıin «Nur Otan» partııasy Atyraý oblystyq fılıaly tóraǵasynyń birinshi orynbasary qyzmetin atqarǵan.
"Adyrna" ulttyq portaly
