گااگاداعى حالىقارالىق قىلمىستىق سوت ۋكرايناداعى اسكەري قىلمىسقا بايلانىستى تەرگەۋ جۇمىستارىن باستادى، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەمە جاساپ.
پروكۋرور كەڭسەسىنىڭ باسشىسى كاريم حاننىڭ سوزىنشە، بۇگىندە ونىڭ ۋكرايناداعى وقيعالارعا قاتىستى قىلمىستاردى تولىق كولەمدە تەرگەۋدى باستاۋعا بارلىق رەسمي نەگىزى بار جانە دالەلدەمەلەر جيناۋ جۇمىستارى باستالدى.
"مەن حاك پرەزيديۋمىنا جاعدايدى دەرەۋ بەلسەندى تەرگەۋدى باستاۋ تۋرالى شەشىمىم تۋرالى حابارلادىم. ءبىزدىڭ دالەلدەمەلەر جيناۋ بويىنشا جۇمىسىمىز باستالدى", - دەلىنگەن پروكۋروردىڭ مالىمدەمەسىندە.
كاريم حان 28 اقپاندا ۋكرايناداعى جاعدايدى الدىن الا تەرگەۋدەن تۋىندايتىن جانە حقس قۇزىرەتىنە جاتاتىن كەز كەلگەن قىلمىستى قامتيتىن ونىڭ اكىمشىلىگىنىڭ الدىڭعى تۇجىرىمدارى نەگىزىندە تەرگەۋدى باستاۋعا سانكتسيا سۇراۋ تۋرالى شەشىم قابىلداعان بولاتىن.
"سول مالىمدەمەمدە ەگەر ريم ستاتۋتىنا قاتىسۋشى كەز كەلگەن مەملەكەت باسقارماعا ستاتۋتتىڭ 14-بابىندا كورسەتىلگەندەي ءتيىستى تۇسىنىك بەرسە، تەرگەۋلەر ەداۋىر تەز وتەتىنىن ايتتىم", - دەدى حان.
پروكۋرور وسىدان كەيىن ولار حقس-كە قاتىسۋشى مەملەكەتتەردەن ۋكرايناداعى جاعداي تۋرالى ۇسىنىستار العانىن ايتتى. ول ءوز مىندەتتەرىن ورىنداۋعا كىرىسىپ، ءوزارا تولىقتىرۋ قاعيداتىن ساقتاي وتىرىپ، وبەكتيۆتى جانە تاۋەلسىز تەرگەۋ جۇرگىزۋدى قامتاماسىز ەتىپ، جانجالدىڭ بارلىق مۇددەلى تارابىمەن ءوزارا ءىس-قيمىل جاساۋعا ۇمتىلاتىنىن اتاپ ءوتتى.
ايتا كەتەيىك، ۋكراينا حقس قۇرامىنا كىرمەيدى، بىراق بۇعان دەيىن ول 2013 جىلدىڭ 21 قاراشاسىنان باستاپ ەلدە جاسالعان ىقتيمال قىلمىستارعا قاتىستى سوتتىڭ قۇزىرەتىن مويىنداپ، ەكى ءوتىنىش بەرگەن.
“ادىرنا” ۇلتتىق پورتالى
