قۇرمەتتى وقىرمان، اقپارات ايدىنىنا جاڭا سايت قوسىلدى. الاشتىڭ ءسوزى بولسىن دەگەن ۇمىتپەن سايتتىڭ اتىن alash.kz دەپ قويدىق. تاۋەلسىز باعىتتا قۇرىلعان سايتىمىزدىڭ نەگىزگى تاقىرىپتىق نىساناسى: قوعامدىق-ساياسي، الەۋمەتتىك، ەكونوميكالىق تاقىرىپتارمەن بىرگە، ءبىلىم مەن سپورت، مەديتسينا مەن قورعانىس، ادەبيەت پەن تاريحي تاقىرىپتاردى قامتيدى.
جاسىراتىنى جوق، قازىر نە كوپ: سايت پەن پورتال كوپ. ول از دەسەڭىز، ءار گازەتتىڭ ءبىر-ءبىر سايتى تاعى بار. بۇگىن اشىلىپ، ەرتەڭ جابىلىپ جاتقاندارى دا از ەمەس. بىراق قازاق ءتىلدى اۋديتورياعا ارنالعان قازاق ءتىلدى ساپالى كونتەنت از، ساناۋلى عانا. ءبىزدىڭ ماقسات وسى كەڭىستىكتى ساۋاتتى، اۋقىمدى قازاق ءتىلدى كونتەنتپەن تولتىرۋ. مەملەكەت ساياساتىن اقپاراتتىق قولداۋ، رەسەي پروپاگانداسىنا قارسى تۇرۋ، جالعان اقپاراتتاردىڭ جولىن كەسۋ – ءبىزدىڭ سايتتىڭ نەگىزگى ۇستانىمى.
قازىر الەم ءۇشىن قارۋ-جاراقپەن سوعىستان بولەك، اقپاراتتىق سوعىستىڭ دا ماڭىزدىلىعىنا كۇن سايىن كوزىمىز جەتۋدە. ماسەلەن، دۇنيەنى ءدۇر سىلكىندىرىپ تۇرعان رەسەي مەن ۋكراينا سوعىسىندا اقپاراتتىق شابۋىلدىڭ دا ۇلەسى بار. بۇل جاعىنان كيەۆ جاقسى جۇمىس جاساپ جاتىر. ساعات، مينۋت سايىن ماسكەۋدىڭ قولعا تۇسكەن سولداتتارىن كوگەنگە ءتىزىپ، كوزدەرىن ءمولدىرىپ تۇرىپ التى قۇرلىققا تاراتىپ، رەسەي اگرەسسيسىن ايپارا قىلىپ، وزدەرىنىڭ ءسات سايىن جەڭىسكە جاقىنداپ كەلە جاتقانىن كورسەتۋدە. مەيلى، بۇل سوعىستا پۋتين جەڭەر-جەڭىلەر، بىراق ۋكراينانىڭ اقپاراتتىق سوعىستا مىسى باسىپ تۇر. بۇل جەڭىس سوعىستان كەيىن ۋاكرين حالقىنىڭ رۋحىن بەكىتەدى، قازىرگى جۇرگىزىلىپ جاتقان اقپاراتتىق شايقاس سونىڭ ءبىر دالەلى.
alash.kz سايتى قازاقستان اقپارات كەڭىستىگىندە ءوز ورنى بار، باعىت-باعدارى ايقىن، ماقساتى مەن مىندەتى ناقتىلانعان ۇلكەن اقپارات اگەنتتىگىنە اينالاتىنى انىق!
