ءبىلىم بەرۋ سالاسىنداعى وزگەرىستەر بويىنشا “ادىرنا” ۇلتتىق پورتالىنىڭ ءتىلشىسى قر ءبىلىم بەرۋ ءىسىنىڭ قۇرمەتتى قىزمەتكەرى ءومىر شىنىبەكۇلىمەن سۇحباتتاستى.
-مۇعالىمدەردىڭ جالاقاسى ءوستى. الايدا ارتىلعان جۇك تە كوبەيگەن سەكىلدى. وسى ۋاقىت ارالىعىندا جالاقى مەن قوسا مارتەبە دە قاتار ءوسىپ كەلە مە؟
— ءيا جالاقى ءوستى. 2019 جىلدىڭ سوڭىندا «پەداگوگ مارتەبەسى تۋرالى» زاڭ قابىلداندى.
بىراق وكىنىشكە قاراي زاڭ قابىلدانعانىنا 2 جىلدان اسسا دا، ءبىلىم سالاسىنداعى كوپتەگەن باسشىلار بۇل زاڭدى ءالى اشىپ كورمەگەنىنە كۋا بولىپ ءجۇرمىز..
-مينيستر ءبىلىمى جوق مۇعالىمدەر بالالارمەن جۇمىس ىستەمەۋى كەرەك دەدى. الايدا اۋىلدىق، اۋداندىق جەرلەردە سانيتار قىزمەتكەرلەرى سىرتتاي ءبىتىرىپ، فاكۋلتاتيۆ ساباقتارىنان ساعات الىپ ساباق بەرىپ ءجۇر دەگەن سىبىس بار.
مۇنداي دۇنيەلەرگە شەكتەۋ راسىمەن بولا ما؟
— ءيا، سىرتتاي وقىپ ديپلوم الىپ مەكتەپتەر مەن بالا باقشالارعا جۇمىسقا كىرگەن ادامداردىڭ قاتارى جەتەرلىك. مۇنداي جاعداي اسىرەسە اۋىلدى جەرلەردە كەڭ ەتەك جايعان..
قولدارىندا مەملەكەتتىك ۇلگىدەگى ديپلومى بار ادامدى قالاي شەكتەيسىز؟ شەكتەۋ مۇمكىن ەمەس..
-ال كەيبىر ورتا بۋىنداعى مۇعالىمدەر بىلىكتىلىكتى تەكسەرەتىن تەست سۇراقتارىنا نارازى. ويتكەنى، قانشا جىل تاجىريبەسى بولسا دا، تەست قيىن ەكەنىن العا تارتتى.
جالپى بىزدەگى ءبىلىم رەفورماسىن تولىعىمەن رەتتەۋدەن وتكىزۋ قاجەت پە؟
— ءمينيسترىمىز وتە ءبىلىمدى، وتە ساۋاتتى بولعانىمەن ءبىلىم جانە عىلىم مينيسترلىگىنەن شىعىپ جاتقان قۇجاتتاردا شيكىلىك وتە كوپ.
سوعان قاراعاندا مينيسترلىكتە مينيسترگە سابوتاج جاسايتىن قىزمەتكەرلەر بار ما دەگەن كۇدىگىم بار..
ءيا، پەداگوگتاردىڭ بىلىكتىلىگىن كوتەرۋ شارتتارى كوڭىلگە قونىمسىز..
بىلىكتىلىك تەستى تەوريالىق ءبىلىمى شامالى بولسا دا، تەست جاتتاۋعا قابىلەتتىلەر ءۇشىن وتە ءتيىمدى بولدى. كوپكە توپىراق شاشۋ ويىمدا جوق. اراسىندا ناعىز بىلگىرلەر بار.
بىراق ءبىلىم سالاسىندا 5-6 جىل عانا ىستەپ، وزگە ەشبىر جەتىستىككە جەتپەسە دە تەست جاتتاعىش قابىلەتىنىڭ ارقاسىندا بىلىكتىلىك ساناتىن كوتەرىپ جاتقان مۇعالىمدەر جەتىپ ارتىلادى.
ساتىپ الۋ تۋرالى اڭگىمە ءبىر بولەك. شىمكەنتتە 300-دەن اسا مۇعالىم ءوز ساناتىن جوعارىلاتۋ زاڭ بۇزۋشىلىققا بارىپ، مەملەكەتتەن تولەنەتىن ۇستەماقى الىپ كەلگەنى انىقتالدى.
قازاقستان بويىنشا ۇستالماعانى قانشا ەكەنىن ءبىر قۇداي بىلەدى..
ءوز باسىم بالا كۇنىمنەن جاتتاۋعا جوقپىن..
سوندىقتان تەست تاپسىرۋ مەن ءۇشىن وتە اۋىر…
پورتفوليونىڭ جىرى ءوز الدىنا بولەك اڭگىمە…
ارىپتەسىنىڭ گراموتا، العىس حاتتارىنا فوتوشوپ ارقىلى ءوز اتى-ءجونىن جازىپ، پورتفوليوسىنا سالىپ وتكىزىپ جاتقان مۇعالىمدەر دە بار دەسەدى..
ءوز ەڭبەگىمەن العان ماراپاتتارى بولسا دا ءبىلىم باسقارماسى مەن بولىمدەرىنىڭ ماماندارىنىڭ قولدارىنا بىردەڭە قىستىرماعانى ءۇشىن بىلىكتىلىك ساناتىن كوتەرە الماي قالعان مۇعالىمدەر تۋرالى الەۋمەتتىك جەلى بەتتەرىنەن وقۋعا بولادى.
بىراق وعان نازار اۋدارىپ جاتقان پەندە جوق.
-ۇبت تاپسىرۋدىڭ زاڭى جىل سايىن وزگەرۋدە. بيىل تەكسەرىس كامەرالارى قاتارعا قوسىلدى. ادالدىقتى، ادىلدىكتى نەگىزى ۇبت الدىندا ەمەس، مەكتەپ ىشىنەن باستاۋ كەرەك سەكىلدى. تىم قاتاڭداتۋ بالا بولاشاعىنا بالتا شابۋ ەمەس پە؟
— ۇبت تاپسىرۋ ءتارتىبى تىم قاتاڭ دەپ ايتپاس ەدىم.
بىراق سۇراقتارى تۋرالى اڭگىمە جەتەرلىك..
-“اتىلعان دا ءبىزدىڭ وقۋشىلار، اتقان دا ءبىزدىڭ وقۋشىلار” دەپ جازدىڭىز ءوز پاراقشاڭىزعا. قاڭتار وقيعاسى جايلى نە ويلايسىز؟ بيلىك ساباق الىپ، رەفورما جاساي الادى دەپ سەنەسىز بە؟
— قاڭتار وقيعاسىنا دەيىن دە پوليتسيا قىزمەتكەرلەرى بەيبىت شەرۋگە شىققان قاراپايىم ازاماتتاردى جاس-كارى دەمەي، ارنايى كولىكتەرىنە قويداي توعىتىپ تىعىپ جاتاتىن. سول قىزمەتكەرلەر دە ءبىزدىڭ مەكتەپتەردە ءبىلىم الدى عوي..
ال قاڭتار قىرعىنى كەزىندە تۇسىرىلگەن بەينەروليكتەردى قاراپ وتىرساڭىز، جاپ-جاس جىگىتتەر پوليتسيا قىزمەتكەرلەرىن اياۋسىز ساباپ جاتقانىن كوردىك..
بۇل نەنى بىلدىرەدى؟
بۇل ءبىزدىڭ ءبىلىم بەرۋ جۇيەسىنىڭ اۋىر «كەسەلگە شالدىققانىن» بىلدىرەدى.
باتىس ەلدەرىنەن ساباق ءوتۋدىڭ سان ءتۇرلى ءادىس-ءتاسىلىن اكەلدىك. بىراق اراسىندا تاربيە تۋرالى ءبىر ءسوز جوق.
مەكتەپتىڭ باستى فۋنكتسياسى تەك وقىتۋ ەمەس، وقۋ-تاربيە ەكەنىن ۇمىتتىق.
قاڭتار قىرعىنىنان ءبىزدىڭ بيلىكتىڭ ساباق العان-الماعانىن پرەزيدەنت ق.توقاەۆتىڭ ناۋرىز ايىنا جوسپارلاپ وتىرعان ۇندەۋىندە بەلگىلى بولادى. وعان دەيىن بىردەڭە دەۋ ارتىق..
ءىنجۋ ومىرزاق
