- اقتوبە وبلىستىق ءماسليحاتى قابىلداعان شەشىم الداعى 15 تاۋلىك ىشىندە ادىلەت دەپارتامەنتىندە تىركەلۋى كەرەك. بۇل جولى اقتوبەدە لەۆون ميرزويان كوشەسىنەن وزگە يدەولوگيالىق تۇرعىدان كونەرگەن 25 كوشەنىڭ اتاۋى وزگەردى، - دەيدى گۇلايىم تولەباەۆا.
لەۆون ميرزويان اتىنداعى كوشە اقتوبە قالاسىنىڭ ەسكى بولىگىندە، ءتورت-بەس كوشەنىڭ توعىسقان تۇسىندا تۇر. سوۆەت وكىمەتى تۇسىندا قازاقستاندى باسقارعان ميرزوياننىڭ اتى مەن ەسكەرتكىش تاسىن كوشەدەن الىپ تاستاۋدى جەرگىلىكتى بەلسەندىلەر 2014 جىلدان بەرى تالاپ ەتىپ كەلەدى. اقتوبەلىك بەلسەندى تۇرعىندار سوۆەت بيلىگى كەزىندەگى تۇلعاعا كوشە اتىن بەرگەنگە جانە ميرزوياننىڭ قۇرمەتىنە قالانىڭ ەسكى بولىگىندە 1997 جىلى ەسكەرتكىش تاس تۇرعىزىلعانىنا دا قارسى. ەسكەرتكىش تاستا "لەۆون ميرزويان (مىرزاجان) – ارميان حالقىنىڭ ۇلى پەرزەنتى" ەكەنى، ونىڭ 1939 جىلى رەپرەسسياعا ۇشىراپ، لەفورتوۆو تۇرمەسىندە اتىلعانى جازىلعان.
گۇلايىم تولەباەۆا ازاتتىق ءتىلشىسىنىڭ "كوشە اتاۋى اۋىسقاننان كەيىن، لەۆون ميرزويانعا قويىلعان ەسكەرتكىش تە الىنىپ تاستالا ما؟" دەگەن ساۋالىنا "بۇل اقتوبە وبلىستىق تىلدەردى دامىتۋ باسقارماسىنىڭ قۇزىرىنداعى شارۋا ەمەس" دەپ جاۋاپ بەردى. اقتوبە وبلىستىق مادەنيەت باسقارماسىنىڭ باسشىسى مارجان قورعانبەكوۆا "ەسكەرتكىش قالا اۋماعىندا تۇرعاندىقتان بۇل ماسەلەگە اقتوبە قالالىق اكىمدىگى جاۋاپتى" دەپ بىلەدى. ال اقتوبە قالالىق اكىمدىگىندە لەۆون ميرزويانعا قويىلعان ەسكەرتكىشتىڭ بۇدان ارعى تاعدىرى تۋرالى ازىرشە قانداي دا ءبىر شەشىم قابىلدانباعان.
________________________________________________________________________
azattyq.org
