اقتوبە وبلىسىنىڭ ويىل اۋدانىندا جەراستى گاز تسيستەرناسى جارىلدى. ونىڭ سالدارىنان جانارماي قۇيۋ بەكەتى مەن جاقىن جەردەگى عيمارات ورتەندى. بۇل تۋرالى وبلىستىق توتەنشە جاعدايلار دەپارتامەنتى ايتتى، دەپ حابارلايدى «ادىرنا» ءتىلشىسى.
وقيعا 11 ساۋىردە ساعات 20:20 شاماسىندا بولعان.
«ويىل اۋىلىنىڭ شەتىندە گاز باللونى جارىلىپ، ارتىنشا جانارماي قۇيۋ بەكەتى ورتەنىپ، ول جاقىن ماڭداعى قوسالقى عيماراتقا ۇلاستى. وقيعا ورنىنا وبلىستىق توتەنشە جاعدايلار دەپارتامەنتى مەن ويىل اۋداندىق پوليتسياسىنىڭ قىزمەتكەرلەرى باردى. زارداپ شەككەندەر جوق. ونەركاسىپتىك قاۋىپسىزدىك دەپارتامەنتى وقيعانىڭ سەبەپتەرىن انىقتاۋ ءۇشىن تەكسەرۋ جۇرگىزەدى»،—دەلىنگەن حابارلامادا.
اقتوبە وبلىسى، سونىڭ ىشىندە ويىل اۋدانى - سوڭعى اپتالاردا سۋ تاسقىنىنان زارداپ شەككەن ايماق.
