ۋكراينا سىرتقى ىستەر ءمينيسترى دميتري كۋلەبا بۇۇ قاۋىپسىزدىك كەڭەسىنە "رەسەيدىڭ زاڭسىز ارەكەتتەرىنە بايلانىستى" شۇعىل وتىرىس وتكىزۋ تۋرالى وتىنىشپەن ۇندەۋ جاريالادى، دەپ حابارلايدى Zakon.kz.
بۇل تۋرالى ۋكراينا سىرتقى ىستەر مينيسترلىگىنىڭ باسشىسى Twitter-دە جازدى.
ۋكراينا رەسەيدىڭ زاڭسىز ارەكەتتەرىنە بايلانىستى بىرىككەن ۇلتتار ۇيىمى قاۋىپسىزدىك كەڭەسىنىڭ شۇعىل وتىرىسىن وتكىزۋدى سۇرادى. ءبىز كەڭەسكە سۇرانىس جىبەردىك.
دميتري كۋلەبا
ۋكراينا پرەزيدەنتى ۆلاديمير زەلەنسكي ۋكراينانىڭ ۇلتتىق قاۋىپسىزدىك جانە قورعانىس كەڭەسىنىڭ وتىرىسىنان كەيىن ۇلىبريتانيا پرەمەر-ءمينيسترى بوريس دجونسونمەن جاعدايدى تالقىلاعانىن ايتتى.
قازىر ءبىز شۇعىل ۇندەۋ دايىنداپ جاتىرمىز، ودان كەيىن ەۋروپالىق كەڭەس باسشىسى چارلز ميشەلمەن جانە تۇركيا پرەزيدەنتى رەجەپ تايىپ ەردوعانمەن (جوسپارلى) كەلىسسوزدەر جۇرگىزىلۋدە.
ۆلاديمير زەلەنسكي
فرانتسيا دا بۇۇ قاۋىپسىزدىك كەڭەسىنىڭ شۇعىل وتىرىسىن شاقىرۋدى ۇسىندى.
ەليسەي سارايىنىڭ مالىمدەمەسىندە سونىمەن قاتار ماكروننىڭ ءپۋتيننىڭ دحر جانە لحر-دى مويىنداۋ شەشىمىن ايىپتايتىنى ايتىلدى.
رەسەيدىڭ بۇۇ جانىنداعى تۇراقتى وكىلدىگىندەگى رەسەيلىك اقپارات كوزدەرى قاۋىپسىزدىك كەڭەسىنىڭ وتىرىسى 22 اقپان كۇنى نۇر-سۇلتان ۋاقىتىمەن ساعات 08:00-گە جوسپارلانعانىن حابارلادى.
نۇر-سۇلتان ۋاقىتىمەن 22 اقپانعا قاراعان ءتۇنى رەسەي پرەزيدەنتى ۆلاديمير پۋتين دحر مەن لحر-نى تانۋ تۋرالى جارلىققا قول قويدى. سونداي-اق رف قورعانىس مينيسترلىگىنە ايماقتاعى تىنىشتىقتى قامتاماسىز ەتۋدى تاپسىردى.
"ادىرنا" ۇلتتىق پورتالى
