قاڭتار كوتەرىلىسىنە بايلانىستى العاشقى سوت شەشىمى شىقتى. الماتى قالاسى المالى اۋداندىق سوتىنىڭ سۋدياسى قايرات يمانقۇلوۆتىڭ شەشىمىمەن الماتى وبلىسى ەڭبەكشىقازاق اۋدانى ەسىك قالاسىنىڭ تۇرعىندارى باقىت وڭتاي مەن وجەت جەڭىسحان 5 جىلعا سوتتاپ، جازالارىن قاۋىپسىزدىگى ورتاشا رەجيمدەگى تۇزەۋ مەكەمەسىندە وتەۋگە كەسكەن. ەكەۋى دە 1999 جىلى تۋعان، 22 جاستا. بۇل تۋرالى ازاتتىققا سوتتالۋشىلاردىڭ تۋىستارى حابارلادى، دەپ جازادى "ادىرنا" ۇلتتىق پورتالى.
باقىت وڭتاي مەن وجەت جەڭىسحان جونىندەگى تەرگەۋ 26 قاڭتاردا اياقتالىپ، قىلمىستىق ءىس 1 اقپاندا سوتقا تۇسكەن، سوت ۇكىمى 17 اقپاندا شىققان.
قاڭتار كوتەرىلىسىنە بايلانىستى كوپتەگەن ازاماتتار ۇستىنەن قىلمىستىق ءىس قوزعالعانىمەن، ازىرگە سوتقا جەتپەگەن ەدى.
سوتتالۋشىنىڭ ءبىرى باقىت وڭتايدىڭ اناسى اقمارال بايسەيىتوۆا بالاسىن 13 قاڭتاردا ەڭبەكشىقازاق اۋداندىق پوليتسيا ءبولىمىنىڭ قىزمەتكەرلەرى الىپ كەتكەنىن ايتادى.
- 13 قاڭتاردىڭ كەشىندە كولىگىنە بەنزين قۇيۋ ءۇشىن شىققان. تۇنگى 23:00 شاماسىندا بالامدى الىپ ءبىر توپ پوليتسەي كەلىپ، ءۇيدى ءتىنتتى. بالامدى قايتا اكەتتى، سودان كەيىن كورمەدىم. ءۇش كۇننەن كەيىن ادۆوكات قۇرالاي قالياسقاروۆا بالامنىڭ ۇستىنەن قارۋ-جاراق ۇرلاۋعا قاتىستى ءىس قوزعالعانىن ايتتى،- دەيدى.
باقىت وڭتاي مەن وجەت جەڭىسحانعا مەملەكەت بەكىتكەن ادۆوكات قۇرالاي قالياسقاروۆانىڭ سوزىنشە، ولارعا قىلمىستىق كودەكستىڭ 291 بابى 3 بولىگى بويىنشا ("قارۋدى، وق-دارىلەردi, جارىلعىش زاتتار مەن جارىلىس قۇرىلعىلارىن جىمقىرۋ نە قورقىتىپ الۋ") ايىپ تاعىلعان.
- ايىپتالۋشىلار قىلمىستارىن تولىق مويىنداپ، "الپامىس" دۇكەنىنەن قارۋ-جاراق ۇرلاپ، تاۋعا اپارىپ تىعىپ قويعان جەرلەرىنەن الىپ بەرگەنىن ايتتى،- دەيدى ادۆوكات.
باقىت وڭتاي مەن وجەت جەڭىسحاننىڭ سوتتالعانىن الماتى قالالىق سوتىنىڭ رەسمي وكىلى اباي جارىلقاسىنۇلى دا راستادى. ونىڭ سوزىنشە، قازىرگە دەيىن قاڭتار وقيعاسىنا بايلانىستى 18 ءىس قارالىپ، سوت شەشىمى شىققان. "كىناسىن مويىنداپ، شىعىندى وتەگەنى ءۇشىن" كوبىنە بوستاندىعىن شەكتەۋ جازاسى بەلگىلەنگەن.
2022 جىلى قاڭتاردىڭ باسىندا گاز باعاسىن 50 تەڭگەدەن اسىرماۋ تۋرالى تالاپپەن ەرەۋىلگە شىققان جاڭاوزەن تۇرعىندارىن قولداۋ ءۇشىن قازاقستاننىڭ كوپتەگەن ايماعىندا باستالعان اكتسيالار بىرتىندەپ ساياسي تالاپ قويعان نارازىلىققا ۇلاسقان. رەسمي مالىمەت بويىنشا، 227 ادام وسى وقيعادا قازا بولعان.
وسى وقيعادان كەيىن قۇقىق قورعاۋ ورگاندارى ءتۇرلى ايىپتارمەن ازاماتتاردى ۇستاپ، قاماۋدى باستاعان. قامالعانداردى ازاپتاپ، "قىلمىسىن" كۇشپەن مويىنداتىپ جاتقانى جايلى حابار كوبەيگەن. باس پروكۋراتۋرانىڭ 16 اقپانداعى مالىمەتىنە قاراعاندا قۇقىق قورعاۋ ورگاندارىنىڭ ارەكەتىنە بايلانىستى 363 شاعىم تۇسكەن، ازاپتاۋ جانە تەرگەۋدىڭ زاڭسىز ادىستەرى بويىنشا 178 قىلمىستىق ءىس اشىلعان.
باس پروكۋراتۋرا مالىمەتىنە قاراعاندا، قاڭتار وقيعاسىنا بايلانىستى سوتقا دەيىنگى 3096 ءىس تىركەلگەن. ارنايى پروكۋرورلار "جاپپاي تارتىپسىزدىك جانە تەرروريزم اكتىسى" بويىنشا 181 ءىستى تەرگەپ جاتىر. 741 كۇدىكتى سوت سانكتسياسىمەن قاماۋعا الىنعان. 157 كۇدىكتىنىڭ بۇلتارتپاس شاراسى دەنساۋلىعى جانە وزگە جايتتارعا بايلانىستى قاماۋمەن بايلانىستى ەمەس شارا تۇرىمەن الماستىرىلعان.
"ادىرنا" ۇلتتىق پورتالى
