رەسەي مەن ۋكراينا اراسىنداعى شيەلەنىس شارىقتاۋ شەگىنە جەتتى. رەسەي تاراپى ناقتى قادامدارعا كوشە باستادى. 17-اقپان كۇنى رەسەي قولداۋىنا يە ۋكراينا شىعىسىنداعى سەپاراتيستەر ۋكراينا اۋماعىن تولاسسىز ارتيللەريالىق سوققىنىڭ استىنا الدى. زىمىراندار بالاباقشالار مەن مەكتەپتەرگە دە تيگەن. بۇل اگرەسسيانى تۇتاس الەم كوردى، سەبەبى الەمنىڭ جەتەكشى مەديالارى وقيعا ورنىنان حابار تاراتتى، اقپارات بەردى.
رەسەي اقپارات كوزدەرى شىندىقتى بۇرمالاپ كورسەتتى. ولار ۋكراينا "مينسك كەلىسىمدەرىن" بۇزىپ، قارۋ قولدانۋدا دەپ اتادى. وسىلايشا ءوز اۋديتورياسىنا ارنالعان جالعان اقپاراتتار لەگىن ەسەلەپ ارتتىردى. كرەمل ۋكراينا شىعىسىنا باسىپ كىرۋ ءۇشىن سەبەپ ىزدەۋدە. دونباسستا جاپپاي گەنوتسيد بولۋدا دەگەن ءسوز تاراتىپ، ارتىنشا قورىمدار تابىلعانىن ايتتى. الايدا ناقتىلى دەرەكتەردى كورسەتە المادى. ارتىنشا ۋكراينا سوققى جاساپ، كەلىسىمدى بۇزدى دەدى. ال 18-اقپان كۇنى ۋكراينا وپەراتسيا باستايدى دەگەن جەلەۋمەن سەپاراتيستىك ايماقتار حالىقتى رەسەيگە اكەتە باستادى. سوڭعى مالىمەت بويىنشا 700 مىڭعا جۋىق ادام رەسەيگە ەۆاكۋاتسيالانباق. دونباسستان 18-55 جاس ارالىعىنداعى ەر ازاماتتاردىڭ شىعۋىنا تىيىم سالىنعان.
وسىلايشا رەسەي سوعىس قيمىلدارىن باستاۋعا دايىن. ۋكرايناعا ناتو ەلدەرى قارۋمەن كومەك كورسەتۋدە، ال الەمدىك دەڭگەيدە رەسەي اگرەسسياعا كوشسە اگرەسسوردى تولىق وقشاۋلاۋ مەن اۋىر ەكونوميكالىق سانكتسيالار سالىناتىنى ايتىلۋدا. سوعان قاراماستان رەسەي ۋكراينانى ءتورت باعىتتا قورشاۋعا الدى. شىعىسىندا رەسەي مەن سەپاراتيستەر قولىنداعى دونباسس، باتىسىندا رەسەيدىڭ قولداۋىمەن ءومىر ءسۇرىپ كەلە جاتقان سەپاراتيستىك پريدنەستروۆە، سولتۇستىگىندە بەلارۋس، ال وڭتۇستىگى وككۋپاتسياداعى قىرىم مەن قارا تەڭىزدەگى رەسەي فلوتى.
ساراپشىلار ۇرىس قيمىلدارى باستالسا، رەسەي جىلدام ارادا ۋكراينا قالالارىن الاتىنىن ايتۋدا. الايدا سوعىس قالالاردى العانمەن بىتپەيتىنىن، ۇزاققا سوزىلعان پارتيزاندىق سوعىس باستالاتىنى دا بولجامدى.
اسحات قاسەنعالي
"ادىرنا" ۇلتتىق پورتالى
