بۇگىن الماتى وبلىسىنىڭ اكىمى قانات بوزىمباەۆ وڭىردە جانە الماتى قالاسىندا تىركەلگەن قۇرىلىس كومپانيالارىنىڭ وكىلدەرىمەن كەزدەسىپ، قۇرىلىس جۇمىستارىنىڭ ساپاسىن ارتتىرۋ جانە جەرگىلىكتى ماتەريالداردى قولدانۋ تۋرالى ماسەلەلەردى تالقىلادى.
وبلىستىق قۇرىلىس باسقارماسىنىڭ باسشىسى داۋرەن جولجانوۆتىڭ ايتۋىنشا، قۇرىلىس جۇمىستارىن جۇرگىزىپ جاتقان 83 مەردىگەر مەكەمەنىڭ 32-ءسى عانا الماتى وبلىسىندا تىركەلگەن. وزگە وبلىستاردان كەلىپ جۇمىس ىستەيتىن مەكەمەلەردىڭ قۇرىلىس كولەمىندەگى ۇلەسى 61,5%، قارجىلاندىرۋدىڭ 60% وسى مەكەمەلەرگە باعىتتالعان. كەزدەسۋدە وبلىستىق مەملەكەتتىك ساۋلەت-قۇرىلىس باقىلاۋ باسقارماسىنىڭ باسشىسى دانيار ابدىبەكوۆ قۇرىلىس جۇمىستارىنىڭ زاڭدىلىعى مەن ساپاسىن باقىلاۋدا انىقتالعان مەردىگەر ۇيىمداردىڭ ءجيى جول بەرەتىن ورتاق كەمشىلىكتەرىنە توقتالدى.
قانات بوزىمباەۆ ءوز سوزىندە، جەرگىلىكتى جەردە شىعاتىن ماتەريالداردى قولدانۋ مىندەتتى تالاپ بولۋى كەرەك. بۇل - ءبىر جاعىنان جەرگىلىكتى كاسىپكەرلەردى قولداۋ، ەكىنشى جاعىنان قۇرىلىس جۇمىستارىنىڭ قىمباتقا تۇسپەۋىنە ىقپال ەتەدى. ەندىگى جەردە قۇرىلىس نىساندارى تيپتىك ۇلگىدە جۇرگىزىلىپ، قۇنى تىم جوعارى جوبالارعا جول بەرىلمەيدى. بيۋدجەت قارجىسىن ءتيىمدى جۇمساۋىمىز كەرەك ەكەندىگىن ايتتى.
سونداي-اق، كەزدەسۋدە قۇرىلىس كومپانيالارى، اۆتورلىق جانە تەحنيكالىق قاداعالاۋ، جوبالاۋ مەكەمەلەرىنىڭ وكىلدەرى پىكىر الماسىپ، ورتاق ماسەلەلەرىن تالقىلادى.
