Búgin Almaty oblysynyń ákimi Qanat Bozymbaev óńirde jáne Almaty qalasynda tirkelgen qurylys kompanııalarynyń ókilderimen kezdesip, qurylys jumystarynyń sapasyn arttyrý jáne jergilikti materıaldardy qoldaný týraly máselelerdi talqylady.
Oblystyq qurylys basqarmasynyń basshysy Dáýren Joljanovtyń aıtýynsha, qurylys jumystaryn júrgizip jatqan 83 merdiger mekemeniń 32-si ǵana Almaty oblysynda tirkelgen. Ózge oblystardan kelip jumys isteıtin mekemelerdiń qurylys kólemindegi úlesi 61,5%, qarjylandyrýdyń 60% osy mekemelerge baǵyttalǵan. Kezdesýde oblystyq memlekettik sáýlet-qurylys baqylaý basqarmasynyń basshysy Danııar Ábdibekov qurylys jumystarynyń zańdylyǵy men sapasyn baqylaýda anyqtalǵan merdiger uıymdardyń jıi jol beretin ortaq kemshilikterine toqtaldy.
Qanat Bozymbaev óz sózinde, jergilikti jerde shyǵatyn materıaldardy qoldaný mindetti talap bolýy kerek. Bul - bir jaǵynan jergilikti kásipkerlerdi qoldaý, ekinshi jaǵynan qurylys jumystarynyń qymbatqa túspeýine yqpal etedi. Endigi jerde qurylys nysandary tıptik úlgide júrgizilip, quny tym joǵary jobalarǵa jol berilmeıdi. Bıýdjet qarjysyn tıimdi jumsaýymyz kerek ekendigin aıtty.
Sondaı-aq, kezdesýde qurylys kompanııalary, avtorlyq jáne tehnıkalyq qadaǵalaý, jobalaý mekemeleriniń ókilderi pikir almasyp, ortaq máselelerin talqylady.
