«شىمكەنت قالاسى بويىنشا 48 623 ازامات تۇرعىن ءۇي الۋ كەزەگىنە تىركەلگەن. بيىل باسپانا كەزەگىندەگى 1605 ازاماتتى ساتىپ الۋ قۇقىنسىز جالعا بەرىلەتىن تۇرعىنجايمەن قامتاماسىز ەتۋ، ال 2096 ازاماتقا كرەديتتىك تۇرعىنۇي باعىتىمەن باسپانا بەرۋ جوسپارلانىپ وتىر. وسى جىلدىڭ ناۋرىز-ءساۋىر ايلارىندا 260 وتباسىن «باقىتتى وتباسى» باعدارلاماسى اياسىندا باسپانامەن قامتۋ ءۇشىن ليميت بولىنبەك». بۇل تۋرالى شىمكەنت قالاسى اكىمدىگىنىڭ اقپاراتتىق-كوممۋنيكاتسيالىق ورتالىعىندا وتكەن بريفينگ بارىسىندا قالالىق تۇرعىن ءۇي باسقارماسىنىڭ باسشىسى عالىمجان ۋتەنباەۆ مالىمدەدى.
باسقارما باسشىسىنىڭ مالىمدەۋىنشە، شىمكەنت قالاسى بويىنشا تۇرعىن ءۇي الۋ تىزىمىندە 48 623 ازامات بار. ونىڭ 1819-ى جەتىم جانە اتا-اناسىنىڭ قامقورلىعىنسىز قالعان بالالار بولسا، 9186-سى كوپبالالى وتباسىلار. ال، حالىقتىڭ الەۋمەتتىك جاعىنان ءالسىز توبى ساناتىندا ¬¬- 16 957, جالعىز تۇرعىن ءۇيى اپاتتى جاعدايدا دەپ تانىلعان 27 ازامات بار. مۇندا مەملەكەتتىك قىزمەتشىلەر، بيۋدجەتتىك ۇيىم مەن اسكەريلەر سانى 20 620 634-ءتى قۇراپ وتىر.
- اشىقتىقتى قامتاماسىز ەتۋ ماقساتىندا رەسپۋبليكالىق بىرىڭعاي ەلەكتروندى دەرەكقوردىڭ كومەگىمەن 1991 ازامات تۇرعىن ءۇي الۋ تىزىمىنەن شىعارىلعان. ولاردىڭ ىشىندە يەلىگىندە تۇرعىن ءۇي تىركەلگەن، باسقا ەلدى-مەكەنگە قونىس اۋدارعان، ساناتىن جوعالتقان جانە قايتىس بولعان ازاماتتار بار. سونداي-اق، 2021 جىلى 976 وتباسىن ارەندالىق پاتەرمەن قامتۋ جوسپارلانىپ، جىل سوڭىندا ونىڭ 812-ءسى باسپانالى بولدى. ونىڭ ىشىندە جەتىم بالالارعا – 60, كوپبالالى وتباسىلارعا – 240, حالىقتىڭ الەۋمەتتىك جاعىنان ءالسىز توبىنا – 212, جۇمىس ىستەيتىن جاستارعا – 300 پاتەردىڭ كىلتى تابىستالدى. ال، قالعان 164 پاتەر «قۇرىلىسى اياقتالعان كوپقاباتتى تۇرعىن ۇيلەردى شىمكەنت قالاسىنىڭ كوممۋنالدىق مەنشىگىنە قابىلداۋ تۋرالى» شىمكەنت قالاسى اكىمدىگىنىڭ قاۋلىسىنا سايكەس بەرىلمەك. قاۋلى نەگىزىندە شىمكەنت قالاسى قۇرىلىس باسقارماسى تاراپىنان ءنۇرسات تۇرعىن ءۇي الابىندا ورنالاسقان ۇيلەردىڭ قابىلداۋ-وتكىزۋ اكتىلەرى ازىرلەنىپ، مەملەكەتتىك تىركەۋ جۇمىستارى جۇرگىزىلۋدە. اتالعان ارەندالىق پاتەرلەر بيىل پايدالانۋعا بەرىلەدى، -دەيدى عالىمجان امىربەكۇلى.
مامانداردىڭ ايتۋىنشا، تۇرعىن ءۇي كەزەگىنە تىركەلگەن 1,2 توپ مۇگەدەكتەرى، جەتىم بالالار مەن كوپبالالى وتباسىلار، مۇگەدەك بالانى تاربيەلەۋشى وتباسىلارعا 2022 جىلدىڭ مامىر ايىنان باستاپ تۇرعىنجايدى جالداۋ اقىسىن سۋبسيديالاۋ تەتىگى ەنگىزىلمەك.
- بيىل قازاقستان رەسپۋبليكاسى ۇكىمەتى جەكە تۇرعىن ءۇي قورىنان تۇرعىنجايدى جالداۋ اقىسىن سۋبسيديالاۋ تەتىگىن ىسكە قوسپاق. بۇگىندە ەڭبەك جانە الەۋمەتتىك قورعاۋ مينيسترلىگى مەن يندۋستريا جانە ينفراقۇرىلىمدىق دامۋ مينيسترلىگىنىڭ الدىن-الا انىقتاعان مالىمەتىنە سايكەس، شىمكەنت قالاسى بويىنشا سۋبسيديا الاتىن 8841 وتباسى انىقتالىپ وتىر،-دەدى باسقارما باسشىسى.
ايتا كەتەيىك، 2022 جىلعا تۇرعىن ءۇي سەرتيفيكاتتارىن بەرۋ ءۇشىن جەرگىلىكتى بيۋدجەتتەن 500 ميلليون تەڭگە قارجى قارالعان.
