«Shymkent qalasy boıynsha 48 623 azamat turǵyn úı alý kezegine tirkelgen. Bıyl baspana kezegindegi 1605 azamatty satyp alý quqynsyz jalǵa beriletin turǵynjaımen qamtamasyz etý, al 2096 azamatqa kredıttik turǵynúı baǵytymen baspana berý josparlanyp otyr. Osy jyldyń naýryz-sáýir aılarynda 260 otbasyn «Baqytty otbasy» baǵdarlamasy aıasynda baspanamen qamtý úshin lımıt bólinbek». Bul týraly Shymkent qalasy ákimdiginiń aqparattyq-kommýnıkaııalyq ortalyǵynda ótken brıfıng barysynda qalalyq turǵyn úı basqarmasynyń basshysy Ǵalymjan Ýtenbaev málimdedi.
Basqarma basshysynyń málimdeýinshe, Shymkent qalasy boıynsha turǵyn úı alý tiziminde 48 623 azamat bar. Onyń 1819-y jetim jáne ata-anasynyń qamqorlyǵynsyz qalǵan balalar bolsa, 9186-sy kópbalaly otbasylar. Al, halyqtyń áleýmettik jaǵynan álsiz toby sanatynda ¬¬- 16 957, jalǵyz turǵyn úıi apatty jaǵdaıda dep tanylǵan 27 azamat bar. Munda memlekettik qyzmetshiler, bıýdjettik uıym men áskerıler sany 20 620 634-ti qurap otyr.
- Ashyqtyqty qamtamasyz etý maqsatynda respýblıkalyq biryńǵaı elektrondy derekqordyń kómegimen 1991 azamat turǵyn úı alý tiziminen shyǵarylǵan. Olardyń ishinde ıeliginde turǵyn úı tirkelgen, basqa eldi-mekenge qonys aýdarǵan, sanatyn joǵaltqan jáne qaıtys bolǵan azamattar bar. Sondaı-aq, 2021 jyly 976 otbasyn arendalyq pátermen qamtý josparlanyp, jyl sońynda onyń 812-si baspanaly boldy. Onyń ishinde jetim balalarǵa – 60, kópbalaly otbasylarǵa – 240, halyqtyń áleýmettik jaǵynan álsiz tobyna – 212, jumys isteıtin jastarǵa – 300 páterdiń kilti tabystaldy. Al, qalǵan 164 páter «Qurylysy aıaqtalǵan kópqabatty turǵyn úılerdi Shymkent qalasynyń kommýnaldyq menshigine qabyldaý týraly» Shymkent qalasy ákimdiginiń qaýlysyna sáıkes berilmek. Qaýly negizinde Shymkent qalasy qurylys basqarmasy tarapynan Nursát turǵyn úı alabynda ornalasqan úılerdiń qabyldaý-ótkizý aktileri ázirlenip, memlekettik tirkeý jumystary júrgizilýde. Atalǵan arendalyq páterler bıyl paıdalanýǵa beriledi, -deıdi Ǵalymjan Ámirbekuly.
Mamandardyń aıtýynsha, turǵyn úı kezegine tirkelgen 1,2 top múgedekteri, jetim balalar men kópbalaly otbasylar, múgedek balany tárbıeleýshi otbasylarǵa 2022 jyldyń mamyr aıynan bastap turǵynjaıdy jaldaý aqysyn sýbsıdııalaý tetigi engizilmek.
- Bıyl Qazaqstan Respýblıkasy Úkimeti jeke turǵyn úı qorynan turǵynjaıdy jaldaý aqysyn sýbsıdııalaý tetigin iske qospaq. Búginde Eńbek jáne áleýmettik qorǵaý mınıstrligi men Indýstrııa jáne ınfraqurylymdyq damý mınıstrliginiń aldyn-ala anyqtaǵan málimetine sáıkes, Shymkent qalasy boıynsha sýbsıdııa alatyn 8841 otbasy anyqtalyp otyr,-dedi basqarma basshysy.
Aıta keteıik, 2022 jylǵa turǵyn úı sertıfıkattaryn berý úshin jergilikti bıýdjetten 500 mıllıon teńge qarjy qaralǵan.
