قر ەڭبەك جانە حالىقتى الەۋمەتتىك قورعاۋ مينيسترلىگى زەينەتكەرلىك جاس الدىنداعى جۇمىسسىز ادامداردى جۇمىسپەن قامتۋ ماقساتىندا «كۇمىس جاس» ارنايى جوباسىن ىسكە قوسۋدى جوسپارلاپ وتىر. باستامانى ىسكە اسىرۋ 2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا شەڭبەرىندە جۇرگىزىلەتىن بولادى، دەپ حابارلايدى "ادىرنا" ۇلتتىق پورتالى.
جىل سايىن جوبا 5 مىڭ ادامدى قامتيدى دەپ كۇتىلۋدە.
- قازىرگى ۋاقىتتا «كۇمىس جاس» جوباسىن ۇيىمداستىرۋ جانە قارجىلاندىرۋ ءتارتىبىن رەگلامەنتتەيتىن نورماتيۆتىك قۇقىقتىق اكتىنى (بۇدان ءارى – نقا) ازىرلەۋ بويىنشا جۇمىس جۇرگىزىلۋدە. نقا-دا جۇمىس بەرۋشىلەر مەن قىزمەتكەرلەرگە قويىلاتىن بىرقاتار تالاپتار كوزدەلەتىن بولادى. وسىلايشا، جوباعا ءبىر جىلدان استام ۋاقىت بويى جۇمىس ىستەپ كەلە جاتقان جانە تۇراقتى سالىق جانە باسقا دا الەۋمەتتىك اۋدارىمدار جۇرگىزەتىن، سونداي-اق جالاقى بويىنشا مەرزىمى وتكەن بەرەشەگى جوق بارلىق مەنشىك نىسانىنداعى كاسىپورىندار مەن ۇيىمدار قاتىسادى، - دەلىنگەن قر ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمدەمەسىندە.
«كۇمىس جاس» جوباسى بويىنشا جۇمىس ورىندارى تۇراقتى جۇمىس ورىندارىنان تىس جانە تۇراقتى جۇمىس ورىندارىنا ارنالعان بوس جۇمىس ورىندارىنان تىس قۇرىلاتىن بولادى. مۇنداي جۇمىس ورىندارى اۋىر جۇمىستاردا، ەڭبەك جاعدايلارى زياندى جانە (نەمەسە) قاۋىپتى جۇمىستاردا جانە ۇلتتىق كاسىپتەر سىنىپتاۋىشىنا سايكەس بىلىكتىلىگى تومەن قىزمەتكەرلەردىڭ 9-توبىنا جاتاتىن ماماندىقتار/كاسىپتەر بويىنشا قۇرىلا المايدى.
«كۇمىس جاس» جوباسىنا قاتىسۋ مەرزىمى 12 ايدان اسپايدى جانە قاتىسۋ كەزەڭىندە حالىقتى جۇمىسپەن قامتۋ ورتالىعى زەينەت جاسى الدىنداعى ادامدار جالاقىسىنىڭ ءبىر بولىگىن بيۋدجەت قاراجاتى ەسەبىنەن سۋبسيديالايدى.
- جالاقىعا بەرىلەتىن اي سايىنعى سۋبسيديا مولشەرى جالاقى مولشەرىنىڭ 50% - ىن قۇرايدى، بىراق ەكولوگيالىق ۇستەمەاقىلار بويىنشا تولەمدەردى ەسەپكە الماعاندا، سالىقتاردى، مىندەتتى الەۋمەتتىك اۋدارىمداردى، پايدالانىلماعان ەڭبەك دەمالىسىنا وتەماقىلاردى جانە بانك قىزمەتتەرىن ەسكەرە وتىرىپ، 30 اەك-تەن اسپايدى. قاتىسۋ مەرزىمى اياقتالعاننان كەيىن جۇمىس بەرۋشى زەينەتكەرلىك جاس الدىنداعى ادامدى زەينەتكەرلىككە شىققانعا دەيىن تۇراقتى جۇمىس ورنىنا جۇمىسقا ورنالاستىرادى،- دەپ ءتۇسىندىردى مينيسترلىك.
"ادىرنا" ۇلتتىق پورتالى
