اقوردادا پرەزيدەنت توراعالىعىمەن قاۋىپسىزدىك كەڭەسىنىڭ شۇعىل كەڭەسى ءوتتى، دەپ حابارلايدى "ادىرنا" ۇلتتىق پورتالى.
- جيىندا ۇلتتىق قاۋىپسىزدىكتىڭ بىرقاتار وزەكتى ماسەلەسى قاراستىرىلدى. قاۋىپسىزدىك كەڭەسىنىڭ توراعاسى قاسىم-جومارت توقاەۆ ءوز سوزىندە ازاماتتاردىڭ كونستيتۋتسيالىق قۇقىقتارىن قورعاۋ ءبىرىنشى كەزەكتەگى مىندەت ەكەنىن اتاپ ءوتتى، - دەلىنگەن حابارلامادا.
باس پروكۋرور عيزات نۇرداۋلەتوۆ «قاسىرەتتى قاڭتار» وقيعاسىنا قاتىستى تەرگەۋ جۇمىستارىنىڭ بارىسى تۋرالى باياندادى. ونىڭ ايتۋىنشا، قازىرگى ۋاقىتتا 3024 قىلمىستىق ءىس بويىنشا تەرگەۋ امالدارى جۇرگىزىلۋدە. ارناۋلى پروكۋرورلاردىڭ باسشىلىعىمەن ۆەدومستۆوارالىق تەرگەۋ توبى جاپپاي تارتىپسىزدىكتەر مەن تەررورلىق اكتىلەر بويىنشا 177 ءىستى قاراپ جاتىر.
پروكۋراتۋرا ورگاندارىنىڭ مالىمەتى بويىنشا 779 ادام قاماۋدا وتىر. ولاردىڭ اراسىندا ۇيىمداسقان قىلمىستىق توپتاردىڭ 24 مۇشەسى بار. 113 ادام كىسى ءولتىرۋ، ۇرلىق، توناۋشىلىق جانە قاراقشىلىق ارەكەتتەرى ءۇشىن بۇرىن سوتتالعان. ۇستالعانداردىڭ تۇلعالارى انىقتالعان سوڭ، سونداي-اق دەنساۋلىق جاعدايلارىنا بايلانىستى جانە باسقا دا ماتەريالدار بويىنشا 109 ازاماتتىڭ قاماۋعا الۋ جازاسى كەتىپ قالماۋ جونىندەگى قولحاتپەن جانە جەكە كەپىلدىك بەرۋمەن الماستىرىلعان. پروكۋرورلار ازاماتتاردىڭ تارتىپسىزدىككە قاتىسى بار ەكەنى دالەلدەنبەگەنىن نەگىزگە الا وتىرىپ، تاعى دا 103 ادامدى بوساتقان. ۇستالعانداردى ازاپتاۋ تۋرالى ءاربىر حابارلاما ءجىتى تەكسەرىلەدى. پروكۋرورلار ادۆوكاتتارمەن، قۇقىق قورعاۋشىلارمەن جانە ادام قۇقىقتارى جونىندەگى ۋاكىلمەن ءاردايىم بايلانىستا. ولارعا تەرگەۋ يزولياتورلارىنا، ۋاقىتشا ۇستاۋ يزولياتورلارىنا جانە ۇستالۋ سەبەبىن انىقتايتىن ارناۋلى ورىندارعا كىرۋگە مۇمكىندىك بەرىلگەن، - دەدى عيزات نۇرداۋلەتوۆ.
جالپى پروكۋراتۋراعا ۇستالعاندار تاراپىنان 305 شاعىم تۇسكەن. قۇقىق بۇزۋشىلىققا قاتىستى 62 شاعىم راستالمادى. ازاپتاۋ جانە بيلىگىن اسىرا پايدالانۋ دەرەگى بويىنشا 170 قىلمىستىق ءىس قوزعالدى.
ءاربىر ءىستى ەگجەي-تەگجەيلى تەكسەرەمىز جانە بۇلتارتپاس دالەلدەر بولعان جاعدايدا عانا كىنالىلەردى جاۋاپكەرشىلىككە تارتامىز، – دەدى باس پروكۋرور.
سونىمەن قاتار كەڭەستە ۇلتتىق قاۋىپسىزدىك كوميتەتىنىڭ توراعاسى، ىشكى ىستەر ءمينيسترى، قورعانىس ءمينيسترى جانە پرەمەر-ءمينيستردىڭ ورىنباسارى – سىرتقى ىستەر ءمينيسترى بايانداما جاسادى.
پرەزيدەنت كەڭەستى قورىتىندىلاي كەلە، قاڭتار وقيعاسى بويىنشا مۇقيات جانە شىنايى تەكسەرۋ جۇرگىزۋ، ۇستالعان ازاماتتاردىڭ قۇقىقتارىن قورعاۋ، تەكسەرۋ بارىسى تۋرالى حالىققا ۋاقتىلى اقپارات بەرۋ جونىندە مەملەكەتتىك ورگاندارعا تاپسىرما بەردى.
"ادىرنا" ۇلتتىق پورتالى
