"قازاقستان حالقىنا" قورىنا 13 مىڭنان استام ءوتىنىش تۇسكەن. جالپى، بۇگىندە قوردا 115 ميلليارد تەڭگەدەن استام قاراجات جيناقتالعان. قور قىزمەتكەرلەرى قازاقستاندىقتاردىڭ قانداي ماقساتتا اقشا ءبولۋدى سۇرايتىندارى جايلى ايتتى، دەپ حابارلايدى “ادىرنا” ۇلتتىق پورتالى Stan.kz سايتىنا سىلتەمە جاساپ.
قازاقستاندىقتار Qazaqstanhalqyna.kz سايتى ارقىلى ءوتىنىش بەرە الادى، قازىرگە دەيىن قورعا 13 مىڭنان استام ءوتىنىش تۇسكەن. اراسىندا وتباسىلىق جانە مەرەكەلىك شاراعا اقشا سۇراعاندار دا بار.
"سايت پەن الەۋمەتتىك جەلىدەگى مەسسەندجەرلەرگە ءۇي، كولىك ساتىپ الۋ، كرەديت جانە باسقا دا قارجىلىق زايمدار بويىنشا مىندەتتەمەلەردى تولەۋ، وتباسىلىق ءىس-شارالار مەن مەرەكەلىك شارالاردىڭ قاراجاتىن وتەۋ تۋرالى وتىنىشتەر ءالى دە ءتۇسىپ جاتىر", - دەلىنگەن اقپاراتتا.
"قازاقستان حالقىنا" قورى ازاماتتاردىڭ قارجىلىق ماسەلەسى بولۋى مۇمكىن ەكەنىن تۇسىنەتىنىن جەتكىزدى. الايدا ونىڭ بارلىعىن قور شەشە المايدى. سەبەبى قوردىڭ بەكىتىلگەن تۇجىرىمداماسىنا سايكەس قارجى سابيلەرگە مەديتسينالىق قىزمەت كورسەتۋدى دامىتۋعا جانە ونىڭ قولجەتىمدى بولۋىن ارتتىرۋعا، سپورت جانە ءبىلىم بەرۋ نىساندارى مەن بالالارعا ارنالعان باسقا دا الەۋمەتتىك ماڭىزى بار قىزمەتتەرگە جۇمسالادى.
سونداي-اق قور مۇگەدەك، ناۋقاس بالانى اسىراپ العان، قامقورلىق نەمەسە پاتروناتتىق تاربيەنى ۇيىمداستىرعان وتباسىلارعا كومەك كورسەتۋمەن اينالىسادى.
قازاقستاننىڭ اۋماق تۇتاستىعى مەن قاۋىپسىزدىگىن قورعاۋ نەمەسە ادامداردىڭ ءومىرىن ساقتاپ قالۋ جانە زارداپ شەككەن تۇرعىندارعا كومەك كورسەتۋ كەزىندە قايتىس بولعان نەمەسە اۋىر جاراقات العان قۇقىق قورعاۋ ورگاندارى، ارنايى ورگاندار، ۇقك قىزمەتكەرلەرىنىڭ وتباسىلارىنا، اسكەري قىزمەتشىلەرىنە، توتەنشە جاعدايلار كەزىندە زارداپ شەككەن ادامدارعا قولداۋ كورسەتەدى.
