رەسەيدىڭ كەمەر قالاسىنداعى قايعىلى وقيعا تالايدىڭ قابىرعاسىن قايىستىردى. قانشاما بالا اي-كۇننىڭ امانىندا تىرىدەي وتقا ورتەندى. ولاردىڭ كەيبىرى اجالدىڭ تاياپ قالعانىن سەزىپ، اتا-انالارىنا حابارلاسىپ، قوشتاسىپ ۇلگەرىپتى. قارشاداي بالالار ءومىر مەن ءولىم اراسىندا ارپالىسىپ، قاس پەن كوزدىڭ اراسىندا و دۇنيەگە اسىعىس كەتە باردى.
«تاس تۇسكەن جەرىنە اۋىر» دەمەكشى، بەيبىت زاماندا الدىندا قۇلدىراڭداپ جۇرگەن بالاسىنان قاس-قاعىم ساتتە كوز جازىپ قالۋ – ۇلكەن قاسىرەت. دوس تۇرماق، دۇشپاننىڭ باسىنا تىلەمەيتىن جاعداي. ءتىلسىز جاۋدىڭ تالاي قىرشىن جاستىڭ ءومىرىن جالماعانى – اتا-انانىڭ جۇرەگىن بىرگە جۇلىپ العانداي. جانىن شۇبەرەككە تۇيگەن شاراسىز جانداردىڭ باسىنداعى اۋىر كۇي كىم-كىمگە دە وڭاي سوقپاسى انىق.
شىن مانىندە، «زيمنيايا ۆيشنيا» ساۋدا ۇيىنەن شىققان ءورت وقيعاسىن رەسەيدىڭ رەسمي اقپارات قۇرالدارى تىم كەش تاراتقان. ءورت ەكى كۇن بويى اۋىزدىقتالماعانى ايتىلدى. وقيعا ورنىنا جەتكەن قۇزىرلى ورگاندار ءىستىڭ اق-قاراسىن زەرتتەۋگە كىرىسىپ كەتكەندە عانا جۇرت قۇلاعدار بولدى. نەگە؟
ىلە-شالا كەمەر قالاسى اكىمدىگى عيماراتى الدىنا جينالعان توپ اپاتتى وقيعانىڭ انىق-قانىعىن تەزدەتىپ تەكسەرۋگە شاقىرسا، بازبىرەۋلەر كەمەر وبلىسىنىڭ گۋبەرناتورى امان تولەەۆتىڭ قىزمەتىنەن كەتۋىن سۇرادى. ءوزى دە دەنساۋلىعىنا بايلانىستى اۋرۋحانادا جاتقان گۋبەرناتوردىڭ ءورت كەزىندە 11 جاسار نەمەرەسىنىڭ كوز جۇمعانى تۋرالى اقپارات تا تەز تاراعان ەدى. ارينە، قالانىڭ اۋماعىندا بولعان وقيعاعا جەرگىلىكتى بيلىكتىڭ جاۋاپ بەرەتىنى انىق. بىراق اپاتتىڭ ايتىپ كەلمەيتىنىن ەسكەرسەك، سوڭعى جىلدارى رەسەيدە مۇنداي قايعىلى وقيعانىڭ تالايى ورىن الدى. تالاي ۇشاق وتقا وراندى. بىراق رەسەي باق-تارى مەن وزدەرىن قوعام قايراتكەرلەرى سانايتىندار «گۋبەرناتور ورنىنان كەتسىن!» دەپ تالاپ قويعانىن بۇرىن-سوڭدى ەشكىم كورە قويعان جوق ەدى. بۇل جولى ولار نەگە پىسىقتىق تانىتتى؟
كەمەر وبلىسىنىڭ گۋبەرناتورى امان تولەەۆ وتكەن جەكسەنبى كۇنى – 1 ساۋىردە رف پرەزيدەنتى ۆلاديمير پۋتينگە ءوز ەركىمەن قىزمەتىنەن كەتۋ تۋرالى ءوتىنىشىن تاپسىردى. امان تولەەۆ مىرزا كەمەردەگى قايعىلى وقيعادان سوڭ ەڭ دۇرىس شەشىم وسى ەكەنىن مالىمدەگەن. «بۇل ءوزىم ءۇشىن دۇرىس، ساراپقا سالىنعان، ەڭ ءادىل شەشىم دەپ ەسەپتەيمىن، ويتكەنى مۇنداي اۋىر جۇكپەن گۋبەرناتور بولىپ وتىرۋعا بولمايدى، مورالدىق تۇرعىدان مۇمكىن ەمەس»، – دەدى ول. «كەمەروۆودا 25 ناۋرىزدا بولعان جانتۇرشىگەرلىك قايعىلى وقيعاعا قابىرعامىز قايىسىپ وتىر. ءبىز 64 ادامنان ايىرىلدىق، ولاردىڭ كوپشىلىگى – بالالار، ءبىزدىڭ بالالارىمىز. ارقايسىمىز وسىناۋ اۋىر قايعىنى جۇرەگىمىزدەن وتكىزدىك»، – دەگەن امان تولەەۆ قولىنان كەلگەننىڭ ءبارىن ىستەگەنىن ايتتى. «قولىمنان كەلگەننىڭ ءبارىن ىستەدىم، كومەك كورسەتۋ ماسەلەلەرىن شەشۋگە تىرىستىم. زور قايعىعا تاعى ءبىر رەت ورتاقتاستىق بىلدىرەمىن. بىراق ءومىر ءسۇرۋ كەرەك قوي، مارقۇمدار جادىن ساقتاۋ ءۇشىن ءومىر ءسۇرۋ كەرەك. قۇداي الدىنداعى ادالدىعىمدى ايتايىن، ءوز قىزمەتىمدە ارقاشان ەلدىڭ، رەسەيدىڭ مۇددەسىن، وبلىستىڭ مۇددەسىن ويلادىم. بارشاڭىزعا ۇنەمى، قۋانىشىمدا دا، قايعىمدا دا بىرگە بولعاندارىڭىز ءۇشىن تاعى ءبىر رەت راحمەت. تاعزىمىمدى قابىل العايسىزدار»، – دەدى باسىن يگەن گۋبەرناتور.
ءبىر ايتا كەتەرلىگى، دەمالىس كۇنى امان تولەەۆ جاقىندارى قازاعا ۇشىراعان وتباسىلاردان كەشىرىم سۇراپ، قىزمەتتەن كەتەتىندىگى جايىندا مالىمدەگەنى سول-اق ەكەن، رەسەيلىك باق «رەسەي پرەزيدەنتى ۆ.پۋتين امان تولەەۆتىڭ وتستاۆكاسىن قابىلداپ، ونىڭ قۇزىرەتىن مەرزىمىنەن بۇرىن توقتاتۋ تۋرالى بۇيرىققا قول قويدى» دەگەن اقپارات تاراتتى. ءتىپتى، ايماق گۋبەرناتورىنىڭ مىندەتىن ۋاقىتشا اتقارۋ ءىسى ورىنباسارى سەرگەي تسيۆيلەۆكە جۇكتەلىپ، گۋبەرناتور سايلاۋىن وتكىزەتىن كۇن بەلگىلەنگەنىن دە جاريالاپ جاتتى. ەڭ تاڭدانارلىعى، رەسەي ورتالىق سايلاۋ كوميسسياسىنىڭ ءداپ دەمالىس كۇنگى ارەكەتى بولدى: تسيك قۇزباستاعى (كۋزباسس) گۋبەرناتور سايلاۋى 7 قىركۇيەكتە وتەدى دەپ مالىمدەپ ۇلگەردى. تىم كەشىگىپ قالامىز دەپ قاۋىپتەندى مە، الدە سايلاۋ كوميسسياسى جەكسەنبى كۇنى جانتالاسىپ جۇمىس ىستەي مە، ايتەۋىر وسىنى جاريالاۋعا اسىقتى.
انىعىندا، امان تولەەۆتىڭ گۋبەرناتورلىق وكىلەتتىلىگى 2020 جىلى ءبىتۋى ءتيىس ەدى. ودان ءارى بيلىكتە قالۋعا ارى جىبەرمەگەن ازاماتتىڭ بۇل شەشىمىن ناعىز پرينتسيپشىلدىك دەپ باعالاۋ كەرەك شىعار. بىراق رەسەيدىڭ ماسكەۋ وبلىسى، رامەنسك اۋدانىندا ۇشاق اپاتىنان 71 ادام كوز جۇمعاندا دا، يركۋتسك وبلىسىندا «بويارىشنيك» سۇيىقتىعىنان 74 ادام ۋلانىپ، قاپيادا انا دۇنيەگە اتتانىپ كەتە بارعاندا دا جەرگىلىكتى گۋبەرناتوردىڭ ءوز ەركىمەن وتستاۆكاعا ءوتىنىش بەرگەنىن دە، كەتكەنىن دە ەشكىم ەستىگەن جوق. سوندا بۇل تولەەۆتىڭ تالاي جىل سارپ ەتكەن قاجىرلى ەڭبەگىنىڭ ەلەنبەگەنى مە، الدە قازاقتىڭ «وزگە ەلدە سۇلتان بولعانشا، ءوز ەلىڭدە ۇلتان بول» دەگەن ومىرلىك قاعيداسىنىڭ دۇرىس ەكەنىنىڭ دالەلى مە؟ ماڭداي تەر، ەرەن ەڭبەگىنىڭ ارقاسىندا رەسەي حالقىنىڭ اراسىندا ۇلكەن ابىرويعا يە بولىپ جۇرگەن ازاماتتى ءبىر ساتتە وزەكتەن تەبۋ قانشالىقتى دۇرىس؟
تولەەۆتىڭ تىندىرعان ءىسى كوپ
73 جاستاعى امان تولەەۆ كەمەر وبلىسىن 1997 جىلدان بەرى باسقارىپ كەلدى. از ۋاقىت ەمەس. تالاي جىل توككەن تەرى مەن ەتكەن ەڭبەگى ءاپ-ساتتە ەسكەرۋسىز قالعاننان جامانى جوق. جاستايىنان قيىندىققا مويىماي، ەڭبەككە شىنىققان امان تولەەۆ قاراپايىم تەمىرجولشىدان بىلدەي ءبىر وبلىستىڭ گۋبەرناتورلىعىنا دەيىن كوتەرىلگەن ساياسي تۇلعا. وعان ءار سايلاۋدا داۋىس بەرگەن حالىقتىڭ سەنىمىنە سەلكەۋ تۇسكەن جوق. سەبەبى «شاحتەرلىك قۇزباستىڭ ماسەلەسىن تەك قانا تولەەۆ شەشە الادى» دەيتىن اڭگىمەنىڭ جانى بار. امان تولەەۆ گۋبەرناتور بولعان 1997 جىلى قۇزباستا ءوندىرىس وشاقتارى تولىقتاي توقىراۋعا ۇشىراپ، ءبىر جىلدا 43 شاحتا جابىلىپ، 150 مىڭنان استام ادام جۇمىسسىز قالدى. بۇل كەمەر وبلىسىنىڭ ەكونوميكاسىنا ۇلكەن سوققى بوپ ءتيدى. بارلىق سالا شاتقاياقتادى. زەينەتاقى، جاردەماقى، جالاقى ايلاپ كەشىكتى. سونىڭ سالدارىنان قۇزباستىقتار، شاحتەرلەر الاڭعا شىقتى. حالىق بيلىككە سەنىمسىزدىك ءبىلدىردى. بۇنىڭ ارتى قارسىلىققا ۇلاستى. مىنە، وسىنداي كۇردەلى كەزەڭدە وبلىستى باسقارۋ، جوقشىلىقتى، جۇمىسسىزدىقتى جويۋمەن كۇرەسۋ ەكىنىڭ ءبىرىنىڭ قولىنان كەلە بەرمەيتىن شارۋا. قيىندىقتى ەڭسەرگەن ول ءوندىرىس وشاقتارىنىڭ قايتا ىسكە قوسىلۋىنا كۇش سالدى. حالىقتىڭ جاعدايى دا بىرتىندەپ جاقسارا باستادى. امان تولەەۆتىڭ سول ەڭبەگىن كومىر وندىرۋشىلەر ءوز كوزىمەن كوردى. باعالادى، باعالاپ تا ءجۇر. ءبىر وبلىستى 21 جىلدان بەرى باسقارىپ كەلگەنىنىڭ بار قۇپياسى – ەڭبەكتە. ءتىپتى، رەسەيدىڭ تەرگەۋ كوميتەتى كەمەر وبلىسىنىڭ گۋبەرناتورى امان تولەەۆتىڭ ورىنباسارلارى الەكسەي يۆانوۆ پەن الەكسانر دانيلچەنكوعا، سونىمەن قاتار بىرنەشە قىزمەتكەرلەرىنە 1 ميلليارد رۋبلگە باعالانعان «رازرەز «ينسكي» كاسىپورنىنىڭ اكتسيالارىن بوپسالادى دەپ ايىپ تاعىپ، قىلمىستىق ءىس قوزعالعاندا دا ءوزىنىڭ ادالدىعىنا انىق سەندى. ءتىپتى، ورىنباسارلارىنا جالا جابىلسا دا، ولاردى قىزمەتتەرىنەن بوساتپايتىنىن مالىمدەگەنى جۇرت جادىندا. مىنە، بۇدان كەيىن كەيبىر ساراپشىلار: «تولەەۆ – كەمەر وبلىسىنىڭ باسشىلىق سيمۆولى. ول بولماسا، بۇل تۇراقتىلىقتى ساقتاپ قالۋ قيىن» دەپ پىكىر ايتقان بولاتىن.
ول ول ما، امان تولەەۆتىڭ ازاماتتىعىن دا ۇمىتپاعان ءجون. ول لاڭكەستەر جانە قىلمىسكەرلەرمەن بىرنەشە مارتە كەلىسسوز جاساعان ادام. 1991 جىلى ماسكەۋدەگى قىزىل الاڭدا لاڭكەسكە كەپىلدىككە الىنعان قىز بالانىڭ ورنىنا ءوزىن الۋىن وتىنگەن تولەەۆ 1995, 2001 جانە 2009 جىلدارى ءارتۇرلى لاڭكەستىك ارەكەت كەزىندە بەيبىت ازاماتتاردى قۇتقارىپ قالۋ ءۇشىن قولدان كەلگەنىن ايانىپ قالمادى. سونداي ناتيجە بەرگەن كەلىسىمنىڭ ءبىرى – نوۆوكۋزنەتسك پوليتسەيلەرىنىڭ باسىنان وتكەن وقيعا. ءوز پاتەرىندەگى جارىلعىش زات ارقىلى بۇكىل تۇرعىن ءۇيدى جارماق بولعان قىلمىسكەردى قولعا تۇسىرۋدە دە امان تولەەۆتىڭ اسقان شەبەرلىگى كومەككە كەلگەنىن اڭىز قىپ ايتاتىندار ءالى بار.
بىلتىر امان تولەەۆتىڭ دەنساۋلىعى قايتا سىر بەرىپ، جۇرەگىنە، ودان كەيىن كوپ ۇزاماي گەرمانيادا ومىرتقاسىنا ەكىنشى مارتە وتا جاسالدى. دەسەك تە، كەمەر وبلىسى گۋبەرناتورىنىڭ ورنىنان دامەلىلەر وسى جاعدايدىڭ ءبارىن ءوز ماقساتتارىنا پايدالانىپ، امان تولەەۆتىڭ دەنساۋلىعى تۋرالى الىپقاشپا اڭگىمە تاراتتى. اقپارات قۇرالدارى دا بىرەسە «جاعدايى اۋىر» دەپ، بىرەسە «پرەزيدەنتتەن قىزمەتىنەن بوساتۋدى ءوتىنىپتى» دەپ، ءتىپتى «حال ۇستىندە ەكەن» دەپ تە گۋىلدەتتى. ويتكەنى امان تولەەۆتى قاراپايىم حالىق قاتتى قۇرمەتتەگەنىمەن، بيلىكتەن دامەلى توپتار جاقتىرا بەرمەيتىن. سەبەبى اقىل-پاراساتىمەن عانا ەمەس، قيىن-قىستاۋ كەزدەردەگى ەرلىگى، باتىلدىعىمەن بەلگىلى بولعان وبلىس گۋبەرناتورى تالايدى تارتىپكە سالعان ەدى. سوندىقتان وعان بىرنەشە مارتە قاستاندىق جاسالدى، كولىك اپاتىنا ۇرىندىرۋدى كوزدەدى، ول ول ما، اتىپ تا كەتپەك بولدى. بىراق ولاردىڭ ارەكەتتەرىنەن ەشتەڭە شىقپادى.
«رەلس سوعىسى» قالاي توقتاتىلدى؟
ساياساتكەر امان تولەەۆتىڭ ايتۋىنشا، مانساپ باسپالداعىنىڭ ورگە جۇزۋىنە تەمىرجول سالاسىندا ەڭبەك ەتكەن جىلدار سەبەپشى بولعان. ول قاراپايىم جۇمىسشىنىڭ باسىنداعى تۇيتكىلدى ءتۇسىنىپ، قيىن ساتتە قولۇشىن بەرگەن ساتتەردى قيماستىقپەن ەسكە الادى. تيحورەتسك تەمىرجول تەحنيكۋمىن بىتىرگەن تولەەۆ مۇندىباش ەلدى مەكەنىنە جولداما الىپ، العاش رەت كەمەر وبلىسىنا تابانى تيگەندە تەمىرجول ستانتسياسىندا كەزەكشى بولىپ جۇمىس ىستەيدى. اسكەري بورىشىن وتەپ ورالعان سوڭ، ستانتسيا باستىعى ورىنباسارىنىڭ اعا كومەكشىسى قىزمەتىن اتقارىپ، ءبىر جىلدان كەيىن ستانتسيا باستىعى بوپ ءتورت جىل ەڭبەك ەتەدى. مۇندىباشتان باستالعان مانساپ باسپالداعى مەجدۋرەچەنسك ستانتسياسىنىڭ باستىعى دارەجەسىنە كوتەرەدى. 1987 جىلى بۇگىندە ىستىق مەكەنىنە اينالعان كەمەر تەمىرجولىنىڭ نوۆوكۋزنەتسك بولىمشەسى ستانتسيا باستىعىنىڭ ورىنباسارى، بەس جىلدان كەيىن كەمەر تەمىرجولىنىڭ باستىعى بولادى.
ال تولەەۆتىڭ ساياساتتاعى نىق قادامى 1985 جىلدان باستاۋ الادى. ول 1988 جىلعا دەيىن كەمەر وبكومىنىڭ ترانسپورت جانە بايلانىس ءبولىمىنىڭ مەڭگەرۋشىسى قىزمەتىن اتقارسا، 1990 جىلى كەمەر وبلىستىق كەڭەسى مەن جەرگىلىكتى اتقارۋ كوميتەتىن باسقارادى. سونداي-اق، 1991 جىلى العاش رەت رەسەي پرەزيدەنتتىگى سايلاۋىنا كانديداتۋراسىن ۇسىنىپ، 7 پايىز داۋىسقا يە بولىپ، بوريس ەلتسين، ۆلاديمير جيرينوۆسكي، نيكولاي رىجكوۆتان كەيىن ءتورتىنشى ورىنعا تابان تىرەگەن. 1996 جىلى پرەزيدەنت ەلتسيننىڭ بۇيرىعىمەن تمد ەلدەرى بويىنشا ارىپتەستىك جونىندەگى مينيستر بولىپ تاعايىندالسا، 1997 جىلدىڭ شىلدە ايىندا ەلتسين قۇزباستاعى الەۋمەتتىك جاعدايدىڭ ۋشىعۋىنا بايلانىستى تولەەۆتى كەمەر وبلىسى اكىمشىلىگىنىڭ باستىعى ورنىنا سايلاۋعا تۇسۋگە ۇسىنىس جاسايدى. سول جىلى 95 پايىز داۋىس جيناپ، ايقىن كورسەتكىشپەن جەڭىسكە جەتكەنى بەلگىلى.
امان تولەەۆ كەمەر وبلىسىن العاش باسقارعان جىلدارى ايماق قۇردىمعا كەتۋدىڭ از-اق الدىندا تۇرعان. حح عاسىردىڭ اياعىندا قۇزباستا 43 شاحتا جابىلىپ، جۇمىسشىلاردىڭ جاپپاي جۇمىستان شىعۋىنا اكەپ سوقتى. 1998 جىلى وبلىستىڭ جەر-جەرىندە شاحتەرلەر نارازىلىق شەرۋگە شىعىپ، جالاقىنىڭ ازدىعىن، ازىق-تۇلىكتىڭ تاپشىلىعىن جانە ەڭبەك شارتىنىڭ قيىنداپ كەتكەنىن العا تارتتى. شەرۋشىلەر ماڭىزى بار جولدار مەن ءترانسسىبىر ماگيسترالىن جابۋعا تىرىسقاندا، تولەەۆ قارىزعا بەلشەدەن باتقان قاراپايىم قىزمەتكەرلەردىڭ شاعىمىن ەسكەرىپ، تەز ارادا شەشىمىن تابۋعا تىرىساتىنىن جەتكىزدى. دەر كەزىندە قابىلدانعان شارالار «رەلس سوعىسىنىڭ» توقتاۋىنا تۇرتكى بولعانىن ايتا كەتكەن ءجون.
تولەەۆتىڭ ساياساتتاعى تاعى ءبىر جەمىستى ەڭبەگى – رەسەيدىڭ كومىر ايماعىنداعى ەكونونوميكالىق احۋالدى قالپىندا ساقتاپ قالۋى. ول باسشىلىق ەتكەن ۋاقىتتا قۇزباستا كومىر وندىرەتىن شامامەن 90 جاڭا كاسىپورىن مەن زاۋىت اشىلىپ، بۇل سالاعا كەلەتىن جىل سايىنعى ينۆەستيتسيا 50 ملرد رۋبلگە دەيىن شارىقتادى. سونىمەن قاتار مەتاللۋرگيا سالاسىنىڭ دا دامۋىنا ەرەكشە سەرپىن بەرىلدى. قۇزباستا تۇڭعىش رەت جوعارى جىلدامدىقتاعى پويىزدار ءۇشىن رەلس ءوندىرىسى قولعا الىنسا، كەيىن مۇندا مۇناي وڭدەۋ جانە تۋريزم سالاسى دا جاندانا باستادى. بۇگىندە شەرەگەش ەلدى مەكەنىندە سالىنعان تاۋ-شاڭعى كۋرورتىنا جىل سايىن 1 ملن تۋريست كەلەدى، مۇندا دا تولەەۆتىڭ ايقىن قولتاڭباسى بار ەكەنى ايتپاسا دا تۇسىنىكتى.
ءبىر ايتا كەتەرلىگى، تولەەۆ باسقارعان جىلدارى كەمەر وبلىسى تۇرعىندارى ايتارلىقتاي الەۋمەتتىك قولداۋعا يە بولدى. مۇندا ەگدە تارتقان كىسىلەر ءۇشىن جوعارى بازالىق زەينەتاقى تاعايىندالدى، ەل قورعاۋعا ۇلەس قوسقان ارداگەرلەر ەم-دومدى تەگىن قابىلداي الادى. ودان بولەك كوممۋنالدىق تولەم بويىنشا ارنايى جەڭىلدىك قاراستىرىلعان. ءتىپتى، الەۋمەتتىك جاعىنان از قامتىلعان جانە كوپبالالى وتباسىعا اۋىل شارۋاشىلىعىمەن اينالىسۋ ءۇشىن ۇساق مال، كوكونىس تۇقى تەگىن بەرىلدى. ال ءبىلىم العىسى كەلەتىن جاستارعا ارنايى سىياقى مەن گرانتتار ءبولىندى. سول سياقتى قۇزباستاعى مىڭداعان وتباسىنىڭ 20 جىلعا پايىزسىز نەسيە الىپ، العاشقى جارنانى قۇيماي-اق، باسپانالى بولعانىن بىرەۋ بىلسە، بىرەۋ بىلمەس.
P.S:جۇرت بىلەتىن امان تولەەۆ وسىنداي ازامات. وكىنىشتىسى سول، بوگدە ۇلت وكىلىنىڭ ۇلكەن وبلىستى باسقارىپ وتىرعانى بازبىرەۋلەردىڭ شىمبايىنا باتتى ما، ايتەۋىر از كۇندە ونىڭ قىزمەتتەن بوساۋى ءۇشىن بارىنشا ارەكەت ەتكەن توپتىڭ جۇمىلا ىسكە كىرىسكەنى انىق. «بۇدان ءارى ايماقتى باسقارۋىم دۇرىس ەمەس» دەپ شەشكەن ازاماتتىڭ ار الدىندا دا، ەل الدىندا دا ادال ەكەنى بارشاعا ايان.
ايتپاقشى، امان تولەەۆ وتستاۆكاعا كەتسە دە، «حالىق گۋبەرناتورى» اتاعى قالا بەرمەك. ول رەزيدەنتسيانى دا بوساتپايدى. وعان اي سايىن 50 مىڭ رۋبل زەينەتاقى تاعايىندالدى. ال سوڭعى كۇندەگى اقپارات بويىنشا كەمەر وبلىسىنىڭ بۇرىنعى گۋبەرناتورى امان تولەەۆ وبلىستىڭ حالىق دەپۋتاتتارى كەڭەسىنىڭ مانداتىنا يە بولدى. «كەمەر وبلىسىنىڭ سايلاۋ كوميسسياسىنىڭ وتىرىسى ءوتتى. حالىق دەپۋتاتتارى كەڭەسىنىڭ بوس مانداتىنا بىرىڭعاي تىزىمنەن كانديداتۋرا بەرۋ تۋرالى ماسەلە قارالدى. «ەدينايا روسسيا» پارتياسىنىڭ كەمەر ايماقتىق فيليالى تولەەۆ امانگەلدى مولداعازىۇلىنا بوس دەپۋتاتتىق مانداتتى بەرۋ تۋرالى شەشىم قابىلدادى. سونداي-اق، 2013 جىلى وبلىستىق كەڭەس دەپۋتاتتارىن سايلاۋدا «ەدينايا روسسيا» پارتياسى ۇسىنعان كانديداتتار تىزىمىندە تولەەۆ كوش باستاپ تۇر»، – دەدى سايلاۋ كوميسسياسىنىڭ وكىلى.
