شىمكەنت قالاسى اكىمىنىڭ ورىنباسارى ەرعالي بىلىسبەكوۆ اپتا سايىن تۇرعىنداردى ونلاين تۇردە قابىلداپ، ولاردىڭ ءوتىنىش-تالاپتارىنىڭ ورىندالۋىن باقىلاۋعا الىپ كەلەدى. بۇل ءوز كەزەگىندە حالىق پەن بيلىك اراسىندا تىكەلەي قارىم-قاتىناستىڭ نىعايىپ، تۇيتكىلدى ماسەلەلەردىڭ زاڭ اياسىندا وڭ شەشىلۋىنە سەپتىگىن تيگىزۋدە. سانيتارلىق تالاپقا ساي قاشىقتان وتكىزىلىپ جاتقان قابىلداۋ بۇل جولى وفلاين كەزدەسۋگە جالعاستى.
ءۇش ساعاتقا جۋىق كەزدەسۋدە قالا باسشىسىنىڭ ورىنباسارى تۇرعىنداردىڭ ارىز-شاعىمدارى، وتىنىشتەرى مەن ۇسىنىستارىن تىڭدادى. نەگىزگى سۇراقتار تۇرعىن ءۇي جانە جۇمىسپەن قامتۋ، الەۋمەتتىك كومەك جانە مۇمكىندىگى شەكتەۋلى ازاماتتاردىڭ وزەكتى ماسەلەلەرى بولدى.
قالا باسشىلىعىمەن كەزدەسۋدە بولعان تۇرعىننىڭ ءبىرى مادينا تايجانوۆا. 3 بالاسى تۋا ءبىتتى اۋىر سوزىلمالى اۋرۋعا شالدىققان. ەرەكشە بالالاردى اسىراۋشى انا مەديتسينالىق مەكەمەلەردەن تەگىن بەرىلەتىن پرەپاراتتاردان بولەك ەمگە ءتيىمدى قىمبات باعالى «سابريل» پرەپاراتىن سۇراۋدا. الايدا، شىمكەنت قالاسى بويىنشا دەنساۋلىق ساقتاۋ سالاسىندا بۇل ءدارى-دارمەك تىركەلمەگەن. قالا اكىمىنىڭ ورىنباسارى اتالمىش سۇراق بويىنشا قر دەنساۋلىق ساقتاۋ مينيسترلىگىنە حات جولداماق.
كەزدەسۋ بارىسىندا ەرعالي بىلىسبەكوۆ ناقتى ساۋالدار بويىنشا قر پارلامەنتى ءماجىلىسىنىڭ دەپۋتاتتارىمەن تىكەلەي تەلەفون ارقىلى سويلەسىپ، تۇرعىنداردىڭ وتىنىشتەرىن جەتكىزدى. ال، جەرگىلىكتى دەڭگەيدە شەشىمىن تابۋعا ءتيىس سۇراقتار بويىنشا قالالىق دەنساۋلىق ساقتاۋ باسقارماسى مەن باسقا دا جاۋاپتى سالا باسشىلىقتارىنا ناقتى ءارى بەلگىلەنگەن ۋاقىت ىشىندە جۇزەگە اسىرۋعا بىرقاتار تاپسىرمالار بەرىلدى. جينالعان قاۋىم قالالىق جۇمىسپەن قامتۋ جانە الەۋمەتتىك قورعاۋ، تۇرعىن ءۇي باسقارماسى باسشىلارى مەن قىزمەتكەرلەرىنىڭ دورەكىلىگىنە، حالىقپەن سويلەسكەندە اشۋشاڭدىققا بوي الدىراتىندىعىن ايتىپ شاعىمداندى. كوپ جاعدايدا اكىمدىكتە وتەتىن جينالىستان بوسامايتىندارىنا نارازى. ەرعالي داۋلەتبەكۇلى بۇل شاعىمعا بايلانىستى باسقارما باسشىلارعا ەسكەرتۋ جاسادى.
تۇرعىندار مۇگەدەكتىكتى تاعايىندايتىن مەديتسينالىق الەۋمەتتىك ساراپتاما جۇمىسىنا قاتىستى دا تالاپ-تىلەكتەرىن جەتكىزدى. بۇل ماسەلەگە قاتىستى ۇسىنىستارىن حات جۇزىندە جولداۋلارىن جانە الداعى ۋاقىتتا پروتسەدۋرالار مەن ەرەجەلەرگە قاتىستى مۇمكىندىگى شەكتەۋلى جانداردىڭ وتىنىشتەرىن بىرگە قارايتىنىن اتاپ ءوتتى.
قالا اكىمىنىڭ ورىنباسارى ءبىر ايدان سوڭ ءدال وسى تۇرعىنداردى قايتا قابىلداپ، ماسەلەلەرىنىڭ شەشىلۋ ناتيجەسىن زەردەلەيتىن بولادى.
شىمكەنت قالاسى اكىمدىگىنىڭ ءباسپاسوز قىزمەتى
