شاردارالىق مۇعالىمدەردىڭ ەسەپشوتىنان 17 ملن تەڭگە جىمقىرعان الاياق ۇستالدى، دەپ حابارلادى Polisia.kz. بۇل تۋرالى "ادىرنا" ۇلتتىق پورتالى جازادى.
شاردارا اپب-عا قالاداعى بىرنەشە مەكتەپتىڭ ەسەپشوتىنان، ياعني مۇعالىمدەردىڭ جالاقىلارىنان اسا ءىرى مولشەردەگى قارجىنىڭ نەگىزسىز بوتەن ەسەپشوتقا اۋدارىلعانى تۋرالى اقپارات كەلىپ ءتۇستى.
اتالعان جايتتى پوليتسيا قىزمەتكەرلەرى قر قىلمىستىق كودەكسىنىڭ 190-بابى (الاياقتىق) بويىنشا تىركەدى.
شاردارالىق پوليتسەيلەر اقپارات الىسىمەن بىردەن ىسكە كىرىسىپ، قىلمىستى اشۋ ءۇشىن ءىرى كولەمدەگى اقشانىڭ قايدا اۋدارىلعانىن انىقتاۋدان باستادى. ناتيجەسىندە، ءتارتىپ ساقشىلارى تاۋلىك ىشىندە كۇدىكتى ەسەپشوتتى انىقتاپ، ونى بۇعاتتاپ ۇلگەردى. سونىمەن قاتار، ەسەپشوت يەسىنىڭ جەكە باسىن انىقتادى. كۇنى-ءتۇنى ۇزدىكسىز اتقارىلعان ءىس-شارالار بارىسىندا كۇدىكتىنىڭ الماتى قالاسىندا جۇرگەنى ايقىندالدى. سودان شاردارا اپب كپب-ءنىڭ جەدەل ۋاكىلدەرى ءسابيتجان ايازحانوۆ پەن باقبەرگەن وڭالباي الماتى قالاسىنا ىسساپارمەن بارىپ، كۇدىكتىنى ۇستاپ، جاس جىگىتتى پوليتسيا بولىمىنە جەتكىزدى.
بەلگىلى بولعانداي، جاس جىگىت بۇرىن قارجى سالاسىندا جۇمىس جاساعان. وتكەن جىلدىڭ قىركۇيەگىندە اتالمىش جۇمىس ورنىنان شىعىپ، الماتى قالاسىنا كەتكەن. ءبىراز ۋاقىت جۇمىسسىز قالعان وعان اقشا قاجەت بولىپ، ونى “وڭاي جولمەن” تابۋعا كىرىسەدى. سودان ارام ويىن ىسكە اسىرىپ، 40-تان استام مۇعالىمنىڭ جالاقىسىن ءوز شوتىنا اۋدارىپ العان. جابىرلەنۋشىلەرگە كەلتىرىلگەن شىعىننىڭ جالپى كولەمى 17 ملن تەڭگەدەن استى. ايعاقتى زات رەتىندە كۇدىكتىدەن 1,5 ملن تەڭگە تاركىلەندى.
بۇگىنگى تاڭدا پوليتسيا بولىمىنە جەتكىزىلگەن كۇدىكتى جاس جىگىت قاماۋعا الىندى. پوليتسەيلەر ونىڭ باسقا دا قىلمىستارعا قاتىسى بار-جوعىن انىقتاپ، تەرگەۋ امالدارىن جالعاستىرۋدا.
"ادىرنا" ۇلتتىق پورتالى
