الماتىداعى قازاقتەلەكوم قىزمەتكەرلەرى وتكەن جىلدىڭ جەلتوقسان ايىنان بەرى جالاقى ماسەلەسىن كوتەرىپ، بەيبىت ميتينگكە شىعىپ، تالاپتارىن ايتىپ كەلەدى. باسشىلىقتىڭ بەيبەرەكەت ارەكەتىنەن شارشادىق دەگەن قىزمەتكەرلەر «ەرەكشە قامقورىنداعى» ءدىندار ارىپتەستەرى تۋرالى ايتىپ، وكپەسىن جەتكىزدى. بۇل تۋرالى Azattyq Rýhy سايتىنا سىلتەمە جاساپ، "ادىرنا" ۇلتتىق پورتالى حابارلايدى.
اتى-ءجونىن اشىق جاريالاماۋدى سۇراعان قىزمەتكەرلەر باسشىلىققا تيمۋر حۋدايبەرديەۆ كەلۋىنەن كەيىن، نامازحاندارعا دەگەن ەرەكشە قامقورلىق باستالدى دەيدى.
«تيمۋر تەلمانۇلىنىڭ بىزگە باسشىلىققا كەلۋىمەن نامازحاندارعا دەگەن ەرەكشە قولداۋ باستالدى. قازىر ول «قازاقتەلەكوم» اق توراعاسى قۋانىشبەك ەسەكەەۆتىڭ ورىنباسارى. بۇرىن ول كىسى ساتىپ الۋ ديرەكتسياسىندا باس ديرەكتور بولعان، اتالعان فيليالداعىلار تيمۋردىڭ كەلۋىنەن كەيىن ناماز ۋاقىتىندا دالىزدە قاز-قاتار جايناماز جايىپ، قۇلشىلىعىن ورىندايتىن بولىپ كەتتى. بىرەۋلەر «قۇلشىلىق جاساي بەرسىن، وندا تۇرعان نە بار؟» دەيتىن بولار. بىراق ولاردىڭ بارلىعىنىڭ دەرلىك بالاعى قىسقا، ساقالى ۇزىن. سوسىن الماتىنىڭ ءار فيليالىنداعى ءدىندارلاردىڭ جالاقىسىن كوتەرىپ، جانىنا جيناي باستادى. ماسەلەن، بەس جىل جۇمىس تاجىريبەم بار مەن جانە ەكى جىل جۇمىس ءوتىلى بار نامازحان تۇرساق، لاۋازىمدى قىزمەتكە ءبىرىنشى سونى قويادى. سەبەبى، ول سول جاماعاتتان. سول ديرەكتسيادا كەمىندە 50 نامازحان جۇمىس ىستەيدى»، - دەدى ول.
ەلدەگى رۋشىلدىق پەن جەرشىلدىكتەن شارشاعان ماماندار ەندى بۇل تىزىمگە كىمنىڭ ناماز وقىپ وقىمايتىنى قوسىلدى دەپ وتىر.
«قاراپايىم ينجەنەر بولىپ جۇرگەن نامازحان جىگىتتى تيمۋر مىرزا بىردەن باس مەنەدجەر ەتىپ تاعايىندادى. نەگىزى ول ورىنعا بىرنەشە جىلدىق تاجىريبەسى بار مامان سايلانعالى تۇرعان ەدى، تەلمانۇلى ءبىر تەلەفون قوڭىراۋىمەن ءدىنشىل جىگىتتى سايلاپ جىبەردى. كەز كەلگەن مەكەمەدە كاسىبي شەبەرلىك، جۇمىس ءوتىلى ءبىرىنشى كەزەكتە بولۋى كەرەك ەمەس پە؟! ناماز، قۇلشىلىق ول ادامنىڭ جەكە شارۋاسى. باسشىلاردىڭ رۋشىلدىق، جەرشىلدىگى ازداي، ەندى كىم ناماز وقيدى، كىم وقىمايدى دەپ مامانداردى بولەر بولساق، وندا ءبىز نەسىنە بالەنباي جىل جوو-دا وقۋ وقىدىق»، - دەيدى اشىنعان قىزمەتكەرلەر.
سوڭعى كەزدە قىزمەتكەرلەرى جالاقىنى كوتەرۋدى تالاپ ەتىپ جاتقان قازاقتەلەكوم ديرەكتورلارىنىڭ قىزىعى مۇنىمەن بىتپەيدى. شاعىمدانۋشىلاردىڭ سوزىنشە، كەڭسەدەگى جينالىس كەزىندە باسشى تالاپ قويعانداردى تىلدەپتى.
«ءبىرىنشى اقپان كۇنى جەلى ديۆيزونى بىرلەستىكتەرىنىڭ وبلىستارداعى تەحنيكالىق ديرەكتورلارىمەن ونلاين جينالىسى ءوتتى. اتالعان جينالىستا باس ديرەكتور الكوگول ءىشىپ العانداي كورىندى، سەبەبى ەتيكاعا ساي ەمەس سوزدەر ايتىپ، ءوزىن ءبىرتۇرلى دورەكى ۇستادى»، - دەدى قازاقتەلەكوم قىزمەتكەرى.
سونداي-اق، قىزمەتكەرلەر «قازاقتەلەكوم» اق فيليالى باس ديرەكتورى بولات ەرلانۇلىنا «الماتىتەلەكوم» تبس ۇجىمى جالاقى مەن باسقا دا پروبلەمالارىنا قاتىستى جازباشا ءوتىنىش جازعان. باسشىلىق قىزمەتكەرلەردىڭ تالاپ-تىلەكتەرىنە قاتىستى شارالاردى كەلەسى اپتا ايتۋعا ۋادە بەرىپتى.
«ءبىز «قازاقتەلەكوم» اق فيليالى – «الماتىتەلەكوم» تبكب-ءنىڭ تەحنيكالىق بلوگى قىزمەتكەرلەرىنىڭ ۇجىمى لاۋازىمدىق جالاقىلاردىڭ كەمىندە ەكى ەسە ءوسۋىن تالاپ ەتىپ وتىرمىز. سەبەبى، كاسىپورىنداعى قىزمەتكەرلەردىڭ شتاتتىق سانىنىڭ قىسقارۋىنا بايلانىستى ورىندايتىن جۇمىس كولەمىمىز ۇلعايدى. مىندەتتەرىمىز بەن جاۋاپكەرشىلىك وسكەنىمەن، جالاقىنىڭ وسەتىن ءتۇرى بولماي تۇر. بىزدەگى قاتارداعى ينجەنەرلەردىڭ الاتىن ايلىعى – 66 مىڭ تەڭگە. ويلاڭىزشى، ونى قايدا جەتكىزۋگە بولادى. ەلدە كۇن سايىن ازىق-تۇلىك، پاتەر باعاسى قىمباتتاپ جاتىر. ودان بولەك، ارنايى مامانداردىڭ جۇمىستا كيەتىن قىزمەتتىك كيىمدەرى، اياق كيىمدەرى، تەحنيكالىق قۇرالدارىنىڭ بارلىعى ەسكى. قىزمەتتىك كولىكتەرىمىز ەسكى، جاڭا كولىكتەردى تەك باسشىلىق قىزمەتتەگىلەر قولدانادى. ولشەۋ قۇرالدارى دا جەتكىلىكسىز. الماتىداعى پانفيلوۆ كوشەسى بويىندا ورنالاسقان عيماراتتىڭ جارتىسىن جەكەمەنشىككە ساتىپ جىبەرىپ، سىيماي قالعان قىزمەتكەرلەردى ستانتسياعا جىبەرە سالدى. ءبىر سوزبەن ايتقاندا، ءبىز سياقتى قاتارداعى قاراپايىم قىزمەتكەرلەرگە جۇمىس ىستەۋگە جاعداي مۇلدەم جاسالماعان. ءبىز ەلدەگى وزگەرىستەرمەن بىرگە جاعدايىمىزدىڭ دا وزگەرگەنىن قالايمىز. باسشىلىق «9 اقپان كۇنى جينالىس اشىپ، بىزگە ءبىر جاۋابىن ايتامىز» دەدى. بىراق بۇل ماسەلەنى ءبىزدىڭ كوتەرىپ كەلە جاتقانىمىزعا بىرنەشە ۋاقىت بولدى، ەندى ەلدەگى وزگەرىستەرمەن بىرگە ءبىزدىڭ دە جاعدايىمىز وزگەرىپ قالار دەگەن ۇمىتتەمىز»، - دەدى قىزمەتكەرلەر.
ەسكە سالساق، 31 قاڭتار كۇنى الماتىدا «قازاقتەلەكوم» اق قىزمەتكەرلەرى جالاقىنى كوتەرۋدى تالاپ ەتىپ، نارازىلىقتارىن ءبىلدىردى. تەحنيكالىق ءبولىمنىڭ قىزمەتكەرلەرى ءبىر كۇن جۇمىسقا شىقپاي قويعان.
"ادىرنا" ۇلتتىق پورتالى
